Silempwale ni Yohani
10 Yesu aahihimya wiira: “Tthiri, kinooleelani ekeekhai wiira, ole onikela munsisini mwa ipwittipwitthi ohiviraka vamukhora, masi otuphaka exiri, mutthu owo latarau.+ 2 Vano, ole onikela munsisini oviraka vamukhora, tokhanle makampusi a ipwittipwitthi.+ 3 Kwarta onnimuhulela yoowo,+ nave ipwittipwitthi sinniiwa nsu na makampusi owo.+ Owo onniihana ipwittipwitthi sawe oromolaka nsina ni onnikumiherya vate. 4 Nuumala okumiherya vate ipwittipwitthi sawe sootheene, owo onnihoolela, nave iyo sinnimutthara, okhala wiira sinnisuwela nsu nawe. 5 Ipwittipwitthi khasinimutthara mutthu sihinimusuwela aya, masi sinoomutthyawa, maana khasinisuwela nsu na mutthu owo”. 6 Yesu aahaahimeerya nlikanyiho nla, masi awo khiyaiwexenxe etthu aaleela awe.
7 Yesu aahihimya-tho wiira: “Tthiri, kinooleelani ekeekhai wiira, miyo ka mukhora wa ipwittipwitthi.+ 8 Ootheene ale yaihimya okhala amakampusi eekeekhai, ti alatarau. Nto, ipwittipwitthi khisaawiiwelenle. 9 Miyo ka mukhora. Ole onikela munsisini oviraka mwa miyo, onimoopowa. Owo onookelaka ni okhuma, nave onoophwanyaka yoolya.+ 10 Latarau onrweela wiiya, wiiva ni ohonona paahi.+ Miyo kihoorwa wiira atthu akhalane okumi woomalela. 11 Miyo ka makampusi ooreera murima.+ Makampusi ooreera murima onnileva okumi awe mwaha wa ipwittipwitthi sawe.+ 12 Vano namuteko oniliviwa, yoowo ohikhanle makampusi, nave ipwittipwitthi sihikhanle sawawe, okathi onoona awe mwiici orwaaka, onnihiya ipwittipwitthi, onatthyawa. Vano mwiici onnivara ipwittipwitthi iyo ni onnimwara-mwarya. 13 Owo khonikhapelela ipwittipwitthi iyo, okhala wiira namuteko oniliviwa paahi. 14 Miyo ka makampusi ooreera murima. Kinnisuwela ipwittipwitthi saka, nave iyo sinnikisuwela.+ 15 Ntoko siisaale Tiithi onikisuwela awe, miyo kinimusuwela aka Tiithi.+ Miyo kinnileva okumi aka mwaha wa ipwittipwitthi saka.+
16 “Kookhalana-tho ipwittipwitthi sikina sihikhanle sa nikoto* nenla.+ Seiyo-tho kihaana othukumanya, nave iyo sinrowa owiriyanaka nsu naka. Sinrowa okhala nikoto nimosa ni okhalana makampusi mmosa.+ 17 Tiithi onnikiphenta,+ okhala wiira kooleva okumi aka+ wiira kaakhele vasya. 18 Khuuvo mutthu onikaakha okumi aka, masi miyo kinnileva voohikhanyereriwa. Miyo kookhalana owerya wooleva okumi aka, nave kookhalana owerya woowaakhela vasya.+ Ti siiso Tiithi aka okirumme awe”.
19 Ayuda yaahikawanyeya-tho+ mwaha wa moolumo ala. 20 Anceene a yaawo, yaanihimya wiira: “Ola ookhalana nlaikha nootakhala ni onikhwa anepa.* Xeeni muninwiriyana anyu?” 21 Akina yaanihimya wiira: “Ala khahiyo moolumo a mutthu orina nlaikha nootakhala. Niireke nlaikha nootakhala ninniwerya otthukula maitho a atthu ahinoona?”
22 Okathi owo, oYerusalemu naahikhala Niira Nootthapela.* Yaari eyiita, 23 nto Yesu iira eettaka mutemplo, nipuro naihaniwa Niphiryo na* Salomooni.+ 24 Vano, ayuda yaahimurukurerya Yesu, anahimya wiira: “Munrowa onihiya naanyiheryaka mpakha silini? Mwaari Kristu, munileele, muhinikhuwe”. 25 Yesu aahiwaakhula oriki: “Miyo kihooleelani, masi nyuwo khamunikupali. Miteko kinivara aka mwa nsina na Tiithi aka, sinnikikhalela onamoona.+ 26 Nyuwo khamunikupali, okhala wiira khamuhiyo ipwittipwitthi saka.+ 27 Ipwittipwitthi saka sinniiwa nsu naka, ni miyo kinnisuwela. Nave iyo sinnikitthara.+ 28 Miyo kinnivaha ipwittipwitthi iyo okumi woohimala,+ nave khasinkhala-khala sipwetexiwaka. Khuuvo onrowa okuxa mmatatani mwaka.+ 29 Ipwittipwitthi Tiithi aka okivanhe awe, ti sa faita yuulupalexa ovikana itthu sootheene. Nave khuuvo oniwerya okuxa mmatatani mwa Tiithi.+ 30 Miyo ni Tiithi nihiiraana”.*+
31 Ayuda yaahitthikela-tho ottotta maluku wiira anvonye Yesu. 32 Vano Yesu aahaaleela wiira: “Miyo koowooniheryani miteko sinceene sooreera sinikhuma wa Tiithi. Eriyari ya miteko iya, muniphavela okivonya maluku mwaha wa muteko xeeni?” 33 Ayuda yaahimwaakhula wiira: “Hiyo khahiyo nnoovonyani maluku mwaha wa muteko wooreera, masi mwaha wa onveeha+ Muluku, maana muniipaka okhala muluku, muri ene pinaatamu”. 34 Yesu aahaahimeerya wiira: “Munlamuloni mwanyu voolempwa so: ‘Muluku oohimya wiira: “Nyuwo mwa amuluku”’.*+ 35 Nave noosuwela wiira Soolempwa, khasiniturukiwa. Nto, vakhala wiira Muluku oowiihana ale alamuliwe munuulumoni mwawe okhala ‘amuluku’,+ 36 niireke vannikhalela ohimya wiira: ‘Nyuwo muninveeha Muluku’, mwaha woowi koohimya wiira: ‘Miyo ka Mwaana a Muluku’,+ nnaamwi kitteelihiwe ene ni kirummwale ene ni Tiithi? 37 Kaahivareke miteko sa Tiithi aka, muhikikupali. 38 Masi kaavaraka seiyo, nnaamwi muhikikupaliki, mukupaliki miteko seiyo.+ Siiso, munoosuwela ni munookupaliki wiira Tiithi ohiiraana ni miyo, nave miyo kihiiraana ni Tiithi”.+ 39 Nto awo yaahiphavela-tho onvara, masi Yesu aahikhuma opuro ole.
40 Vano Yesu aahihokolowela-tho ekhopela ekina ya muro Yordani, weiwo Yohani aapatisa awe atthu khalai.+ Nto aahikhala weiwo. 41 Atthu anceene yaanirowa vaari awe Yesu, anahimeeryana wiira: “Yohani khopanke mwiiriirya nnakhala mmosa, masi itthu sootheene olavunle awe omuhimyaka mulopwana ola, ti seekeekhai”.+ 42 Siiso, opuro ole, atthu anceene yaahimwaamini Yesu.