Silempwale ni Luka
12 Okathi owo, muttitthi wa atthu ikonto ikonto sene, waahithukumana, onaphunyana. Vano, Yesu aapacenrye toko waaleela awiixutti awe wiira: “Mwiikasoope saana ni eferemento ya afarisi, eyo piiyo, wootha.+ 2 Masi, khiivo etthu yiipithihiwe saana, ehinrowa wooniheriwa. Nave, khiivo esiiri ehinrowa osuweliwa.+ 3 Tivo, etthu enilavula anyu wiiphiini, enrowa wiiwanyeya nipuro noowaatta atthu. Nave, etthu enilavula anyu muri ene okwartu, enoolaleiwa vampani. 4 Nave-tho, kinooleelani nyuwo, apatthani aka,+ wiira muhiwooveke ale aniwerya owiivani, nuumala-vo ahinawerya-tho opaka etthu ekina.+ 5 Masi kinoowooniheryani ole mukhanle anyu oomoova: Mmooveke Ole oniira amwiiva mutthu, onawerya omurihela oGehena.*+ Aayo, kinoohimeeryani wiira mmooveke Yoowo.+ 6 Kiira iphera thanu sinnitumihiwa musurukhu miili orina efaita vakhaani?* Masi, Muluku khoniliyala hata ephera emosa.+ 7 Nave, ikharari sootheene sa mmuru mwanyu, sookontariwa.+ Muhoove, nyuwo mookhalana efaita yuulupale ovikana iphera sinceene.+
8 “Ole onihimya ohoolo wa atthu+ wiira mwiixutti aka, nave-tho miyo kinoohimya ohoolo wa malaikha a Muluku+ wiira mwiixutti aka. 9 Masi ole onikikhootta ohoolo wa atthu, nave miyo kinoomukhootta ohoolo wa malaikha a Muluku.+ 10 Ole oninveeha Mwaana a Mutthu, onooleveleliwa. Masi ole oniveeha ikuru soowaarya, khonileveleliwa.+ 11 Okathi muniroihiwa anyu opuro athukumanne atthu anceene* aahiiso wa makhulupale a kuvernu ni anamalamulela, muhixanke ni etthu yoolavula ni moota munrowa anyu wiixaakiha,+ 12 okhala wiira ikuru soowaarya sinoowiixuttihani ewoora yeeyo, itthu sinreerela ohimya”.+
13 Vano mutthu mmosa aari eriyari ya muttitthi, aahinvekela Yesu wiira: “Mwiixuttihi, mmuleele munnaka wiira okikawele muhakhu ohiyeriwe ahu”. 14 Yesu aahimuhimeerya wiira: “Mulopwana, ti pani okikhalinhe mphuki aahiiso mulipa-ookawa muhakhu ohiyeriwe anyu?” 15 Vano Yesu aahihimeerya muttitthi wa atthu wiira: “Mwiikasoope ni musyake ohiphiyeriwa,+ maana hata mutthu orina ene itthu sinceene, itthu iyo khasininvaha okumi”.+ 16 Nuumala-vo, Yesu aahaaleela nlikanyiho nimosa, oriki: “Mulopwana mmosa oothaaciri, aahiruwerya vanceene. 17 Owo aahipacerya wuupuwela so: ‘Nkirina nipuro noosuka yoolya aka. Nto kiireke sai?’ 18 Vano, aahihimya wiira: ‘Kinrowa wiira so:+ Kinrowa waapwexa arumasiya aka, kaateke aalupale. Nto kinrowa osuka memmo ipyo saka ni mireerelo saka sootheene. 19 Nuumala-vo, kinimwiixiirela: “Nyuwo mookhalana mireerelo sinceene sisukiwe, seiyo siniphiyerya iyaakha sinceene. Mmumuleke, mulyeeke, nwuryeke, ni mpuheke”’. 20 Masi Muluku, onoomuhimeerya wiira: ‘Nyuwo mulolo, ohiyu yoola munimookhwa.* Vano, ti pani onrowa ohalana mireerelo sanyu?’+ 21 Eyo ti etthu eniiraneya ni mutthu oniithukumanyerya muhakhu, masi ohinakhala thaaciri vamaithoni va Muluku”.+
22 Nto Yesu aahaaleela awiixutti awe wiira: “Tivo kinooleelakani wiira, muhiye oxanka mwaha wa ikumi sanyu, muupuwelaka etthu yoolya, aahiiso etthu yoowara.+ 23 Okumi wookhalana efaita yuulupale ovikana yoolya, nave erutthu ovikana yoowara. 24 Nkaaweheeni anakhuku: Awo khanaala, nnakhala khanihepha, hata kharina ntatha nnakhala arumasiya. Hata vari siiso, Muluku onnaaphwanyiha yoolya.+ Ankhi nyuwo, niireke khamurina efaita waavikana axipalame?*+ 25 Ti pani a nyuwo oniwerya orakamiha vakhaani okumi awe mwaha wa oxankiheya? 26 Vano, vakhala wiira khamuniwerya opaka etthu yaamukhaani siisa, xeeni munixanka anyu ni itthu sikina?+ 27 Nkawehani moota ifilori sa mmatta* sininnuwa aya: Iyo khasinvara muteko, nnakhala khasinitthava ikuwo. Masi, kinooleelani wiira hata mwene Salomooni, ni ovuwa wawe wootheene, khonaware ntoko ifilori iya.+ 28 Vano, vakhala wiira Muluku onniwariha siisa malaxi a mmatta, yaawo anikhala olelo, meelo khupahiwa, niireke khonrowa otepa woowarihani nyuwo, atthu oowaamini vakhaani? 29 Tivo, muhiye oxanka mwaha wa etthu munrowa anyu olya ni owurya, nave muhiye oxanka vanceene.+ 30 Tthiri, iya ti itthu siniphavelexiwa ni atthu a mulaponi. Masi, Tiithi inyu, onnisuwela wiira itthu iya sootheene sinnoothowani.+ 31 Ohiya-vo, khula okathi, muheleke opuro woopacerya Omwene wa Muluku. Vano, itthu iya munimuncereriwa.+
32 “Muhoove, nyuwo nikoto naamukhaani,+ okhala wiira Tiithi inyu, vaamusivela woovahani Omwene.+ 33 Mutumihe mireerelo sanyu, nto musurukhu ene mwaavahe alipa-oohaawa.+ Mwiipakeleke mirupa sa musurukhu sihinthaala, eyo piiyo, mihakhu sa wiirimu sihinimala,+ weiwo alatarau ahiniphiya aya, nnakhala sihinilyiwa aya ni oweexe. 34 Tthiri, vaavo siri mihakhu sanyu, vaavo-tho ti sinrowa aya okhala mirima sanyu.
35 “Nware ikuwo sanyu sa muteko ni mukhale oolikana ene.+ Mpattihe ixamaniiya sanyu.+ 36 Muhaana okhala ntoko arumeyi animulipelela pwiya aya, onitthika+ ofestani ya ekasamento.*+ Nto okathi oniphiya awe, onamana mukhora, awo anoowerya waakuva omuhulela. 37 Arumeyi oohakalala, taale pwiya aya onrowa awe waaphwanya awehawehaka! Kinooleelani ekeekhai wiira, pwiya owo onoowara ikuwo sa muteko sa murumeyi ni onimwaaruma okilaathi, ahameele vameesa. Nto owo onimoorwa okhale naawo, aarumeeleke. 38 Vano, hata pwiya aya orwaaka ohiyu,* aahiiso ohiyu eriyari,* aaphwanya awehawehaka, awo toohakalala! 39 Musuwele etthu ela: Mwaneene etthoko aasuwenle ewoora onrwa awe latarau, khaamuhiya latarau okelaka mpaani mwawe.+ 40 Nyuwo-tho, mukhale oolikana ene, okhala wiira Mwaana a Mutthu onirwa ewoora muhinuupuwela anyu”.+
41 Vano Pedru aahimukoha Yesu, oriki: “Pwiya, nlikanyiho nla, munnileela hiyo paahi, wala munaaleela atthu ootheene?” 42 Nto Pwiya aahaakhula wiira: “Ti pani tthiri ori murumeyi* oororomeleya, orina ankhili,* yoowo pwiya awe omuthanlale awe oweettiha arumeyi awe ootheene,* wiira aavaheke yoolya voohihiyererya, okathi wooreerela?+ 43 Oohakalala ti murumeyi yoole oniira pwiya awe aarwaaka, onamphwanya ovaraka muteko! 44 Mweekeekhai, kinooleelani wiira, pwiya owo onoomuthanla murumeyi owo wiira eettiheke muhakhu awe wootheene. 45 Masi vakhala wiira murumeyi owo onoohimya vamurimani vawe wiira: ‘Pwiya aka onnipisa orwa’, onapacerya waamanakasa arumeyi akhwaawe, ni onalya ni owurya mpakha ohapaliwa,+ 46 pwiya a murumeyi owo, onimoorwa nihiku ohinlipelela awe, ni ewoora ohinsuwela awe. Nto onoomuhaaxa vanceene, onoomurihela opuro wa atthu oohiroromeleya. 47 Murumeyi yoole onisuwela etthu eniphavela pwiya awe, masi ohinakhala oolikana ene aahiiso ohinapaka ele evekeliwe awe ni* pwiya awe, onoomaniwa ikwaha sinceene.+ 48 Vano ole ohinisuwela etthu oniphavela pwiya awe, masi onapaka itthu siniphwanelela omaniwa, onoomaniwa ikwaha vakhaani. Tthiri, mutthu yoole ovahiwe itthu sinceene, onoovekeliwa itthu sinceene. Nave mutthu yoole ororomeliwe itthu sinceene, onrowa otepa ovekeliwa itthu sinceene.+
49 “Miyo kirwenle opattiha mooro vathi-va. Mooro owo woopatta khalai ene. Tivonto, nkiniphavela-tho etthu ekina. 50 Veekeekhai, kookhalana opatiso kinrowa aka opatisaniwa. Nlelo kinooxanka mpakha opatiso owo omala!+ 51 Munuupuwela wiira kiruuhale murettele vathi-va? Nnaari, nkiruuhale murettele. Kinooleelani wiira kiruuhale ohiiwanana.+ 52 Okhuma olelo orowa ohoolo, onookhala okawanyeya vatthokoni. Yakhala atthu athanu etthoko eyo, araru anrowa waavirikanyaka anli, vano anli anrowa waavirikanyaka araru. 53 Atthu awo anookawanyeya: paapa khonrowa wiiwananaka ni mwanawe mwaamulopwana, mwaana mwaamulopwana khonrowa wiiwananaka ni paapa awe. Maama khonrowa wiiwananaka ni mwanawe mwaamuthiyana, mwaana mwaamuthiyana khonrowa wiiwananaka ni maama awe. Maathi khonrowa wiiwananaka ni mwaara a mwanawe, muthiyana ootheliwa khonrowa wiiwananaka ni maathi awe”.+
54 Nave-tho, Yesu aahihimeerya mittitthi iye sa atthu wiira: “Mwaawehaka neeku nikhumelelaka onikela nsuwa, nyuwo munnihimya wiira: ‘Ennoorwa epula ni epheyo yinceene’. Nto eyo enniiraneya. 55 Vano, yoopaka epheyo ya osuuli,* nyuwo munnihimya wiira: ‘Vanooviha vanceene’. Nto eyo enniiraneya. 56 Anawoothe! Nyuwo munnisuwela otaphulela makhalelo a vathi ni a musulu. Nto xeeni muhinisuwela anyu otaphulela okathi ola ninkhala ahu?+ 57 Xeeni muhinisuwela anyu etthu ya xariya munireerela anyu opaka? 58 Mwa ntakiheryo, mwaarowaka omilattuni ni mutthu mmutthekenle anyu, mwiimananihe ophuka mulattu anyu nuuwo, nlelo mweettaka mphironi, wiira ohoovahereryeni mulipa-oophuka. Nto mulipa-oophuka owo, ohoovahereryeni kwarta ookhatteya, wiira owo ooriheleni mukhatteya.+ 59 Kinooleelani ekeekhai wiira: Khamunikhuma mukhatteya-mmo, muhilinve musurukhu wootheene”.*