Yesaya
46 Muluku Beli ookhoroma,+ muluku Nebo ohuuramela vathi.
Ilatarato saya soowelihiwa vasulu va inama, inama siniteexa miritti,+
Siri ntoko miritti sinlemeliha inama sootemwa.
2 Ootheene aya, aakhoromela vathi ni ahuurama;
Awo khaniwerya woopola muritti* aya,
Nave anirowa weepotthani.
3 “Nyuwo osuulu wa Yakobe, mukiwiriyane, ni nyuwo ootheene muhanle a nloko na Isarayeli,+
Kinookhaliheryaakani okhuma okathi muyariwe anyu ni kinookuxaakani okhuma okathi mwaari anyu mmirimani.+
4 Mpakha wuuluvala wanyu, miyo nkinrowa oturukeya;+
Hata mmelaka ipwi, nlelo miyo kinimookhaliheryakani.
Ntoko kiniira aka mpakha olelo-va, kinrowa wookuxakani, kinimookhaliheryakani ni kinoowoopolakani.+
5 Munikilattaniha naani aahiiso munikilikanyiha ni pani?+
Muniira anyu mwanweha, onalikana ni miyo?+
6 Aakhala ale anihonona eweero ya mmurupani mwaya;
Aniphima eparatha vapalansani.
Annimuruma mulipa onihana iyuuma, nto owo onnimpaka muluku a eparatha.+
Nuumala-vo, awo annuurama, aayo, annikokhorela elatarato eyo.*+
7 Awo annipweha mmakhatani mwaya;+
Annikuxa enapweha opuro aya, nto eyo enakhala vaavo.
Elatarato eyo khenithaama opuro aya.+
Awo annikhuwela ohoolo waya, masi eyo khenaakhula;
Kheniwerya omoopola mutthu oxankale.+
8 Muupuweleke etthu ela, nave mulipihe murima.
Nyuwo anatampi, muupuweleke eyo vamurimani vanyu.
9 Muupuweleke itthu sivinre,* seiyo siiraneyale khalai,
Wiira miyo ka Muluku, khokhanle-tho mukina.
Miyo ka Muluku, khuuvo onlikana ni miyo.+
10 Okhuma woopaceryani, kinnilaleya itthu sihiiraneyale,
Nave miyo kaahihimya khalai ene itthu sinrowa wiiraneya ohoolo.+
Miyo kinnihimya wiira: ‘Etthu kithanlale aka enimwiiraneya tthiri,*+
Kinoopaka khula etthu eniphavela aka’.+
11 Miyo kinnimwiihana xawawe,* onirwa okhumaka mpantta onikhuma nsuwa,+
Kinoomwiihana mulopwana onikhuma elapo ya ottaiwene, wiira opake etthu kithanlale aka.*+
Miyo koolavula, nto kinoopaka etthu kilavunle aka.
Miyo koolakela opaka etthu eyo, nave-tho kinimwiira siiso.+
12 Nyuwo atthu muhiniphavela wiiwa, mukiwiriyane,
Nyuwo muhinipaka itthu sa xariya.
13 Kooruuha exariya aka;
Eyo eri vakhiviru.
Nave okathi kinrowa aka owoopola atthu, khonrowa opisa.+
Kinoomoopola Siyoni, nave kinonvaha Isarayeli ovuwa waka.+