Silempwale ni Marko
8 Mahiku awo, waahithukumana-tho muttitthi muulupale wa atthu, vano atthu ale khiyaarina yoolya. Yesu aahiwiihana awiixutti awe, aahimeerya wiira: 2 “Muttitthi ola wa atthu onnikooniha othunku,+ maana wookhala ni miyo mahiku mararu, ohilyiiye etthu.+ 3 Kawiirela orowa owaani evoliwe ene etala,* awo anoomora mustaraatani, nave akina akhumme ottaiwene”. 4 Vano awiixutti awe yaahimwaakhula yiiraka: “Opuro ola woorakamela omuttettheni, ninrowa ophwanya vai iphaawu sinceene wiira naavahe atthu ala ootheene, mpakha ovona?” 5 Owo aahaakoha wiira: “Murina iphaawu ikavi?” Awo yaahaakhula ariki: “Nrina iphaawu 7”.+ 6 Vano Yesu aahiruma muttitthi ole wa atthu okilaathi vathi. Nuumala-vo, aahikuxa iphaawu iye 7, aahivekela, okawanya. Aahipacerya waavaha awiixutti awe, nto awiixutti yaahaakawela atthu a muttitthi ole.+ 7 Nave-tho, yaahikhalana ihopa vakhaani saamukhaani. Nuumala Yesu ovekela, aahaaleela awiixutti awe wiira akawe. 8 Atthu yaahilya mpakha ovona. Nuumala-vo, saahittotteliwa ipetaaso saahanle,* khusarya ittanka* 7 suulupale.+ 9 Yaari alopwana oowiiraka 4.000. Vano Yesu aahaamwarya.
10 Niinaano-ru, Yesu aahikela mukalawani vamosa ni awiixutti awe, onarowa muttetthe wa oDalimanutha.+ 11 Weiwo yaahirwa afarisi anapacerya ovaanyihana ni Yesu, ananvekela wiira owooniherye ethoonyeryo enikhuma wiirimu, aphavelaka omweehererya.+ 12 Yesu aahiriipiwa murima vanceene, onahimya wiira: “Xeeni atthu ala anivekela aya ethoonyeryo?+ Kinooleelani ekeekhai wiira, atthu ala khanrowa ovahiwa ethoonyeryo nnakhala emosa”.+ 13 Nuumala ohimya siiso, Yesu aahaahiya, otthikela mukalawani, onalapuwela ekhopela ekina.
14 Awiixutti yaahiliyala okuxa iphaawu. Awo khiyaarina etthu ekina yoolya, masi yaarina ephaawu emosa paahi mukalawani.+ 15 Yesu aahaalopola oratteene oriki: “Mutthukule maitho, mwiikasoope saana ni eferemento ya afarisi ni ya Herodi”.+ 16 Vano awiixutti yaahipacerya ovaanyihana yaawo-ru, okhala wiira khiyaarina iphaawu. 17 Nuumala Yesu osuwela, aahaakoha wiira: “Xeeni munivaanyihana anyu mwaha woohikhalana iphaawu? Niireke nlelo khamuniiwexexa etthu enooleelaakani? Niireke nlelo khamuniiwexexa? 18 ‘Nyuwo mookhalana maitho, masi khamunoona, mookhalana maaru, masi khamuniiwa’. Niireke munnuupuwela 19 okathi kaakawannye aka iphaawu iye thanu,+ kaavaha alopwana 5.000. Nto ittanka* ikavi sa ipetaaso* mwaasarihale anyu?” Awo yaahimwaakhula ariki: “Saari 12”.+ 20 “Niireke munnuupuwela okathi kaakawannye aka iphaawu iye 7, kaavaha alopwana 4.000. Nto ittanka* ikavi suulupale sa ipetaaso* mwaasarihale anyu?” Awo yaahimwaakhula ariki: “Saari 7”.+ 21 Yesu aahaakoha-tho wiira: “Niireke nlelo khamuniiwexexa?”
22 Vano, Yesu ni awiixutti awe yaahiphiya oBethisaida. Weiwo, atthu yaahimuruuhela mulopwana mmosa ahoona, anamuxonttela Yesu wiira ompenuxe mulopwana ole.+ 23 Yesu aahimukuxa mulopwana owo, onvarela ntata, omuroiha ota wa muttetthe. Nuumala ohela isene mmaithoni mwa mulopwana ole,+ aahimwiixaatherya matata, onamukoha wiira: “Munnoona etthu?” 24 Mulopwana ole aahitthukula maitho awe, onahimya wiira: “Kinniwoona atthu, masi anikhala ntoko miri sineetta”. 25 Nave-tho, Yesu aahikwannya maitho a mulopwana ole, vano owo aahipenuxiwa, onawerya oweha oratteene khula etthu. 26 Tivonto, aahimuruma orowa owaani, omuleela wiira: “Muhitthikele-tho omuttettheni”.
27 Yesu ni awiixutti awe yaahirowa muttetthe wa oKesareya wa Filipe. Nto yeettaka mphironi, aahaakoha awiixutti awe wiira: “Atthu anihimya wiira miyo ka pani?”+ 28 Awo yaahimwaakhula wiira: “Yohani Mpatisa.+ Akina anihimya wiira mwa Eliya.+ Akina-tho, anihimya wiira mwa mmosa a maprofeta”. 29 Yesu aahaakoha wiira: “Ankhi nyuwo, munihimya wiira miyo ka pani?” Pedru aahimwaakhula wiira: “Nyuwo mwa Kristu”.+ 30 Nto, aahaalopola oratteene wiira ahimuleele mutthu.+ 31 Yesu aahipacerya waatthokiherya awiixutti awe wiira Mwaana a Mutthu ohaana ohaaxiwa vanceene ni okhoottiwa ni makhulupale a ayuda, makhulupale a anamukuttho ni alipa-oowiixuttiha nlamulo. Nave ohaana wiiviwa,+ masi onrowa ohihimuxiwa nihiku na neeraru.+ 32 Tthiri, Yesu aahimya eyo ohivithaka. Masi Pedru aahimukuxa omuroiha opuro mukina, onapacerya ompwapwela.+ 33 Vano Yesu aahirukunuwa, onaaweha awiixutti awe. Nto aahimpwapwela Pedru, oriki: “Mukhume ohoolo waka, Satana! Okhala wiira murina miyuupuwelo sa apinaatamu, ohiya sa Muluku”.+
34 Vano, Yesu aahiihana muttitthi ole wa atthu vamosa ni awiixutti awe, onaahimeerya wiira: “Akhala mutthu oniphavela okitthara, aikhootte mmansawe, okuxe mwiri awe wa nihaaxeryo,* okitthareke voohihiyererya.+ 35 Ole oniphavela woopola okumi awe, onoomurimeela. Masi, ole onimurimeela okumi awe mwaha wa miyo ni mwaha wa ihapari sooreera, onoophwanya.+ 36 Mweekeekhai, mutthu oniphwanya exeeni waakhela olumwenku wootheene, variki okumi awe orowaka opweteya?+ 37 Mutthu onrowa ovaha exeeni tthiri wiira oturuke ni okumi awe?+ 38 Tthiri, ole onrowa wuuliwa muru mwaha wa miyo ni moolumo aka, eriyari ya atthu ala oohiroromeleya* ni oottheka, nave Mwaana a Mutthu onimuuliwa muru mwaha wa mutthu owo,+ okathi Mwaana a mutthu onirwa awe ni ovuwa wa Tiithi awe vamosa ni malaikha awe oowaarya”.+