Silempwale ni Yohani
21 Nuumala-vo, Yesu aahiixooniherya-tho wa* awiixutti awe, ephareya ya oGalileya.* Ti siiso, Yesu aixoonihenrye awe. 2 Yaahithukumana, Simoni Pedru, Tome (yoowo aihaniwa Maphapo),+ Natanayeli+ a oKana wa oGalileya, anamwane a Zebedeyo,+ ni awiixutti akina anli. 3 Vano Simoni Pedru, aahaaleela akhwaawe wiira: “Miyo kinrowa ototha ihopa”. Awo yaahimuhimeerya wiira: “Ni hiyo nnimoottharani”. Awosa yaahivenya, khuwela mukalawani. Masi ohiyu ole, khiyaavanre etthu.+
4 Vahalaka oxa, Yesu aaheemela ophareya, masi awiixutti khiyaasuwela wiira aari Yesu.+ 5 Nto Yesu aahaakoha oriki: “Anaaka, mookhalana etthu enilyiwa?”* Awo yaahaakhula wiira: “Nnaari!” 6 Owo aahaahimeerya wiira: “Murihele ntthavi moono woolopwana wa ekalawa, nto munoophwanya etthu”. Awo yaahirihela, masi khiyaawerya opurula ntthavi, okhala wiira naahisarya ihopa.+ 7 Siiso, mwiixutti ole aaphentiwa ni Yesu+ aahimuhimeerya Pedru wiira: “Ti Pwiya!” Vano, Simoni Pedru vaiwale awe wiira aari Pwiya, aahiwara vasulu nlaya nawe na ota, okhala wiira khaawanre saana. Nto aahituphela mphareya. 8 Awiixutti akina, yaawo yaahanle mukalawani yaamukhaani, yaahimutthara apurulaka ntthavi naasanrye ihopa, maana awo yaahirakamela etthaya, etthu yoowiiraka imeeturu 100 paahi.*
9 Nuuphiya vatthayani, awo yaahiweha mooro opattihiwe ene ni ihopa siri ene vaikho. Nave-tho yaahikhala ephaawu. 10 Yesu aahaahimeerya wiira: “Muruuhe ihopa vakhaani sivanre anyu niinaano-va”. 11 Vano, Simoni Pedru aahikela mukalawani, khipurulela ntthavi ota, nisanrye ene ihopa suulupale. Nnaamwi saakhanle ihopa 153, ntthavi nle khinaakhereyale. 12 Yesu aahiwiirela: “Murwe mulyeeke”. Khuuvo mwiixutti mmosa aawenrye omukoha wiira: “Nyuwo mwa pani?”, maana yaanisuwela wiira aari Pwiya. 13 Vano Yesu aahiwaattamela, aahikuxa ephaawu, aavaha. Nave-tho aahaavaha ihopa. 14 Ela yaari ekwaha ya neeraru+ Yesu aakhumelenle awe awiixutti awe, nuumala ohihimuxiwa mookhwaani.
15 Nuumala olya, Yesu aahimukoha Simoni Pedru, oriki: “Nyuwo Simoni, mwaana a Yohani, munnikiphenta ovikana iya?” Owo aahimwaakhula Yesu wiira: “Aayo Pwiya, nyuwo moosuwela wiira miyo kinnoophentani vanceene”. Nto Yesu aahimuleela Pedru wiira: “Mulyiheke ipwittipwitthi saka”.+ 16 Yesu aahimukoha-tho ekwaha ya nenli, oriki: “Nyuwo Simoni, mwaana a Yohani, munnikiphenta?” Owo aahaakhula wiira: “Aayo Pwiya, nyuwo moosuwela wiira miyo kinnoophentani vanceene”. Nto Yesu aahimuleela Pedru wiira: “Mukukhuleke ipwittipwitthi saka”.+ 17 Yesu aahimukoha-tho ekwaha ya neeraru, oriki: “Nyuwo Simoni, mwaana a Yohani, munnikiphenta vanceene?” Pedru aahiriipiwa murima, okhala wiira Yesu aahimukoha ekwaha ya neeraru, oriki: “Munnikiphenta vanceene?” Tivo, Pedru aahimwaakhula, wiira: “Pwiya, nyuwo munnisuwela itthu sootheene. Nyuwo moosuwela wiira kinnoophentani vanceene”. Yesu aahimuleela Pedru wiira: “Mulyiheke ipwittipwitthi saka.+ 18 Tthiri, kinooleelani ekeekhai wiira, okathi mwaari anyu mmiravo, nyuwo mwaaniwerya wiiwariha mmensinyu, munarowa khula opuro mwaaphavela anyu. Masi, muuluvala vale, munrowa wookolaka matata anyu, nto mutthu mukina oowarihekeni ni oweettihekeni, ooroihakani opuro muhiniphavela anyu”. 19 Yesu aahihimya itthu iya, ophavelaka wooniherya enamuna ya okhwa wa Pedru, yaarowa onvuwiha Muluku. Nuumala ohimya siiso, aahimuleela Pedru wiira: “Mukitthareke voohihiyererya”.+
20 Pedru aahirukunuwa, khumoona mwiixutti aaphentiwa ni Yesu,+ aattharaka. Mwiixutti owo, ti yoole aamwaattamenle Yesu, okathi yaalya aya yoolya ya ohiyu, onamukoha wiira: “Pwiya, ti pani owo onrowa woovarihani?” 21 Tivo, nuumala Pedru onweha mwiixutti owo, aahimukoha Yesu, iiraka: “Pwiya, exeeni enrowa omwiiraneela mulopwana ola?” 22 Yesu aahimwaakhula wiira: “Kaphavela wiira ola okhale mpakha miyo orwa, exeeni enooxankihani? Nyuwo mukitthareke voohihiyererya”. 23 Tivonto, moolumo ale yaahuulaana eriyari ya awiixutti a Yesu, wiira mwiixutti ole khaarowa okhwa. Masi, eyo khahiyo ti etthu Yesu aahimmye awe. Ohiya-vo, owo aahimmye so: “Kaphavela wiira ola okhale mpakha miyo orwa, exeeni enooxankihani?”
24 Mwiixutti owo,+ ti yoole okhalenle onamoona ni olempe itthu iya. Nave hiyo noosuwela wiira onamoona awe ti weekeekhai.
25 Tthiri, nlelo sihaavo itthu sinceene Yesu siirale awe. Nto vaakhanle wiira itthu sootheene soolempwa, kinoona wiira elapo yootheene khiyaarowa okhalana opuro oniphiyerya osuka iroolu sootheene saarowa olempwa.+