Silempwale ni Luka

1 Atthu anceene aalepa itthu sootheene siiraneyale, seiyo-tho hiyo ninkupali ahu.+ 2 Akina-tho yoonale itthu iyo siiraneyaka ni ale anilaleya ihapari sa Muluku,+ aanihimeerya itthu iya.+ 3 Tivo, nyuwo Teofilo oottittimiheya,+ miyo kootokosa itthu iya sootheene nto koolakela olepa itthu iya mwa enamuna enitthareya. 4 Koopaka eyo wiira nyuwo-tho mukupali wiira itthu mwiixuntte anyu, ti seekeekhai.+

5 Okathi wa Herodi,*+ mwene a oYudeya, aahikhala namukuttho aihaniwa Zakariya, yoowo iirela mpantta ekurupu ya anamukuttho yiireliwa Abiya.+ Nto Zakariya aahimuthela muthiyana mmosa aihaniwa Elizabeti, a nloko na* Aroni. 6 Anamathelana awo, yaari atthu a xariya vamaithoni va Muluku ni yaaneettela oratteene sooruma sootheene ni malamulo ootheene a Yehova.* 7 Masi khiyaarina mwaana, okhala wiira Elizabeti khaayara. Nave oowanli aya yaahuuluvala.

8 Vano, Zakariya iira ovaraka muteko awe wa onamukuttho+ ohoolo wa Muluku ni ekurupu awe. 9 Ntoko anamukuttho yaalimalenle aya opaka, yaahiphiya ekwaha awe ya opaha nsenso.*+ Nto, aahikela nipuro noowaarya na mutemplo mwa Yehova.*+ 10 Okathi aapaha awe nsenso, atthu ootheene yiira avekelaka vate. 11 Nto nlaikha na Yehova* naahimukhumelela, neemela moono woolopwana wa altaari aapahiwa nsenso. 12 Nuumala woona nlaikha nle, Zakariya aahixanka, onoova vanceene. 13 Masi, nlaikha naahimuhimeerya wiira: “Nyuwo Zakariya, muhoove, okhala wiira Muluku ohiiwa ovekela wanyu. Nave mwaarinyu Elizabeti, onimooyarelani mwaana mwaamulopwana, yoowo onrowa anyu onvaha nsina noowi Yohani.+ 14 Nyuwo munootteeliwa murima vanceene, nave atthu anceene anootteeliwa murima ni oyariwa wawe,+ 15 maana mwaana owo onrowa okhala muulupale vamaithoni va Yehova.*+ Masi khonrowa owuryaka eviinyu, nnakhala etthu ekina yoohapala.+ Owo onoosareya ikuru soowaarya, hata ohinatthi oyariwa.*+ 16 Nave onimwaakhaliherya aisarayeli anceene omutthikela Yehova,* Muluku aya.+ 17 Muluku onoomuruma mwaninyu ohoolo wawe, orina ene owerya onlikana ni wa Eliya,+ wiira orukunexe mirima sa axipaapa, sikhaleke ntoko sa anamwane+ ni orukunuxe mirima sa atthu oohiiwelela, wiira akhalane miruku sa anaxariya. Nave, onimwaalokiherya atthu wiira anvareleke muteko Yehova”.*+

18 Vano, Zakariya aahihimeerya nlaikha nle wiira: “Kinrowa osuwelexa sai etthu ela? Miyo kihuuluvala, nave amwaaraka aatepa wuuluvala”. 19 Nlaikha naahimwaakhula niiraka: “Miyo ka Gabriyeli.+ Ti yoomi kineemela ohoolo wa Muluku.+ Nto kirummwale olavula ni nyuwo, wiira kooleelani ihapari iya sooreera. 20 Masi mwiiwe! Nyuwo khamunrowa owerya olavula mpakha nihiku ninrowa aya wiiraneya itthu iya, maana khamukupanli moolumo aka, yaawo anrowa wiiraneya okathi othanliwe”. 21 Vano, atthu nlelo yaaninwehererya Zakariya. Nto yaahitikinihiwa okhala wiira aanipisa vanceene okhuma mpaani mwa Muluku. 22 Okathi aakhumme awe, khaawerya olavula ni atthu ale. Nto awo yaahisuwela wiira aahiweha mwiiriirya wootikiniha mpaani mwa Muluku. Vano Zakariya aamuthoonyasa paahi, khaawerya olavula. 23 Okathi aamalinhe awe mahiku a muteko awe mpaani mwa Muluku, aahitthikela owannyawe.

24 Nuuvira mahiku vakhaani, Elizabeti, mwaarawe Zakariya, aahirupala. Nto aahiviriha miyeeri mithanu ohikhumme owannyawe, ohimyaka wiira: 25 “Ela ti etthu Yehova* okiirenle awe vano. Owo ookuupuwela, wiira omalihe wuuliwa waka muru ohoolo wa atthu”.+

26 Okathi seetta aya miyeeri 6 Elizabeti orupanle ene, Muluku aahiruma nlaikha Gabriyeli+ orowa epooma ya oGalileya, yiihaniwa Nazarethi, 27 wiira nakumane ni mwali ahaatonko orupa ni mulopwana,+ yoowo aanoivariwe* ni mulopwana mmosa aihaniwa Yosefe, a nloko na Davidi. Mwali owo aihaniwa Maria.+ 28 Nlaikha nlo naahikela mpaani mwawe, nnamuhimeerya wiira: “Yehova* oohakalala ni nyuwo Maria. Owo ori ni nyuwo”. 29 Maria aahitikinihiwa vanceene ni moolumo ale, onaphavela osuwela etthu yaataphulela aya. 30 Nlaikha naahimuhimeerya wiira: “Nyuwo Maria, muhoove, maana Muluku ohooreerelani murima. 31 Vano mwiiwe, munoorupala ni munoomuyara mwaana mwaamulopwana,+ yoowo onrowa anyu onvaha nsina noowi Yesu.+ 32 Owo onrowa okhala muulupale,+ onimwiihaniwa Mwaana a Muluku Muulupalexa.+ Nave Yehova* Muluku, ononvaha ehice ya Davidi, tiithi awe.+ 33 Owo onrowa olamulela ntoko Mwene mahiku ootheene etthoko ya Yakobe, nave Omwene awe khonimala-tho”.+

34 Vano, Maria aahikoha nlaikha nle wiira: “Vanrowa wiiraneya sai, miyo kihitonko orupa ni mulopwana?”+ 35 Nlaikha naahimwaakhula wiira: “Ikuru soowaarya sinookhala ni nyuwo,+ nto owerya wa Muluku Muulupalexa onimookhapelelani. Tivo, ole onrowa anyu omuyara, onookhala oowaarya,+ ni onrowa wiihaniwaka Mwaana a Muluku.+ 36 Nave-tho, mmusi inyu Elizabeti, oomurupala mwaana mwaamulopwana, hata uuluvanle ene. Vano sineetta miyeeri 6 orupanle ene, nnaamwi iireliwa muthiyana ohiniyara. 37 Tthiri, khiivo etthu Muluku onooceela awe”.+ 38 Nto Maria aahiira: “Miyo ka murumeyi a Yehova!* Yiiraneye ni miyo ntoko sihimme anyu”. Vano, nlaikha naahirowa.

39 Mahiku awo, Maria aahivenya aakuvaka, onarowa muttetthe wa omiyaakoni, epooma ya oYuda. 40 Aahikela vatthokoni va Zakariya, omukhomasa Elizabeti. 41 Nuumala Elizabeti omwiiwa Maria omukhomasaka, mwaana aari mmirimani mwa Elizabeti aahittikinyeya. Vano Elizabeti aahisareya ikuru soowaarya, 42 onalavula voorunya oriki: “Ooreelihiwa ti nyuwo eriyari ya athiyana ootheene, nave ooreelihiwa ti mwaana ori mmirimani mwanyu! 43 Tthiri eparakha yuulupale oxukuriwa ni maama awe Pwiya aka! 44 Mweekeekhai, kiiwaka-ru makhomaso anyu, mwaana ori mmirimani mwaka oottikinyeya, mwaha wa otteeliwa murima. 45 Oohakalala ti nyuwo mwaaminni, okhala wiira sinimwiiraneya voomalela itthu sootheene sihimeeriwe anyu ni Yehova”.*

46 Vano Maria aahihimya wiira: “Miyo kinninvuwiha Yehova.*+ 47 Nave miyo kinnitteeliwa murima vanceene mwaha wa Muluku, Moopoli aka,+ 48 maana owo ooweha ohaawa wa murumeyi awe ola mwaamuthiyana.+ Veekeekhai, okhuma olelo-va, maloko ootheene anrowa okihimyaka okhala oohakalala.+ 49 Tthiri Muluku oowerya, ookipakela itthu suulupale, nave nsina nawe ti noowaarya.+ 50 Okathi wootheene, onnaamorela ikharari ale animoova.+ 51 Owo oorumeela ikuru sawe wiira opake itthu suulupale. Nave ohaamwarexa atthu oowiisoona.+ 52 Owo ohaakumiha veehiceni atthu oowerya+ ni oowinnuwiha atthu oowiiyeviha.+ 53 Ohaavoniha saana ale avoliwe etala, aavahaka itthu sooreera,+ nave oowoomola matata-ru ale yaari athaaciri. 54 Oomukhaliherya Isarayeli murumeyi awe, oomuupuwela yoowo ommorelaka ikharari,+ 55 ntoko aahimenrye awe amuhavinre ahu, Abrahamu ni osuulu awe,+ mahiku ootheene”. 56 Maria aahikhala ni Elizabeti etthu yoowiiraka miyeeri miraru. Nuumala-vo, aahitthikela owannyawe.

57 Vano waahiphiya okathi wa Elizabeti oyara. Nto aahimuyara mwaana mwaamulopwana. 58 Okathi anamwaattamanani awe ni amusi awe vaasuwenle aya wiira Yehova* aahimmorela ikharari vanceene, awo yaahitteeliwa murima nuuwo.+ 59 Nihiku na neethanu neeraru, anamwaattamanani awe ni amusi awe, yaahirwa omwinnuwiha mwaana owo.+ Nto yaaniphavela onvaha nsina na paapa awe, noowi Zakariya. 60 Masi, maama awe aahaaleela wiira: “Nnaari, masi aihaniweke Yohani”. 61 Siiso, awo yaahimuhimeerya wiira: “Mweemusini mwanyu, khuuvo mutthu oniihaneliwa nsina nla”. 62 Nto arumeelaka matata, yaahimukoha paapa awe nsina naaphavela awe onvaha mwanawe. 63 Zakariya aahiihaniha ethaapwa yaamukhaani, olepa so: “Nsina nawe ti Yohani”.+ Vano atthu ootheene, yaahitikinihiwa vanceene. 64 Niinaano-ru, eyano ya Zakariya yaahitthukuwa, nlumi nawe naahitaphuwa, onapacerya olavula,+ omuttottopelaka Muluku. 65 Vano, anamwaattamanani awe yaahoova, nave ihapari iya saahilaleiwa muttetthe wootheene wa oYudeya. 66 Nave-tho, atthu ootheene yaiwa ihapari iya, yaanuupuwelela, anaikoha ariki: “Khino mwaana ola annuwa onrowa okhala exeeni?” Veekeekhai, owerya wa Yehova* waari ni mwaana owo.

67 Muluku aahinvaha ikuru soowaarya Zakariya, paapa awe mwaana owo, nto onapacerya olavula moolumo a Muluku, oriki: 68 “Ottottopeliwe Yehova,* Muluku a Isarayeli,+ okhala wiira oowoonela othunku ni oowoopola atthu awe.+ 69 Owo oonikumiherya moopoli oowerya,*+ okhumme nloko na Davidi, murumeyi awe,+ 70 ntoko aalavunle awe aarumeelaka maprofeta oowaarya a khalai,+ 71 wiira onoopole mmatatani mwa awanani ihu ni ootheene ale anninyokha.+ 72 Nave aamorele ikharari amuhavinre ahu ni uupuwele nivarihano nawe noowaarya.+ 73 Nivarihano nlo aamulaphenle awe Abrahamu, muhavinre ahu,+ 74 wiira onivahe eparakha ya onvarela muteko nihoovaka etthu, nuumala onoopola mmatatani mwa awanani ihu, 75 ni wiira nikhale oororomeleya ni a xariya ohoolo wawe, mahiku ahu ootheene. 76 Masi nyuwo, mwanaka, munrowa wiitthaniwaka profeta a Muluku Muulupalexa, okhala wiira munoorowa ohoolo wa Yehova,* wiira mulokiherye iphiro sawe,+ 77 wiira mwaasuwelihe woopowa atthu awe, aleveleliwaka itampi saya,+ 78 mwaha wa othunku wuulupale wa Muluku. Othunku owo onikhuma wiirimu, onrowa onimwaleela ntoko nsuwa ninkhuma voosiisu. 79 Nave onrowa waamwaleela atthu akilanthi mweepiphini ni vamuuttutthini woowiiva,+ wiira oneettiheke ephiro ya murettele”.

80 Nto mwaana owo aahinnuwa ni aahisareya ikuru sa Muluku. Nave aanikhala moothakoni mpakha nihiku aixonihenrye awe wa atthu a Isarayeli.