Aalepenle Awe Aefeso
6 Nyuwo anamwane, nwiiweleleke apapinyu ni amaminyu,+ moovarihana ni ele Apwiya aniphavela aya, okhala wiira eyo etthu yooloka vamaithoni va Muluku.* 2 “Mwaattittimiheke apapinyu ni amaminyu”.+ Ela ti yooruma yoopacerya erina natiri, oni: 3 “Wiira itthu siweettelekeni saana, ni mukhaleke mahiku manceene vathi-va”. 4 Nyuwo axipaapa, muhaanyoonyiheke aniinyu,+ masi mwaahuweke ni nwiixuttiheke+ muttharaka malakiheryo a Yehova.+
5 Nyuwo ipottha, nwiiweleleke ale munaavarela anyu muteko vathi-va.+ Nave mwaattittimiheke ni nwooveke ni murima wootheene, ntoko munimwiiwelela anyu Kristu. 6 Masi, khahiyo opaka eyo okathi muniwehiwa anyu paahi, wiira mwaasivelihe atthu.+ Ohiya-vo, mwiiweleleke ntoko ipottha sa Kristu ni mpakeke etthu Muluku oniphavela awe ni okumi anyu wootheene.+ 7 Mmurumeeleke pwiya anyu ni murima wootheene, ntoko munimurumeela Yehova,+ ohiya atthu. 8 Nyuwo moosuwela wiira khula etthu yooloka mutthu onipaka awe, okhale epottha aahiiso mutthu ootaphuwa, onrowa otthuveliwa ni Yehova.+ 9 Nave-tho, nyuwo axineene ipottha, nweettiheke saana ale ari ipottha sanyu, muhiwoopopiheke, maana moosuwela wiira nyuwo naawo, mookhalana Pwiya mmosa-ru wiirimu,+ yoowo ohinaathanla atthu.
10 Tivo, mwaakheleke owerya+ onikhuma wa Apwiya, okhala wiira ikuru saya ti suulupale. 11 Nwareke ikaruma sootheene sa ekhotto+ sinikhuma wa Muluku, wiira nweryeke wiilipiha ni okhootta miteko soolavilavi sa Diabo. 12 Hiyo khaninwana+ ni atthu, masi ninwana ni ikuvernu, ahooleli, ni anamalamulela a olumwenku ola ori mweepiphini, eyo piiyo, malaikha manceene ootakhala+ ari osulu. 13 Tivonto, nwareke ikaruma sootheene sa ekhotto sinikhuma wa Muluku,+ wiira naphiya nihiku nootakhala, nwerye ovilela ni mukhale oohittikinyeya, nuumala opaka itthu sootheene.
14 Tivo, mwiilipiheke, nwanre ene muyuununi esintu ya ekeekhai.+ Nware-tho yoowara ya eyuuma enikhapelela epeeto,* eri exariya.+ 15 Nave nware ixapattho, eyo piiyo, okhala oolikana ene para olaleya ihapari sooreera sa murettele.+ 16 Ohiya-vo, mukuxe nikula nuulupale na wiixaakihana,* ori waamini,+ wiira nwerye ottipiha mattheere* a mooro a Mutakhali.+ 17 Nave-tho, nwareke mmuru ekapaseeti, ori woopowa,+ ni mukuxe espaata ya* ikuru soowaarya, eyo piiyo, nuulumo na Muluku.+ 18 Khula okathi, nvekeleke+ moovarihana ni ikuru soowaarya sa Muluku, murumeelaka inamuna soovirikana sa mavekelo ni oxonttela.+ Tivo, mukhaleke oowehaweha, nave muhihiye oxonttela wiira akhaliheriwe ale oororomeleya.* 19 Nave-tho, mukivekeleleke wiira Muluku okivahe moolumo awe, wiira okathi kinlavula aka, kilavuleke kihoovaka etthu. Siiso kinoowerya osuweliha esiiri ya Muluku ya ihapari sooreera.+ 20 Muluku tokirumme olaleya ihapari sooreera.+ Ti maana aya kitthukweliwa aka mukhatteya-mu. Munvekeleke Muluku wiira kiwerye olaleya ihapari sooreera kihoovaka etthu, ntoko vanreerela aya.
21 Tiikhiko,+ munnihu oophentiwa ni murumeyi oororomeleya a Apwiya, onimooleelani ihaali saka sootheene, wiira nyuwo-tho musuwele miteko kinvara aka.+ 22 Ti etthu enikiiriha omuruma wiira orwe weiwo, wiira musuwele ihaali sahu ni wiira olipihe mirima sanyu.
23 Murettele, ophenta ni waamini onikhuma wa Muluku Tiithi, ni wa Pwiya Yesu Kristu, okhale ni anna ootheene. 24 Oreera murima wuulupale wa Muluku, okhale ni ootheene ale animphenta Pwiya ahu Yesu Kristu, mahiku ootheene.