Samuweli Oopacerya

15 Samuweli aahimuhimeerya Sawuli wiira: “Yehova ookiruma wiira koothanleni ntoko mwene a atthu awe, aisarayeli.+ Vano, nwiriyane ele Yehova onihimya awe.+ 2 Etthu onihimya awe Yehova a anakhotto, tiila: ‘Kinimwaakumiherya mulattu atthu a wAmaleki, mwaha wa etthu yaawiirenle aya atthu a Isarayeli, yaavirikanyaka okathi yaakhuma aya wExiitu.+ 3 Vano murowe, mwawiive atthu ootheene a wAmaleki,+ nave mwapwetexe+ itthu sootheene sirina aya. Muhiwoonele othunku, mwawiive+ alopwana ni athiyana, amiravo ni anamwane, ipooyi ni ipwittipwitthi, ikamelo ni apuuru’”.+ 4 Sawuli aahaathukumanya anakhotto ni aahaakontari oTelayimi. Yaahikhala anakhotto yeetta mwentto 200.000, ni alopwana 10.000 a oYuda.+

5 Sawuli ni anakhotto awe yaahivenya arowaka epooma ya wAmaleki, yiipithasa waattamela oxepani. 6 Sawuli aahaahimeerya akenewu+ wiira: “Mukhume eriyari ya atthu a wAmaleki, wiira kihoopwetexeni vamosa naawo.+ Tthiri mwaahiwooniherya ophenta woororomeleya atthu ootheene a Isarayeli,+ okathi yaakhumme aya wExiitu”. Siiso, akenewu yaahikhuma eriyari ya atthu a wAmaleki. 7 Nuumala-vo, Sawuli aahiwiiva atthu a wAmaleki+ okhuma oHavila+ mpakha oXuri,+ waattamela wExiitu. 8 Owo aahinvara Agagi,+ mwene a wAmaleki, omuhiya ori ene mukumi. Masi, atthu akina aahiwiiva ni espaata.*+ 9 Sawuli ni anakhotto awe, khiyaamwiivale Agagi ni khiyaivale ipwittipwitthi soolopwana ni soothiyana sooloka, ipooyi sooloka ni inama sooneneva, ni khiyaapwetenxe itthu sootheene sooreera.+ Awo khiyaaphavenle opwetexa itthu iyo. Masi yaahipwetexa mireerelo sootheene sahaarina efaita ni yahaaphavela aya.

10 Vano Yehova aahimuhimeerya Samuweli wiira: 11 “Koothanana mwaha wa omukhaliha Sawuli mwene, okhala wiira oohiya okitthara, nave khoneettela moolumo aka”.+ Samuweli aahixankiheya vanceene ni aahimukhuwelela Yehova ohiyu wootheene.+ 12 Okathi Samuweli aavennye awe voosiisu, wiira orowe akumane ni Sawuli, aahileeliwa wiira: “Sawuli aaronwe oKarmelo,+ eemexa weiwo nluku nuulupale wiira iivuwiheke.+ Nuumala-vo, aahivenya onarowa oXiligali”. 13 Okathi Samuweli aakumanne awe nuuwo, Sawuli aahihimya wiira: “Yehova ooreeliheni. Miyo koomaliherya moolumo a Yehova”. 14 Masi Samuweli aahimukoha wiira: “Nto xeeni kiniiwa aka wunla wa ipwittipwitthi ni wunla wa ipooyi okinyakulaka?”+ 15 Sawuli aahaakhula wiira: “Iyo yaakhinwe atthu a wAmaleki, okhala wiira anakhotto aka yaahikuxa ipwittipwitthi ni ipooyi sooneneva wiira anvahe mukuttho Yehova Muluku anyu. Masi itthu sikina saahanle noopwetexa”. 16 Samuweli aahimuhimeerya Sawuli wiira: “Mmaalele vaavo! Mukihiye kooleeleni etthu Yehova okihimenrye awe nsana ohiyu”.+ Sawuli aahaakhula wiira: “Mukileeleke!”

17 Samuweli aahithipelela olavula oriki: “Kiira mwaaniixoona ohikhala etthu+ okathi mwaakhalihiwe anyu muhooleli a mahimo a atthu a Isarayeli? Nave, okathi mwaathanliwe anyu ni Yehova wiira mukhale mwene a atthu a Isarayeli,+ kiira mwaaniixoona ohikhala etthu? 18 Muhoolo mwaya, Yehova aahoorumani wiira: ‘Murowe mwawiivakase anatampi ale, atthu a wAmaleki.+ Mwawane naawo mpakha waamala-maliha’.+ 19 Vano xeeni muhiiwelenle anyu moolumo a Yehova? Nyuwo mookuxa voohiphiyeriwa itthu nwaakhale anyu awanani anyu,+ ni moopaka etthu yoohiloka vamaithoni va Yehova!”

20 Sawuli aahimuhimeerya Samuweli wiira: “Masi miyo kihiiwelela moolumo a Yehova! Kaahirowa ovara muteko Yehova aakirumme awe, koomuruuha Agagi, mwene a wAmaleki, nave kihaapwetexa atthu a wAmaleki.+ 21 Masi anakhotto aka aakuxa ipwittipwitthi ni ipooyi awaakhale aya awanani aya. Awo aakuxa itthu sooreerexa eriyari ya itthu saahimmwale wiira saahaana opwetexiwa, wiira anvahe mukuttho Yehova, Muluku anyu, oXiligali”.+

22 Samuweli aahihimya wiira: “Niireke Yehova onnisiveliwa ni soovaha para opahiwa vamosa ni mikuttho,+ ovikana wiiwelela moolumo a Yehova? Musuweleke wiira wiiwelela ti wooreera ovikana mukuttho,+ nave owiriyana ti wooreera ovikana ipwittipwitthi sooneneva.+ 23 Tthiri ohiiwelela+ onlikana ni etampi ya waaxerya ehako,+ nave wiikuxererya onlikana ni orumeela owerya wa maxintta ni waakokhorela amuluku eethiru.* Okhala wiira mookhootta wiiwelela moolumo a Yehova,+ nave owo ohookhoottani ntoko mwene”.+

24 Sawuli aahimuleela Samuweli wiira: “Koottheka, tthiri nkiiwelenle yooruma ya Yehova ni moolumo anyu, okhala wiira kaahiwoova atthu, ni kaahitthara saahimya aya. 25 Vano, xontte mukilevelele etampi aka, nave nrowe hoothe wiira kamukokhorele Yehova”.+ 26 Masi Samuweli aahimuhimeerya Sawuli wiira: “Nkinrowa ni nyuwo, okhala wiira mookhootta moolumo a Yehova. Nave Yehova khoniphavela-tho wiira mukhale mwene a atthu a Isarayeli”.+ 27 Okathi Samuweli aarukununwe awe wiira oroweke, Sawuli aahinvarela mukerekhere mwa nlaya nawe nahaarina miyoono, masi nlaya nlo naahikhereya. 28 Samuweli aahimuhimeerya wiira: “Olelo, Yehova oowaakhani omwene wIsarayeli, onrowa onvaha mukhwiinyu, ori oolokexa woovikanani nyuwo.+ 29 Ohiya-vo, Muluku Muulupalexa a wIsarayeli+ khonootha+ aahiiso khonturuka muupuwelo awe. Tthiri Owo khahiyo pinaatamu wiira oturuke muupuwelo awe”.+

30 Nto, Sawuli aahihimya wiira: “Miyo koottheka. Masi, xontte, mukittittimihe ohoolo wa ahooleli a atthu aka, ni ohoolo wa atthu a Isarayeli. Nrowe hoothe, wiira kamukokhorele Yehova, Muluku anyu”.+ 31 Vano, Samuweli aahitthika ni Sawuli, nto Sawuli aahimukokhorela Yehova. 32 Samuweli aahihimya wiira: “Mukiruuhele Agagi, mwene a wAmaleki”. Nto, Agagi aahirwa oovaka* okhala wiira aanuupuwela so: ‘Mweekeekhai woova okhwa woomala’. 33 Masi, Samuweli aahihimya wiira: “Siisaale espaata anyu ewiirinhe aya athiyana anceene ohikhalana anamwane, siiso-tho maama anyu khonrowa okhalana anamwane”. Moottharelana, Samuweli aahimwiikitthasa Agagi ipetaaso sene, ohoolo wa Yehova, oXiligali.+

34 Nuumala-vo, Samuweli aahirowa oRama, nave Sawuli aahirowa owannyawe oXibeya. 35 Samuweli khaatthikenle-tho onweha Sawuli mpakha okhwa wawe, okhala wiira Samuweli aahiriipiwa murima vanceene mwaha wa Sawuli.+ Nave Yehova aahithanana mwaha woomukhaliha Sawuli mwene a Isarayeli.+