Silempwale ni Yohani
8 12 Yesu aahilavuna-tho ni atthu awo, oriki: “Miyo ka muthuko wa olumwenku.+ Ole onikitthara, tthiri khonrowa weettaka mweepiphini, masi onookhalana muthuko+ oniphwanyiha okumi”. 13 Vano afarisi yaahimuhimeerya Yesu wiira: “Nyuwo muniikhalela onamoona mmensinyu. Onamoona anyu khahiyo weekeekhai”. 14 Yesu aahiwaakhula oriki: “Hata kiikhalelaka onamoona mmensaka, onamoona aka ti weekeekhai, maana kinnisuwela kikhumme aka ni kinrowa aka.+ Masi nyuwo khamunisuwela kikhumme aka, nnakhala kinrowa aka. 15 Nyuwo muniphukela muttharaka muupuwelo wa atthu.+ Miyo nkinimphukela mutthu. 16 Hata kiphukelaka, ophukela waka ti weekeekhai, okhala wiira nkikhanle mekhaka, masi Tiithi, yoowo okirumme, ori ni miyo.+ 17 Nave-tho, Munlamuloni mwanyu voolempwa wiira: ‘Yakhala anamoona anli, mwaha owo ti weekeekhai’.+ 18 Miyo kinniikhalela onamoona mmansaka, nave Tiithi, yoowo okirumme, onnikikhalela onamoona”.+ 19 Vano awo yaahimukoha wiira: “Tiithi inyu ori woowi?” Nto Yesu aahiwaakhula oriki: “Nyuwo khamunikisuwela, nnakhala khamunimusuwela Tiithi aka.+ Vaakhanle wiira munnikisuwela, nave mwammusuwela Tiithi aka”.+ 20 Yesu aalavunle moolumo ala ori ene opuro waari ikaaxa saaheliwa musurukhu,+ okathi iixuttiha awe mutemplo. Masi, khuuvo anvanre, okhala wiira ewoora awe khiyaaphiyale.+
21 Vano Yesu aahaahimeerya-tho wiira: “Miyo kinoorowa, nto nyuwo munookaavya. Masi munimookhwa nlelo murina ene etampi.+ Opuro kinrowa aka, nyuwo khamuniwerya ophiya”.+ 22 Ayuda yaahipacerya ohimya wiira: “Xeeni onihimya awe wiira: ‘Opuro kinrowa aka, nyuwo khamuniwerya ophiya’? Niireke onrowa wiixiiva?” 23 Yesu aahaahimeerya-tho wiira: “Nyuwo mwa atthu a vathi vaava, masi miyo kinikhuma osulu.+ Nyuwo mwa atthu a olumwenku ola, miyo nkihiyo a olumwenku ola. 24 Tivo, koohimenryaakani wiira: Nyuwo munimookhwa nlelo murina ene etampi. Tthiri mwaahikupaliki wiira miyo ti yoole aakela orwa, weeso munimookhwa nlelo murina ene etampi”. 25 Nto awo yaahimukoha ariki: “Nyuwo mwa pani?” Yesu aahiwaakhula oriki: “Kinihonona okathi aka mahala ene kaalavulaka ni nyuwo. 26 Miyo kihaana itthu sinceene soohimya mwaha wa nyuwo ni sookhala myaha sinceene kinrowa aka ophuka. Mweekeekhai, Ole okirumme onnilavula ekeekhai. Nave, miyo kinnilavula moolumwenkuni itthu sootheene kimwiiwale aka”.+ 27 Atthu awo khiyaasuwela wiira aamuhimya Tiithi awe a wiirimu. 28 Yesu aahaahimeerya wiira: “Nuumala omweemexa* Mwaana a Mutthu,+ nto nyuwo munookisuwela.+ Nave munoosuwela wiira nkinipaka etthu voowiikuxererya,+ masi kinlavula itthu Tiithi okiixuttihale awe. 29 Ole okirumme ori ni miyo. Owo khokihiyale mekhaka, okhala wiira okathi wootheene kinnivara itthu sinimusivela”.+ 30 Okathi aalavula awe itthu iya, atthu anceene yaanimwaamini.
31 Nto Yesu aahilavula ni ayuda ale yaamukupali, oriki: “Nyuwo mwaahihiye otthara moolumo aka, munookhala tthiri awiixutti aka. 32 Nave munoosuwela ekeekhai,+ nto ekeekhai eyo enimootaphulani”.+ 33 Awo yaahimukoha yiiraka: “Hiyo na nloko na Abrahamu ni khanitonko okhala ipottha sa mutthu. Munihimya sai wiira: ‘Munootaphuliwa’?” 34 Vano Yesu aahiwaakhula oriki: “Tthiri, kinooleelani ekeekhai wiira, ole onimakela opaka etampi, onnikhala epottha ya etampi.+ 35 Nave-tho, epottha khenikhala vatthokoni mahiku ootheene. Masi mwaana, onnikhala vatthokoni mahiku ootheene. 36 Tivo, Mwaana ootaphulani, nyuwo munookhala ootaphuwa tthiri. 37 Miyo koosuwela wiira mwa nloko na Abrahamu. Masi nyuwo munniphavela okiiva, okhala wiira khamuneemererya itthu siniixuttiha aka. 38 Miyo kinilavula itthu koonale aka okathi kaari aka ni Tiithi aka,+ masi nyuwo munipaka itthu mmwiiwale anyu tiithi inyu”. 39 Nto awo yaahimwaakhula Yesu, ariki: “Tiithi ahu ti Abrahamu”. Vano Yesu aahaahimeerya wiira: “Vaakhanle wiira mwa anamwane a Abrahamu,+ mwaarowa ottharaka ntakiheryo na Abrahamu. 40 Masi vano nyuwo muniphavela okiiva yoomi, koohimenryeni ekeekhai kimwiiwale aka Muluku.+ Abrahamu khaarowa opaka etthu siiso. 41 Nyuwo munivara miteko sa tiithi inyu”. Awo yaahimuhimeerya Yesu wiira: “Hiyo khanihiyo anamwane ooraruiwa.* Nrina Tiithi mmosa paahi, Muluku”.
42 Nto Yesu aahaaleela wiira: “Vaakhanle wiira Muluku tori Tiithi inyu, nyuwo mwaamukiphentaka,+ okhala wiira miyo kihoorwa-va, kikhumaka wa Muluku. Nkirwiiye kihirummwale, masi Owo tokirumme.+ 43 Nyuwo khamuniphavela weemererya itthu siniixuttiha aka, tivonto, khamuniwerya wiiwexexa moolumo aka. 44 Diabo tori tiithi inyu, nave nyuwo muniphavela opaka itthu sinimusivela tiithi inyu.+ Okhuma okathi aamoothenrye awe Muluku,*+ owo ookhala nawiive ni oohiya weettela ekeekhai, okhala wiira ekeekhai khenimusivela. Okathi onootha awe, onilavula itthu sinikhuma vamurimani vawe, maana owo nawoothe ni topacenrye wootha.+ 45 Masi miyo kinooleelani ekeekhai, nto nyuwo khamunikikupali. 46 Ti pani a nyuwo okhanle oowooniherya wiira koopaka etampi? Nto kaalavulaka ekeekhai, xeeni muhinikikupali anyu? 47 Ole ori a Muluku, onniiwa moolumo a Muluku.+ Nyuwo khamuniiwa, okhala wiira khamuhiyo a Muluku”.+
48 Ayuda yaahimukoha ariki: “Niireke toko nnimootha, naahimyaka wiira nyuwo mwa musamariya,+ nave mookhalana nlaikha nootakhala?”+ 49 Yesu aahiwaakhula oriki: “Miyo nkirina nlaikha nootakhala, masi kinnimuttittimiha Tiithi aka. Nyuwo munookiveeha. 50 Miyo nkiniphavela wiivuwiha mmansaka.+ Muluku toniphavela wiira kivuwihiwe, nave Owo tori mphuki. 51 Tthiri, kinooleelani ekeekhai wiira, akhala mutthu oneettela moolumo aka, khonikhala-khala okhwaaka”.+ 52 Nto ayuda yaahimuhimeerya Yesu wiira: “Vano noosuwela wiira mookhalana nlaikha nootakhala. Abrahamu ohookhwa, nave-tho maprofeta ahookhwa, masi nyuwo munihimya wiira: ‘Akhala mutthu oneettela moolumo aka, khonikhala-khala okhwaaka’. 53 Niireke nyuwo mwa muulupale onvikana tiithi ihu Abrahamu? Owo ohookhwa, nave-tho maprofeta ahookhwa. Nyuwo munuupuwela wiira mwa pani?” 54 Yesu aahiwaakhula oriki: “Vakhala wiira kiniivuwiha mmansaka, ovuwa waka ti weethiru. Tiithi aka tonikivuwiha,+ yoowo munimuhimya anyu okhala Muluku anyu. 55 Nyuwo khamunimusuwela,+ masi miyo kinnimusuwela.+ Kaahimmye wiira nkinimusuwela, kaarowa okhala nawoothe, ntoko nyuwo. Miyo kinnimusuwela ni kinneettela moolumo awe. 56 Tiithi inyu Abrahamu, aanilipelela otteeliwe ene murima, nihiku kaakela aka orwa. Owo aahiweha mmuupuweloni mwawe, ni aahitteeliwa murima”.+ 57 Nto ayuda yaahimukoha wiira: “Nyuwo nlelo khamurina iyaakha 50, nto vaniweryaneya sai onweha Abrahamu?” 58 Yesu aahiwaakhula wiira: “Tthiri, kinooleelani ekeekhai wiira, Abrahamu ohinatthi oyariwa, miyo kiira kikhanle ene”.+ 59 Vano, atthu ale yaahittotta maluku wiira anvonyakase Yesu. Masi owo aahiipitha, okhuma mutemplo.