Miruku
9 Ankhili eekeekhai anlikana ni mutthu otenke empa awe,
Awo aapaka ipilaari saya 7.
2 Awo aahita inama soowaatta,
Aalikanyiha eviinyu,
Nave aalokiherya meesa aya.
3 Awo ahaaruma arumeyi aya athiyana,
Orowa mapuro oorakamela osulu a epooma okhuwela wiira:+
4 “Ootheene ale ahinisuwela itthu sinceene arwe nno!”
Ankhili annaahimeerya ale ahiniwerya wuupuwela saana wiira:
5 “Murwe, mukhuure ephaawu aka,
Ni nwurye eviinyu aka yoolokiheriwa.
6 Muhiye ohisuwela wanyu itthu sinceene wiira mukhale mukumi.+
Mutthareke ephiro ya osuwela”.+
7 Ole onimuttaruxa mulipa-ooveeha, onimwiiruuhela wuuliwa muru,+
Nave ole onimuttaruxa mutthu ootakhala, onimwiikumiherya maxakha.
8 Muhimuttaruxe mulipa-ooveeha, mwiira siiso, owo onimoonyokhani.+
Mmuttaruxe mutthu a ankhili, nto owo onimoophentakani.+
9 Mmwiixuttiheke mutthu a ankhili, vano owo onoowuncererya ankhili awe.+
Mmwiixuttiheke naxariya, nto owo onimuncererya osuwela wawe.
10 Etthu yoopacerya wiira mutthu okhalane ankhili,+ ti omuttittimiha vanceene Yehova,
Nave mwamusuwela Muluku Oowaarya,+ munookhalana ankhili.
11 Mwaha wookhaliheriwa ni miyo mahiku anyu anrowa okhala oowaatta,+
Nave iyaakha sa okumi anyu sinimuncereriwa.
12 Mwakhala mutthu a ankhili, munimwiiphwanyiha mureerelo mmansinyu.
Masi, mwakhala mutthu ooveeha, ti nyuwo munrowa wiikumiherya maxakha.
13 Muthiyana mulolo toonyakulihana.+
Owo khorina miruku ni khonisuwela etthu.
14 Owo onnikilaathi vamukhora wa empa awe,
Vakhaterani, opuro woorakamela osulu wa epooma,+
15 Onawiihana atthu anivira mustaraatani,
Ale anivira mphironi oriki:
16 “Ootheene ale ahinisuwela itthu sinceene, arwe nno!”
Owo onnaaleela ale ahiniwerya wuupuwela saana wiira:+
17 “Maasi oowiiyiwa, toosiva,
Nave yoolya enilyiwa wiiphiini, ti yootepa osiva”.+