Miteko sa Arummwa
14 Vano wIkoonio, Paulo ni Baarnaba yaahikela musinagoga* mwa ayuda. Nave yaahilavula saana, mpakha muttitthi muulupale wa ayuda ni akereku waamini. 2 Masi ayuda ale yahaaminni, yaahaawoka* ale yahaakhanle ayuda, khuwiiriha waanyokha anna.+ 3 Siiso, awo yaahiviriha okathi munceene opuro ole. Yehova* aahaavaha owerya wiira alavuleke ahoovaka etthu. Nave, aahaarumeela wiira apakeke miiriirya ni miteko sootikiniha, wiira alipiherye ihapari yaalaleerya aya. Ehapari eyo, yaahimya oreera murima wuulupale wa Muluku.+ 4 Nto, atthu a epooma ele yaahikawanyeya. Akina yaakhaliherya ayuda, nave akina yaamukhaliherya Paulo ni Baarnaba. 5 Atthu yahaakhanle ayuda, vamosa ni ayuda ni anamalamulela aya, yaahiiwanana omuhaaxa Paulo ni Baarnaba ni waavonyakasa maluku.+ 6 Vano, arummwa ale yaahiiwa etthu eyo, nto yaahitthyawa arowaka ipooma sa oLikawonia, siniihaniwa oLiistra ni oDerbe, vamosa ni mittetthe soowaattamela.+ 7 Weiwo-tho, awo yaanilaleya ihapari sooreera.
8 Epooma ya oLiistra, aahikhala mulopwana mmosa aarakanle metto. Owo aayariwe oorakala ene, nto khaatonko weetta. 9 Vano mulopwana owo aahikilaathi onanwiriyana Paulo olavulaka. Paulo aahinwehexexa oratteene ni aahoona wiira mulopwana ole aahikhalana waamini ni aanikupali wiira ampenuxiwa.+ 10 Nto Paulo aahilavula ni nsu noowiiwanyeya, oriki: “Mweemele!” Siiso, mulopwana ole aahitupha, eemela, onapacerya weetta.+ 11 Okathi muttitthi wa atthu woonale aya ele Paulo aapanke awe, waahikhuwela ni nttaava na eLikawonia, wiiraka: “Amuluku ahiikhaliha ntoko atthu ni aanikhuruwela!”+ 12 Vano awo yaahipacerya omwiihana Baarnaba, Zeu, masi Paulo yaamwiihana Herme, okhala wiira taalavula vanceene. 13 Etemplo ya muluku Zeu, yaahaattamela mikhora sa epooma. Vano namukuttho a muluku Zeu, aahiruuha vamukhora wa epooma, ipooyi ni ikhara sa ifilori. Namukuttho ole vamosa ni atthu, yaaniphavela omuhelela mikuttho Paulo ni Baarnaba.
14 Masi, okathi arummwa Baarnaba ni Paulo yaasuwenle aya eyo, yaahikhera malaya aya ni yaahirowa vaari muttitthi, anakhuwela yiiraka: 15 “Alopwana, xeeni munipaka anyu itthu iya? Hiyo-tho na atthu ntoko nyuwo. Nave ninnihaawa ntoko nyuwo.+ Hiyo nnoolaleeryani ihapari sooreera, wiira muhiye itthu iya seethiru, mmukokhoreleke Muluku mukumi, yoowo opattunxe erimu, elapo, ephareya ni itthu sootheene sinikhala mapuro awo.+ 16 Khalai, owo aaheemererya wiira maloko ootheene yeetteleke iphiro saya.+ 17 Hata vari siiso, owo aahiisuweliha wa atthu awo,+ owiirelaka itthu sooreera, aavahaka epula ni oruwerya vanceene.+ Nave aahaavaha yoolya yinceene ni aahaatteeliha murima”.+ 18 Nnaamwi yaalavunle itthu iye, arummwa ale yaahaana wiimananiha vanceene, wiira yaahiihe atthu ale waahelela mukuttho.
19 Vano, yaahiphiya ayuda yaakhuma wAntiyokiya ni wIkoonio, anapacerya waawoka* atthu.+ Nto awo yaahinvonyakasa maluku Paulo, ampurulela ota wa epooma, yuupuwelaka wiira aahikhwa.+ 20 Masi okathi awiixutti yaamurukurenrye aya, Paulo aaheemela, onarowa opooma. Mmeeloni mwaya, aahikhuma ni Baarnaba anarowasa oDerbe.+ 21 Nuumala olaleya ihapari sooreera epooma ele ni waapaka awiixutti anceene, awo yaahitthikela oLiistra, wIkoonio ni wAntiyokiya. 22 Weiwo, awo yaahaalipiha awiixutti,+ yaatumereryaka wiira alipiheke waamini waya. Nave yaahaahimeerya wiira: “Nihaana ohaawa vanceene nihinatthi okela Moomweneni mwa Muluku”.+ 23 Ohiya-vo, awo yaahaathanla axitokweene khula muloko.+ Yaahivekela, yaahitthukwa+ ni yaahaavahererya mmatatani mwa Yehova,* yoowo yaamwaamini aya.
24 Nuumala-vo, yaahirowa oPisiidia, khuphiya oPanfiilia.+ 25 Nave, vaamanle aya olaleya nuulumo na Muluku oPerxe, yaahikhuruwela wAtaliya. 26 Nto yaahiwela ekalawa anatthikela wAntiyokiya, weiwo anna yanvekenle aya Muluku wiira omooniherye Paulo ni Baarnaba oreera wawe murima wuulupale, wiira awerye ovara muteko, yoowo vano yaamalinhe aya.+
27 Vaaphiyale aya, yaahithukumanya muloko wootheene, anahimya itthu sinceene Muluku aapanke awe, aarumeelaka awo. Nave, yaahihimya moota Muluku aatthukulenle awe mukhora atthu yahaakhanle ayuda, wiira yaamini.+ 28 Nto, yaahikhala ni awiixutti okathi munceene.