Miteko sa Arummwa
27 Vano, okhala wiira vaahiiwananiwa wiira nrowe wItaalia+ ni pakiti, Paulo vamosa ni atthu akina yaavariwe, yaahivahereriwa mukhulupale a anakhotto aihaniwa Julio, a ekurupu ya atoropa yaihaniwa Augustu. 2 Naahinwela pakiti a wAdramiti, yoowo aarowa iportu* sa wAsia. Nuumala-vo, naahikhuma. Aristarko+ yoowo aari a oTesaloonika, eprovinsia ya oMasedonia, aari ni hiyo. 3 Mmeeloni mwaya, naahiphiya oSiidoni. Nto, mukhulupale a anakhotto Julio, aahimureerela murima Paulo ni aahimweemererya orowa waaxukurya apatthani awe, wiira emukhapeleleke.
4 Naakhumale ahu weiwo, naahirowa esisiro* ya oKiipero, weiwo epheyo yaanikakhela aya. 5 Nuumala-vo, naahilapuwa ephareya yoowiixerya niviraka oSilisia ni oPanfiilia, niphiya epoortu ya oMira, elapo ya oLisia. 6 Weiwo, mukhulupale a anakhotto aahimphwanya pakiti a wAlexandria, yoowo aarowa wItaalia. Nto, aahiniweliha pakiti owo. 7 Nuuvira mahiku manceene, neettaka vakhaani-vakhaani ni pakiti, naahiphiya oKinido ni mixankiho. Mwaha wa epheyo yaanikhoottiherya orowa ohoolo, tivo naahivira oSalimona, nuumala-vo naaheetta ni pakiti nrowaka oKereta wiira nitthyawe epheyo. 8 Nto pakiti ahu aaheetta ni mixankiho okerekhere wa ephareya, khuphiya opuro wiihaniwa Iportu Sooreera, yoowo waari waattamela epooma ya oLaseya.
9 Yaahivira mahiku manceene, nto vaanoopiha weetta mphareya ni pakiti, okhala wiira otthukwa* wa Nihiku na Oleveleliwa Itampi+ waahivira. Tivo, Paulo aahaalopola 10 atthu ale, iiraka: “Apatthani, kinoona wiira mukwaha ola, onookumiherya maxakha. Nave itthu sinceene sinoohononeya, ohiya paahi miritti ni pakiti ola, masi-tho hiyo pooti okhwa”. 11 Masi, mukhulupale a anakhotto aahimwiiwelela mulipa-aamweettiha pakiti ni mwaneene pakiti ole, ohiya wiiwelela ele Paulo aahimya awe. 12 Okhala wiira khivaareerela okhala epoortu ele eyiita, anamunceene yaahivaha miruku wiira nikhume opuro ole, noone vakhala wiira vanweryaneya ophiya oFeniki, wiira navirihe eyiita weiwo. Epoortu eyo yaari oKereta, oluluwanya mpantta onikhuma nsuwa.
13 Okathi epheyo yaakhuma osuuli* yaapacenrye aya woopa vakhaani-vakhaani, awo yuupuwela wiira yanwerya ophiya oFeniki. Nto, yaahimutaphula nankura, anavira oKereta, waattamela okerekhere wa ephareya. 14 Masi, nuuvira okathi vakhaani, yaahoopa epheyo yuulupale eniihaniwa Eurakiilo. 15 Okhala wiira pakiti aanikakhiwa vanceene ni epheyo, hiyo khinaawerya omweettiha nrowaka ohoolo. Siiso naahimuhiya opuruliwaka. 16 Naahivira okerekhere wa ephareya, nittiyeleliwaka ni esisiro yaamukhaani eniihaniwa Kauda. Hata vari siiso, vaahinixankiha okhapelela ekalawa* yaamukhaani yaari ottuli wa pakiti. 17 Masi, ale yaamweettiha pakiti, yaahiweliha ekalawa ele mpakitini, nuumala-vo yaahimutthukwa pakiti ni mikhoyi wiira olipe, maana yaanoova wiira aarowa ophara vamihaavani sa oSirti.* Nto awo yaahuukulula eveela,* vano pakiti owo aahipacerya weettihiwa ni epheyo. 18 Mmeeloni mwaya, epheyo yaanitepa onimana ni ikuru, tivo atthu yaahipacerya orihela miritti mphareya. 19 Nto nihiku na neeraru, awo yaahirihela mmaasini ni matata aya, itthu sikina sa pakiti.
20 Vano, yaahivira mahiku manceene nihoonaka nsuwa nnakhala itheneeri, nave epheyo yuulupale yaamutepa onimana. Nto nlipelelo nootheene naarina ahu noowi naamoopowa, naahipacerya omala-mala. 21 Nuumala ovira mahiku manceene alopwana ale ahilyaaka etthu, Paulo aaheemela eriyari aya, onahimya wiira: “Alopwana, nyuwo mwaahaana okiwiriyana okathi kaahimmye aka wiira nihikhume oKereta, nto khinaarowa ohaawa siisa, nnakhala khinaarowa orihela mmaasini mireerelo sahu.+ 22 Vano, kinooleelani wiira mulipihe murima, maana khuuvo mutthu mmosa a nyuwo onrowa okhwa, masi pakiti paahi tonrowa ohononeya. 23 Ohiyu ola, Muluku kinimurumeela aka ni kinimukokhorela aka, ooruma nlaikha nawe,+ neemela ohoolo waka, 24 nnahimya wiira: ‘Paulo, muhoove. Muhaana orowa ohoolo wa Seesari,+ tthiri Muluku onoowoopolani, vamosa ni ootheene ale murina anyu mpakitini’. 25 Tivo, alopwana, mulipihe murima, okhala wiira miyo kinnimukupali Muluku, wiira vanimwiiraneya ntoko kihimeeriwe aka. 26 Masi, hiyo nihaana oriheliwa mukerekhere mwa esisiro emosa”.+
27 Nto nuumala oviriha mahiku 14, othana ni ohiyu, nimaniwaka ni epheyo, ephareya ya wAdria, ohiyu eriyari, alipa yaamweettiha pakiti, yaahipacerya waanyiherya wiira yaanaattamela etthaya. 28 Vaamanle aya ophima, yaahiphwanya wiira wiixerya waya waari imeeturu 36.* Nuumala weetta vakhaani, yaahiphima-tho, aphwanya imeeturu 27.* 29 Nto yoovaka omana mwala, yaahaarihela anankura axexe ottuli wa pakiti, ananlela wiira vaaxiiye. 30 Masi ale yaamweettiha pakiti, yaaheererya okhuma mpakitini. Awo yaahikuruxela ekalawa yaamukhaani mphareya, yoothereryaka wiira yaaphavela waarihela anankura ohoolo wa pakiti. 31 Vano Paulo aahimuhimeerya mukhulupale a anakhotto ni atoropa wiira: “Alopwana ala yaakhuma-ru mpakitini-mu, nyuwo khamunrowasa woopowa”.+ 32 Okathi yoowo, atoropa yaahikwasa mikhoyi sa ekalawa eyo, khuhiya emorelaka mmaasini.
33 Nto vahalaka oxa, Paulo aahaatumererya atthu ootheene wiira elye etthu, oriki: “Olelo, aniira mahiku 14 munilipelela anyu vanceene, nave khamulyiiye etthu. 34 Vano kinootumereryani wiira mulyeeke, wiira mukhale saana, maana khuuvo a nyuwo onrowa omora nnakhala ekharari emosa mmuru mwawe”. 35 Nuumala olavula siiso, aahikuxa ephaawu, aahimuxukhuru Muluku ohoolo wa atthu ootheene, aahikawanya, onakhuura. 36 Nto ootheene aya yaahilipiha murima, anapacerya olya. 37 Pakiti ole, naari atthu 276. 38 Nuumala olya mpakha ovona, yaahivukula miritti mpakitini-mme, arihelaka etiriku mphareya.+
39 Voosiisu, ale yaamweettiha pakiti, khiyaasuwela opuro yaari aya,+ masi yaahiweha nipuro noohiixa na ephareya, nto yaaniphavela omweemexa pakiti weiwo, vakhala wiira vanweryaneya. 40 Tivo yaahikwasa mikhoyi sa anankura, yaahiya amorelaka mphareya, nave okathi ene yoowo, yaahitaphula mikhoyi sa eleemi yeettihaniwa pakiti. Nuumala-vo, yaahirukunuxela opheyoni eveela ya* ohoolo, enarowa ophareya. 41 Nuumala pakiti ophiya opuro waari mihaava sinceene, awo yaahimweettiha vamihaavani, nto mpantta wa ohoolo waahiphara, ohinattikinyeya. Masi mawimpi yaanimana mpantta wa ottuli wa pakiti ole, anampwexakasa.+ 42 Siiso, atoropa yaahuupuwela owiiva maperesu, wiira ahituphele mmaasini, etthyawe. 43 Masi mukhulupale a anakhotto aaniphavela omoopola Paulo, tivo khaaweemerenrye atoropa ale opaka ele yaaphavela aya. Nave aahaaruma ale yaasuwela okata wiira atuphele mmaasini, apaceryeke orowa ota. 44 Nto ale yaarowa ohala, yaamwaattharaka ottuli: akina awenle ene ithaapwa, akina ipetaaso sa pakiti ole. Tivonto, ootheene aya yaahiphiya vatthayani, ari ene akumi.+