Wahala a Nenli
8 Nuumala iyaakha 20 Salomooni aavirinhe awe otekaka empa ya Yehova ni empa awe,+ 2 Salomooni aahiteka-tho ipooma aavahiwe awe ni Hirami,+ aahiya aisarayeli* akhalaka memmo. 3 Muhoolo mwaya, Salomooni aahirowa oHamati-Soba, okuxa epooma eyo. 4 Nuumala-vo, owo aahilipiha epooma ya oTadimori yeeyo yaari moothakoni, ni ipooma sootheene saari arumasiya+ seiyo aatenke awe oHamati.+ 5 Owo aahiteka-tho oBethi-Horoni+ wa Ota ni oBethi-Horoni wa Ohitto,+ ipooma soolipihiwa saarina ixiri, mikhora ni itaranka. 6 Nave aahiteka-tho oBaalathi+ vamosa ni ipooma sootheene saari arumasiya a Salomooni, ipooma sa ikaaro saapuruliwa ni inama,+ ipooma sa anakhavalo ni khula etthu Salomooni aaphavela awe oteka oYerusalemu, oLiibano ni ilapo sootheene aalamulela awe.
7 Vano, atthu ootheene yaahanle a ahiti, amori, aperizi, ahivi ni ayebusi,+ yaawo yahiirela mpantta atthu a Isarayeli,+ 8 yaari a osuulu wa atthu yaakhala elapo ele, yaawo aisarayeli yahaapwetenxe aya,+ mwene Salomooni aahaakuxa wiira avareke muteko wookhanyereriwa mpakha olelo-va.+ 9 Masi Salomooni khaakhalinhe aisarayeli ipottha wiira avareke muteko awe,+ okhala wiira awo yaari anakhotto awe, maxeefi a anamakhaliherya awe, maxeefi awe a ikaaro saapuruliwa ni inama ni anakhavalo.+ 10 Yaahikhala maxeefi 250 a ahooleli, yaawo yaaweherya muteko a mwene Salomooni. Awo yaari makapataaxi a anamuteko.+
11 Nave-tho, Salomooni aahimukuxa mwaana mwaamuthiyana a Farawo+ epooma ya Davidi, omuroiha empa aamutekenle awe,+ maana aahihimya wiira: “Nnaamwi ori ene mwaaraka, khonrowa okhalaka empa ya Davidi, mwene a wIsarayeli, okhala wiira mapuro naari aya Nivuku na Yehova toowaarya”.+
12 Moottharelana, Salomooni aahinvaha Yehova mikuttho soopahiwa,+ valtaari a Yehova,+ yoowo aamutenke awe ohoolo wa mukhora.+ 13 Owo aanitthara eprokraama ya khula nihiku ni aanivaha mikuttho ottharaka yooruma ya Moise ya isaabadu,+ khula mweeri musya,+ ni ifesta saathanliwe opakiwa ikwaha tthaaru vamwaakhani,+ eyo piiyo, Efesta ya Iphaawu Soohiheliwa Eferemento,+ Efesta ya Isumana,+ ni Efesta ya Maxaxa.+ 14 Nave-tho, ottharaka yooruma ya paapa awe, Davidi, aahithanla ekurupu ya anamukuttho+ wiira evareke muteko aya, alevi wiira akhaleke opuro aya, amuttottopelaka+ Muluku ni arumeelaka ohoolo wa anamukuttho ettharaka eprokraama ya khula nihiku. Nave aahithanla ikurupu sa makwarta wiira siweheryeke khula mukhora,+ okhala wiira eyo ti etthu aarumme awe Davidi, mulopwana a Muluku eekeekhai. 15 Awo khiyaahiyale otthara yooruma mwene aavanhe awe anamukuttho ni alevi, yaavarihana ni myaha sootheene, aahiiso yaavarihana ni arumasiya.* 16 Vano muteko wootheene wa Salomooni waahitthokiheya oratteene, okhuma nihiku yaapaceriwe aya otekiwa alisenso a empa ya Yehova+ mpakha omalihiwa. Siiso empa ya Yehova yaahimalihiwa.+
17 Okathi ene yoowo Salomooni aahirowa wEsiyoni-Geberi+ ni wElothi+ mukerekhere mwa ephareya, elapo ya wEdomi.+ 18 Hirami+ aahaaruma arumeyi awe wiira amuroihele apakiti ni atthu yaasuwela oweettiha oratteene apakiti awo. Awo yaahirowa vamosa ni arumeyi a Salomooni wOfiri+ ni yaahikuxa weiwo italento 450 sa eweero,+ amuroihela mwene Salomooni.+