Isaalimu
Esaalimu enimulavula Salomooni.
72 Khoo Muluku, mmwiirihe mwene ophukaka milattu ntoko nyuwo,
Munvahe mwaana a mwene exariya anyu.+
2 Owo owaakihe atthu anyu ni exariya,
Ni ale oowiiyeviha, ottharaka exariya.+
3 Miyaako saaruuhele murettele atthu anyu,
Nave mattumuxa aruuhe exariya.
4 Mwene owaakihe* atthu oowiiyeviha,
Owoopole anamwane a atthu oohaawa,
Nave aapwetexe atthu anaahasula.+
5 Awo anrowa owoovakani okathi wootheene ninkhala aya nsuwa,
Ni okathi wootheene onikhala awe mweeri,
Mpakha maloko anrowa okhumelela ohoolo.+
6 Owo onrowa okhala ntoko epula enimorela malaxi oowiikitthiwa,
Ntoko epula yinceene ennaaniha etthaya.+
7 Mahiku a olamulelo awe, naxariya onookhuma* ithutu ntoko mwiri,+
Mahiku ootheene, onookhalaka murettele munceene,+ siisaale mweeri onikhala aya mahiku ootheene.
8 Owo onrowa olamulelaka okhuma ephareya emosa mpakha ephareya ekina,
Nave onrowa olamulelaka okhuma muro Eufrate mpakha omalenle elapo.+
9 Atthu anikhala moothakoni, animuurama ohoolo wawe,
Nave mwene onimwaaxintta awanani awe.+
10 Mamwene a oTaarisi ni a ilapo sa musisironi, anoomuliva mpoosito.+
Nave mamwene a oXeeba ni a oSeeba, anonvaha itthu.+
11 Mamwene ootheene animuurama ohoolo wawe,
Nave maloko ootheene anoomurumeela yoowo.
12 Owo onoomoopola mutthu oohaawa, yoowo onikhuwela ovekelaka okhaliheriwa,
Nave, onoomoopola mutthu oowiiyeviha, nuule ohirina mutthu oomukhaliherya.
13 Onoomoonelaka othunku mutthu oowiiyeviha ni oohaawa,
Nave onoowoopolaka atthu oohaawa.
14 Onoowoopola mmatatani mwa atthu anaahaaxa, ni aniphavela owiiriha itthu sootakhala,
Nave okumi* aya, onookhalana efaita yinceene vamaithoni vawe.
15 Mwene okhaleke mahiku manceene, ni ovahiwe eweero ya oXeeba.+
Atthu anvekeleleke voohihiyererya,
Ni amureeliheke khula nihiku.
16 Elapo enooruwerya ipyo sinceene,+
Vasulu va miyaako sinoosareya ipyo.
Imatta sa mwene, sinimwiima mihokorokho sinceene, ntoko muttetthe wa oLiibano,+
Nave atthu anikhala mpooma, animwaatta ntoko malaxi.+
17 Nsina nawe nikhaleke mahiku ootheene,+
Nave nikhaleke okathi wootheene ntoko nsuwa.
Nto atthu areelihiwe mwaha wa mwene;+
Maloko ootheene amuhimyeke okhala mutthu oohakalala.
Amen, Amen.
20 Mavekelo a Davidi, mwaana a Yese,+ animalela vaava.