Amoosi
2 “Etthu onihimya awe Yehova, tiila:
‘“Mwaha wa ikirime tthaaru sa oMowabi,+ nave mwaha wa ikirime xexe, nkintthikela ottuli,
Okhala wiira owo oopaha makhuva a mwene a wEdomi mpakha opakeya ettuurwa.
2 Kinooroihela mooro oMowabi,
Nto mooro owo onoopaha ipa saya soorakamela osulu soolipihiwa sa oKeriyothi.+
Atthu a oMowabi animookhwa opuro oninyakulihaniwa,
Ni okhuwela wa ekhotto vamosa ni oruma wa nlope.+
3 Kinoomukumiha ole onilamulela* eriyari aya,
Nave kinoomwiiva owo ni makhulupale aya ootheene”.+ Yehova tonihimya’.
4 Etthu onihimya awe Yehova, tiila:
‘Mwaha wa ikirime tthaaru sa oYuda,+ nave mwaha wa ikirime xexe, nkintthikela ottuli,
Okhala wiira awo aakhootta nlamulo na* Yehova,
Nave khiyeettenle sooruma sawe.+
Masi aahapuxiwa ni wootha weiwo amuhavinre aya yaatthanre aya.+
5 Kinooroihela mooro oYuda,
Nto mooro owo onoopaha ipa soorakamela osulu soolipihiwa sa oYerusalemu’.+
6 Etthu onihimya awe Yehova, tiila:
‘Mwaha wa ikirime tthaaru sa Isarayeli,+ nave mwaha wa ikirime xexe, nkinitthikela ottuli,
Okhala wiira onnimutumiha naxariya ni eparatha,
Ni onnimutumiha mulipa-oohaawa ni epaare emosa ya isantaalya.+
Mulopwana ni paapa awe annirupa ni muthiyana mmosa-ru,
Ananarihaka nsina naka noowaarya.
8 Waattamela khula altaari,+ awo annimpaathela mikhumi yeemexeriwa aya ni atthu yaakophenle.+
Nave annithuma eviinyu ni musurukhu wa muuluta anaaliviha aya atthu, anawurya mpaani mwa amuluku aya.
9 ‘Masi ti miyo kaapwetenxe atthu a wAmori ohoolo waya,+
Yaawo yaari oorakama ntoko miri sa eseeturu, ni oolipa ntoko miri siniihaniwa karvaalyo.*
Awo yaari ntoko miri, nto miyo kihonona mihokorokho saya ni mitathaari saya.+
10 Miyo kihookumihani elapo ya wExiitu,+
Nave koowiirihani weetta woothakoni iyaakha 40,+
Wiira mukuxe elapo ya atthu a wAmori.
11 Miyo kihaathanla aniinyu akina wiira akhale maprofeta,+
Ni kihaathanla amiravo anyu akina wiira akhale manaziri.+
Khahiyo siiso, nyuwo atthu a Isarayeli?’ Yehova tonihimya.
12 ‘Masi nyuwo mummakela waavaha eviinyu manaziri,+
Nave muhaaruma maprofeta wiira: “Muhilaleyeke eprofesia”.+
13 Nto miyo kinimoonyakattani opuro anyu,
Ntoko siisaale ekaaro enipuruliwa ni inama elemeliwe ni ipyo, eninyakatta aya itthu sininyakela aya.
14 Mutthu ootthyawa khonrowa okhalana opuro wootthyawela,+
Mutthu oolipa khonrowa okhalana owerya,
Nnakhala nakhotto ootupa khonrowa woopowa.
15 Mulipa onivonya mattheere khonrowa weemela opuro awe,
Mutthu ootthyawa khonrowa woopowa,
Nnakhala nakhavalo khonrowa owerya woopola okumi awe.
16 Hata nakhotto ootepexa olipa murima,
Nihiku nlo onrowa otthyawa ohiwanre etthu’.+ Yehova tonihimya”.