Miteko sa Arummwa
10 Aahikhala mulopwana mmosa oKesareya, aihaniwa Korneelio, yoowo aari mukhulupale a anakhotto a ekurupu ya atoropa yaihaniwa Italiano.* 2 Owo ni atthu ootheene a etthoko awe, yaanimukokhorela Muluku. Nave aanaakhaliherya alipa-oohaawa ni aanimuxonttela Muluku, mahiku ootheene. 3 Nihiku nimosa, etthu yoowiiraka 15 oora,*+ Korneelio aahiweha oratteene moolohani nlaikha na Muluku, nirwiiye ene vatthokoni vawe, nnamulavuliha niiraka: “Korneelio!” 4 Korneelio aahiwehexexa, oovaka, onaakhula oriki: “Pwiya, kinnoowiriyanani”. Nlaikha naahimuleela wiira: “Mavekelo anyu aaphiya wa Muluku.+ Owo onnoona moota munaakhaliherya anyu alipa-oohaawa, nto onniwuupuwelani. 5 Mwaarume atthu orowa oYope, yamwiihane mulopwana oniihaniwa Simoni, yoowo oniireliwa-tho Pedru. 6 Owo, ori vatthokoni va mulopwana mmosa onivara muteko ni isapala, oniihaniwa Simoni, waattamela ophareya”. 7 Nlaikha nle, nimalaka-ru olavula ni Korneelio, naahirowa. Vano, Korneelio aahiwiihana arumeyi awe anli ni toropa mmosa aamoova Muluku, 8 aaleela itthu sootheene ni aaruma orowa oYope.
9 Mmeeloni mwaya, yeettaka mukwaha aya, yaattamelaka opooma, Pedru aahiwela vasulu va empa* aakhala awe, wiira avekele. Yaari etthu yoowiiraka 12 oora.* 10 Ewoora ene yeele, Pedru aahivoliwa etala onaphavela olya. Okathi yaalokiheriwa aya yoolya, owo aahiloha.+ 11 Moolohani, aahoona erimu ehuleiye ene. Nave etthu yaalikana ni ekuwo yuulupale ekuruxeliwaka vathi, evareliwe ene iponta saya ixexe. 12 Vakuwoni-vo, saahikhala inama sa mikhalelo sootheene: inama sa metto mixexe, inowa, anaakhwiitti ni axipalame.* 13 Vano, nsu nimosa naahimuleela wiira: “Pedru, nvenye, mwiiveke ni mukhuureke!” 14 Pedru aahaakhula oriki: “Pwiya, nkinikhuura nnakhala vakhaani, maana khenakele mwaano mwaka etthu yoohiloka ni enikhoottihiwa ni nlamulo”.+ 15 Nsu nlo naahimuleela ekwaha ya nenli niiraka: “Muhihimyeke okhala soohiloka itthu Muluku oreerinhe awe”. 16 Yaahiiraneya-tho ekwaha ya neeraru. Niinaano-ru, ele Pedru oonale awe yaahiroihiwa wiirimu.
17 Pedru aahitikinihiwa, onaphavela osuwela etthu yaataphulela aya ele yoonihiwe awe. Okathi ene yoowo, alopwana ale yaarummwale ni Korneelio yaahiphiya vatthokoni va Simoni, yeemela vamukhora.+ 18 Yaahimwiihana mwaneene etthoko, anamukoha akhala wiira Simoni, yoowo aihaniwa Pedru, aamanke vaavale. 19 Pedru uupuwelelaka etthu oonihiwe awe, ikuru soowaarya+ saahimuleela wiira: “Mwiiwe! Aakhala alopwana araru aniwaavyani. 20 Tivo, nvenye, mukhuruwele vathi vale ni mwaatthare muhihoveryaka etthu, okhala wiira ti miyo kaarumme”. 21 Siiso, Pedru aahikhuruwa, aaphwanya alopwana ale, onahimya wiira: “Miyo-va. Ti miyo munikaavya anyu. Murwenle-ni?” 22 Awo yaahihimya wiira: “Mukhulupale a anakhotto Korneelio,+ owo mutthu a xariya ni onimoova Muluku, nave onnilavuliwa saana ni nloko nootheene na ayuda. Muluku ooruma nlaikha nawe omuleela Korneelio wiira oolattuleni vatthokoni vawe, wiira iiwe itthu sirina anyu wiira mmuleele”. 23 Vano, Pedru aahaalattula atthu awo wiira akele mpaani ni aahaakhaliha aletto awe.
Mmeeloni mwaya, Pedru aahaatthara, nave anna akina a oYope, yaahirowa vamosa nuuwo. 24 Mmurottoni mwaya, Pedru aahiphiya oKesareya. Tthiri Korneelio, iira aalipelelaka atthu ale, nave iira aalattunle ene amusi awe ni apatthani awe oororomeleya. 25 Okathi Pedru aaphiyale awe, Korneelio aahirowa okumana nuuwo, okokhora ohoolo wawe, onanvuwiha. 26 Masi Pedru aahinvarela, onahimya wiira: “Mweemele, miyo-tho ka mutthu paahi”.+ 27 Avaanelaka siisaale, Pedru aahikela mpaani, aaphwanya atthu anceene athukumanne ene. 28 Pedru aahaahimeerya wiira: “Nyuwo moosuwela wiira nlamulo khanneemererya wiira muyuda okhaleke vamosa aahiiso omwaattameleke mutthu a nloko nikina.+ Masi Muluku, ookooniherya wiira kihimuhimyeke mutthu okhala oohiloka.+ 29 Tivo, nuumala orummwa, kihoorwa kihihoveryaka etthu. Nto, xeeni muhalaka waaruma atthu okirweela?”
30 Korneelio aahaakhula oriki: “Mahiku maxexe avinre, okhuma ewoora yeela, kanvekela owaani vaava. Yaari 15 oora.* Okathi ene yoowo, mulopwana mmosa aawanre ikuwo soowaarya aaheemela ohoolo waka, 31 onahimya wiira: ‘Korneelio, Muluku ohiiwa ovekela wanyu ni ohuupuwela itthu sooreera muniwiirela anyu alipa-oohaawa. 32 Tivonto, mwaarume atthu orowa oYope omwiihana Simoni, yoowo-tho oniireliwa Pedru. Mulopwana owo, omanke owannyawe Simoni, yoowo onivara muteko ni isapala, waattamela ophareya’.+ 33 Vano miyo kaahaaruma atthu woorowelani, ti vootepa oreera okhala wiira muhoorwa. Nto hiyo noothukumana-va, ohoolo wa Muluku, wiira niwiriyane itthu sootheene murummwale anyu ni Yehova* wiira munileele”.
34 Nuumala wiiwa moolumo awo, Pedru aahiira: “Tthiri, vano koosuwelexa wiira Muluku khonaathanya atthu.+ 35 Masi khula elapo, owo onnimwaakhela khula mutthu onimoova ni oneettela exariya.+ 36 Owo ohaaroihela aisarayeli ihapari sooreera sa murettele,+ mwa Yesu Kristu: Yesu owo, ti Pwiya a atthu ootheene.+ 37 Nyuwo munnisuwela mwaha waalavuliwa oYudeya wootheene, opaceryaka oGalileya,+ nuumala Yohani olaleya opatiso. 38 Mwaha owo, waamuhimya Yesu munazarethi. Muluku aahimuthanla ni ikuru soowaarya,+ khunvaha owerya. Siiso, aanivara itthu sooreera ni aanaapenuxa atthu ootheene yaahaaxiwa ni Diabo,+ okhala wiira Muluku aari ni Yesu owo.+ 39 Nave hiyo na anamoona a itthu sootheene Yesu opanke awe oYudeya, oGalileya ni oYerusalemu. Masi awo yaahimwiiva, amukhomelaka vamwirini. 40 Muluku oomuhihimuxa nihiku na neeraru,+ wiira atthu anwehe. 41 Owo khowoonihenrye atthu ootheene, masi onoonihenrye hiyo paahi, naalya ni naawurya vamosa ni Yesu, nuumala owo ohihimuxiwa mookhwaani. Hiyo naahithanliwa khalai ene ni Muluku, wiira nimoone ni nimulaleye Yesu owo.+ 42 Nave-tho, owo ooniruma waalaleerya atthu ni waatthokiherya oratteene,+ wiira owo ti yoole othanliwe ni Muluku, wiira aaphukele atthu akumi ni alipa-ookhwa.+ 43 Maprofeta ootheene aalavula amuhimyaka Yesu.+ Awo ahimmye wiira, mwa nsina nawe, Muluku onimwaalevelela itampi atthu ootheene animwaamini yoowo”.+
44 Pedru nlelo olavulaka itthu iya, atthu ootheene yaiwale nuulumo na Muluku, yaahaakhela ikuru soowaarya.+ 45 Nto ayuda oowaamini,* yaawo yaari ni Pedru, yaahitikinihiwa vanceene, okhala wiira ale yahaakhanle ayuda, yaahaakhela ikuru soowaarya, mahala ene. 46 Tthiri, yaahiwiiwa elavulaka mattaava oovirikana ni envuwihaka Muluku.+ Siiso, Pedru aahihimya wiira: 47 “Atthu ala ahaakhela ikuru soowaarya, ntoko hiyo naakhenle ahu. Niireke ookhala oniwerya waakhoottiherya opatisiwa+ ni maasi?” 48 Nto Pedru aahiruma wiira atthu ale apatisiwe mwa nsina na Yesu Kristu.+ Nuumala-vo, yaahinvekela wiira okhale naawo mahiku vakhaani.