Isaalimu
א [aalefe]
119 Oohakalala taale ahinihiya okhala oororomeleya,
Yaale aneettela nlamulo na Yehova.+
3 Khaniira itthu sootakhala;
Anneettela iphiro sawe.+
4 Nyuwo mooruma wiira,
Malakiheryo anyu yeetteliweke.+
5 Kaaniphavela kiri ene oororomeleya,+
Wiira kitthareke malamulo anyu!
6 Nto, nkaarowa wuuliwa muru,+
Okathi kaarowa aka ovahaka ephoole sooruma sanyu sootheene.
7 Kinimoottottopelani ni murima wooreera,
Okathi kinrowa aka wiixutta ophukela wanyu wa xariya.
8 Kinrowa weettelaka malamulo anyu.
Muhikinyanyale voomalela.
ב [beete]
9 Mmiravo onrowa owerya sai okhalana okumi wooloka?
Ohaana okhala oowehaweha ni wiiwelela nuulumo nanyu.+
10 Miyo kinniwaavyani ni murima aka wootheene.
Muheemererye wiira kihiye weettela sooruma sanyu.+
12 Muttottopeliwe, nyuwo Yehova;
Mukiixuttihe malamulo anyu.
13 Miyo koolaleya ni eyano aka,
Sooruma sootheene muhimmye anyu.
16 Okisivela vanceene ikano sanyu.
Nkinrowa oliyala nuulumo nanyu.+
ג [kiimele]
17 Mukireerele murima, miyo murumeyi anyu,
Wiira kikhaleke ni keetteleke nuulumo nanyu.+
18 Muhule maitho aka, wiira kiweheke oratteene,
Itthu sooreera siri munlamuloni mwanyu.
19 Miyo kiri ntoko namurwa onikhala elapo ekina.+
Muhikiipithihe sooruma sanyu.
20 Okathi wootheene, annikinkhela vanceene,
Malamulo anyu.
21 Nyuwo munnaapwapwela atthu oowiikuxererya,
Munnaatakhaliha ale anihiya weettela sooruma sanyu.+
22 Nwiirihe atthu awo ottharuwa ohikittittimiha, ni ottharuwa okithanya,
Okhala wiira kinniiwelela malamulo anyu.
23 Hata okathi makhulupale anikilaathi aya, anakilavula voohikhalela,
Miyo kinnuupuwelela* malamulo anyu.
ד [taalete]
25 Kihimpaathi vantthupini.+
Mukihiye kikhaleke mukumi, ntoko muhimmye anyu.+
26 Kihooleelani iphiro saka, nto nyuwo mookaakhula;
Mukiixuttihe malamulo anyu.+
27 Mukisuwelihe etthu enitaphulela aya* malakiheryo anyu,
28 Nkiniwerya orupa, mwaha wa oriipiwa murima vanceene.
Mukilipihe, ntoko muhimmye anyu.
29 Xontte, mukikhaliherye wiira kihikhale nawoothe,+
Mukireerele murima, mukiixuttihaka nlamulo nanyu.
30 Miyo koothanla okhala oororomeleya.+
Koosuwela wiira munnaaphukela atthu mwa xariya.
31 Kinnivarexexa malamulo anyu.+
Xontte Yehova, muhikihiye kuuliwaka muru.+
32 Kinootthara sooruma sanyu ni murima aka wootheene,
Okhala wiira mookikhaliherya osuwela saana sooruma iyo.*
ה [he]
34 Mukivahe ankhili,
Wiira kiiweleleke nlamulo nanyu,
Ni keetteleke ni murima aka wootheene.
36 Mwiirihe murima aka osiveliwaka ni moolumo anyu oowuupuxerya,
Ohiya ophavela mureerelo aka.+
37 Mukikhaliherye wiira kisyakeke oweha itthu sihirina efaita;+
Mukiiriheke weetta mphironi mwanyu, wiira kikhale mukumi.
38 Mpake etthu mwaamuleihenrye anyu murumeyi anyu,
Wiira muttittimihiweke vanceene.*
39 Mukumihe wuuliwa muru onikoopopiha,
Okhala wiira ophukela wanyu ti wooreera.+
40 Kinniphavela vanceene malakiheryo anyu.
Mukihiye kikhaleke, okhala wiira nyuwo mwa naxariya.
ו [vaawu]
41 Khoo Yehova, mukooniherye ophenta wanyu woororomeleya,+
Nave mukoopole, ntoko muleihenrye anyu;*+
42 Nto miyo kinoomwaakhula ole onikiveeha,
Okhala wiira kinniroromela nuulumo nanyu.
43 Muhikumihe mwaano mwaka moolumo eekeekhai,
Okhala wiira kinnilipelela ophukela wanyu.
44 Kinimweettelaka nlamulo nanyu okathi wootheene,
Mpakha mahiku ootheene.+
45 Khula opuro kinirowa aka, kinookhalaka oovareleleya,*+
Okhala wiira kinniphavela weettela malakiheryo anyu.
46 Kinoolavulaka malamulo anyu, hata kiri ene ohoolo wa mamwene,
Nave, nkinrowa woonaka ehaaya.+
47 Okisivela vanceene sooruma sanyu,
Aayo, sinnitepa okisivela.+
48 Kinoovekelaka kivenxale ene matata aka, mwaha wa sooruma sanyu, seiyo sinikisivela vanceene.+
Nave kinimuupuwelelaka* malamulo anyu.+
ז [saine]
49 Muupuweleke nuulumo nanyu mwaakilenle anyu,
Nenlo munirumeela anyu wiira mukivahe nlipelelo.
50 Ela ti etthu enikimaaliha okathi kinixanka aka,+
Okhala wiira moolumo anyu annikikhaliha mukumi.
51 Atthu oowiikuxererya annikiveeha vanceene.
Masi miyo nkinihiya weettela nlamulo nanyu.+
53 Kinninanariwa vanceene mwaha wa atakhali,
Yaawo anikhootta nlamulo nanyu.+
54 Malamulo anyu tari nsipo naka,
Khula opuro kinikhala aka.*
55 Ohiyu, kinnuupuwela nsina nanyu, nyuwo Yehova,+
Wiira keetteleke nlamulo nanyu.
56 Itthu iya kinniira,
Okhala wiira kinniiwelela malakiheryo anyu.
ח [heete]
57 Yehova, nyuwo muri ntoko muhakhu kihiyeriwe aka;+
Kooleiherya wiira kinaamwiiwelelaka moolumo anyu.+
59 Koovarerya okumi aka,
Wiira kitthikele weettela malamulo anyu.+
60 Miyo kinnakuvela ni nkinipiserya,
Wiiwelela sooruma sanyu.+
61 Mikhoyi sa atakhali sookirukurerya,
Masi miyo nkiniliyala nlamulo nanyu.+
62 Ohiyu eriyari, kinnivenya wiira kooxukhureleni,+
Mwaha wa ophukela wanyu wa xariya.
64 Khoo Yehova, ophenta wanyu woororomeleya onnisareya mulaponi,+
Mukiixuttihe malamulo anyu.
ט [teete]
65 Mookithokorerya saana, miyo murumeyi anyu,
Ntoko mwaaleihenrye anyu, nyuwo Yehova.
66 Mukivahe ankhili ni osuwela,+
Okhala wiira miyo kinniroromela sooruma sanyu.
67 Miyo kaahittheka kihilakenle ni kaahihaawa,
Masi vano kinniiwelela moolumo anyu.+
68 Nyuwo ti mooreera murima,+ nave miteko sanyu ti sooreera.
Mukiixuttihe malamulo anyu.+
69 Atthu oowiikuxererya annikootherya itthu sinceene,
Masi miyo kinniiwelela malakiheryo anyu ni murima aka wootheene.
70 Murima aya ti woolipa ntoko nluku, ahinoona-tho owereya,+
Masi miyo okisivela vanceene nlamulo nanyu.+
71 Vaareera, okhala wiira kaahihaawa,+
Siiso, miyo kihiixutta malamulo anyu.
י [iyoote]
73 Matata anyu takipanke ni takilipinhe.
Mukivahe ankhili,
Wiira kiixutte sooruma sanyu.+
74 Atthu anoottittimihani annikiweha, anatteeliwa murima,
75 Khoo Yehova, miyo koosuwela wiira ophukela wanyu ti wa xariya,+
Ni wiira mookihaaxa mwaha wa ororomeleya wanyu.+
78 Atthu oowiikuxererya yuuliwe muru,
Okhala wiira annikihaaxa vahikhanle mulattu.*
Masi miyo kinimuupuwelela* malakiheryo anyu.+
79 Atthikele okhala ni miyo, ale anoottittimihani,
Yaale anisuwela ikano sanyu.
כ [kaafe]
82 Kinnilipelela itthu muleihenrye anyu.+
Miyo kinnikoha wiira: “Munirwa silini wiira mukimaalihe?”+
83 Miyo kinlikana ni murupa wa esapala, wuumihiwe ni mwiixi,
Masi nkiniliyala malamulo anyu.+
84 Kinrowa olipelelaka mpakha silini?
Munrowa waaphukela silini ale anikilupattha?+
85 Vanikhala ntoko wiira ale oowiikuxererya ni ale anikhootta nlamulo nanyu,
Anithipa malitti wiira kimorele.
86 Sooruma sanyu sootheene ti soororomeleya.
Xontte, mukikhaliherye! Atthu annikilupattha vahikhanle mulattu.+
87 Awo yaahanle vakhaani okipwetexa mulaponi,
Masi miyo nkihiyale weettela malakiheryo anyu.
88 Mukihiye kikhaleke mukumi, mwaha wa ophenta wanyu woororomeleya,
Wiira kiiweleleke moolumo oowuupuxerya mulavunle anyu.
ל [laamete]
89 Khoo Yehova, okathi wootheene,
Moolumo anyu anikhala wiirimu.+
90 Nyuwo munnooniherya ororomeleya para maloko ootheene.+
Muhiiriha elapo okhala yoolipa, wiira ekhaleke siiso.+
91 Mwaha wa malamulo anyu, itthu iyo* sookhala mpakha olelo-va,
Itthu iyo sootheene sinnoovarelani muteko.
92 Vaakhanle wiira malamulo anyu khiyaakisivela,
Kaarowa wiiraka kikhwiiye ene mwaha wa ohaawa.+
93 Nkinikhala-khala kiliyalaka malakiheryo anyu,
Okhala wiira mookikhaliha mukumi mwaha wa yaawo.+
95 Atakhali annikiwehererya aphavelaka okipwetexa,
Masi miyo kinnuupuwelela oratteene ikano sanyu.
96 Kooweha wiira itthu sootheene simalenle sookhalana mukano,
Masi sooruma sanyu khasirina mukano.
מ [meeme]
97 Nlamulo nanyu ninnikisivela vanceene!+
Kinnuupuwelela* nenlo nihiku nootheene.+
98 Sooruma sanyu, sinnikiiriha okhalana ankhili waavikana awanani aka,+
Okhala wiira iyo sinnikeettiha okathi wootheene.
99 Kookhalana ankhili anceene waavikana ootheene ale anikiixuttiha,+
Okhala wiira kinnuupuwelela* ikano sanyu.
100 Miyo kinniira itthu mwa miruku, waavikana atthu oowuuluvala,
Okhala wiira kinneettela malakiheryo anyu.
101 Kinnikhootta weetta ephiro ya atakhali,+
Wiira keetteleke nuulumo nanyu.
102 Miyo nkinikhootta ophukela wanyu,
Okhala wiira nyuwo mookiixuttiha.
104 Mwaha wa malakiheryo anyu, kinniira itthu mwa miruku.+
Tivonto, kinninyokha mweettelo wootheene woowootha.+
נ [nuune]
106 Miyo koolapha etthu emosa, nto kinoopaka yeeyo:
Kinrowa wiiwelelaka malamulo anyu a xariya.
107 Miyo kooxanka vanceene.+
Xontte Yehova, mukhapelele okumi aka, ntoko muleihenrye anyu.*+
108 Xontte Yehova, woottottopelani waka voohikhanyereriwa,* woosiveleni,+
Nave mukiixuttihe malamulo anyu.+
110 Atakhali aakireya muraakho,
Masi miyo nkinihiya weettela malakiheryo anyu.+
111 Okathi wootheene, kinoovahaka efaita moolumo anyu oowuupuxerya,
Okhala wiira awo tanikitteeliha murima.+
112 Koolakela wiiwelela malamulo anyu,
Okathi wootheene, mpakha wookiseryani.
ס [saameke]
115 Mukhume vari aka, nyuwo atthu ootakhala,+
Okhala wiira kiniphavela wiiwelelaka sooruma sa Muluku aka.
118 Nyuwo munnaakhootta ootheene anihiya weettela malamulo anyu,+
Okhala wiira awo toohiroromeleya ni anawoothe.
119 Nyuwo munnaarihela otakhwani, atakhali ootheene a mulaponi, ntoko ikokhola.+
Tivonto kiniphenta aka malamulo anyu.
120 Erutthu aka ennittettemela mwaha wa owoovani;
Kinnoova ophukela wanyu.
ע [aine]
121 Miyo koovara itthu sa xariya ni sooreera.
Muhikihiye mmatatani mwa atthu aniphavela okihaaxa!
122 Mukiroromelihe wiira kinookhalaka saana;
Ale oowiikuxererya ahikihaaxe.
123 Maitho aka aavela, awehereryaka woopoliwa ni nyuwo,+
Ni awehereryaka wiiraneya itthu sooreera muleihenrye anyu.*+
125 Miyo ka murumeyi anyu, mukivahe ankhili,+
Wiira kisuwele malamulo anyu.
126 Woophiya okathi wiira nyuwo Yehova, mpake etthu,+
Okhala wiira atthu awo aatthekela nlamulo nanyu.
127 Tivonto, sooruma sanyu sinnikisivela vanceene,
Ovikana eweero, aayo, ovikana eweero yooreerexa.+
128 Khula etthu muniixuttiha anyu, kinnoona okhala yooreera;+
Kinninyokha mweettelo wootheene woowootha.+
פ [pe]
129 Moolumo anyu oowuupuxerya tootikiniha.
Tivonto kiniiwelela aka yaawo.
131 Iphumu sinnikimalela,
Mwaha woowi kinniphavela vanceene wiiwa sooruma sanyu.+
132 Mukuupuwele ni mukireerele murima,+
Muttharaka moota munaaphukela anyu ale nnaasivela nsina nanyu.+
133 Mukeettiheke ni moolumo anyu, wiira keetteke ephiro yooreera;
Ehikhale etthu yootakhala enrowa okiwerya.+
134 Mukoopole mmatatani mwa atthu oohaaxa,
Nto miyo kinoottharaka malakiheryo anyu.
135 Mukireerele murima, miyo murumeyi anyu,+
Nave mukiixuttihe malamulo anyu.
136 Maithori annikimora,
Okhala wiira atthu khaneettela nlamulo nanyu.+
צ [tisaate]
138 Malamulo munivaha anyu ta xariya,
Nave toororomeleya vanceene.
139 Woophentani waka onlikana ni mooro onipatta mweerutthuni mwaka,+
Okhala wiira awanani aka annikhootta moolumo anyu.
141 Atthu akina khanikoona okhala etthu ni annikithanya;+
Hata vari siiso, nkiliyanle malakiheryo anyu.
143 Hata kixankaka ni kivela-velaka,
Sooruma sanyu sinnikisivela.
144 Malamulo anyu a xariya, annikhala mahiku ootheene.
Mukivahe ankhili,+ wiira kikhaleke mukumi.
ק [koofe]
145 Kinnivekela ni murima aka wootheene. Khoo Yehova, mukaakhule.
Kinimwiiwelela malamulo anyu.
146 Kinoovekelani nyuwo, mukoopole!
Kinrowa weettelaka malamulo anyu.
147 Kinnivenya vahinatthi oxa, wiira kivekele okhaliheriwa,+
Okhala wiira moolumo anyu ti nlipelelo naka.*
149 Mukiwiriyane mwaha wa ophenta wanyu woororomeleya.+
Khoo Yehova, mukikhapelele muttharaka exariya anyu.
150 Ale arina mweettelo onooniherya ohuuliwa muru, annikaattamela;
Awo aakhootta nlamulo nanyu.
152 Okhuma khalai, miyo kihiixutta ikano sanyu,
Seiyo mukumihenrye anyu wiira sikhaleke mahiku ootheene.+
ר [reexe]
153 Nwehe ohaawa waka ni mukoopole,+
Okhala wiira nkiliyanle nlamulo nanyu.
155 Atakhali aarakamela woopowa,
Okhala wiira awo khaniphavela wiiwelela malamulo anyu.+
156 Nyuwo Yehova, omoriwa wanyu ikharari ti wuulupale.+
Mukikhapelele muttharaka exariya anyu.
157 Ale anikilupattha ni awanani aka khareere;+
Masi miyo nkihiyale ikano sanyu.
158 Kihaaweha ale anaawoka akhwaaya,
Okhala wiira khaniiwelela moolumo anyu.+
159 Malakiheryo anyu annikisivela vanceene!
Xontte Yehova, mukikhapelele mwaha wa ophenta wanyu woororomeleya.+
160 Nuulumo nanyu nootheene ti neekeekhai,+
Nave ophukela wanyu wootheene wa xariya, onikhala mahiku ootheene.
ש [siini] aahiiso [xiimi]
161 Makhulupale annikilupattha+ vahikhanle mulattu,
Masi miyo kinnittittimiha vanceene moolumo anyu.+
162 Kinnitteeliwa murima mwaha wa moolumo anyu,+
Ntoko mutthu ophwannye muhakhu.
163 Okinanara wootha, nave kinninyokha.+
Nlamulo nanyu ninnikisivela.+
164 Khula nihiku, kinnoottottopelani ikwaha 7,
Mwaha wa ophukela wanyu wa xariya.
166 Kinnilipelela woopoliwa ni nyuwo Yehova,
Nave kinniiwelela sooruma sanyu.
167 Kinniiwelela malamulo anyu,
Nave malamulo awo annikisivela vanceene.+
168 Kinniiwelela malakiheryo anyu ni malamulo anyu,
Okhala wiira nyuwo munnisuwela itthu sootheene sinivara aka.+
ת [taawu]
169 Khoo Yehova, okhuwela waka kivekaka okhaliheriwa, woophwanyeeni.+
Mukivahe ankhili, ntoko mwaahimmye anyu.+
170 Mukiwiriyane okathi kiniveka aka wiira mukireerele murima.
Mukoopole, ntoko muleihenrye anyu.*
171 Kinrowa woottottopelakani okathi wootheene,+
Okhala wiira munnikiixuttiha malamulo anyu.
172 Kinoowiipelani isipo, mwaha wa moolumo anyu,+
Okhala wiira sooruma sanyu sootheene ti sa xariya.
173 Ntata nanyu nikhale noolikana ene wiira nikikhaliherye,+
Okhala wiira koothanla wiiwelela malakiheryo anyu.+
174 Kinniphavela vanceene woopoliwa ni nyuwo Yehova,
Nave nlamulo nanyu, ninnikisivela vanceene.+
175 Mukihiye kikhaleke mukumi, wiira koottottopelekeni;+
Ophukela wanyu, okikhaliherye.