Wahala a Nenli
18 Yosafati aahikhalana mihakhu ni ovuwa wuulupale,+ masi aahiweemererya atthu a etthoko awe othelana ni atthu a etthoko ya Akhabi.+ 2 Nuuvira iyaakha vakhaani, Yosafati aahirowa omuxukurya Akhabi oSamariya,+ nto Akhabi aahivaha mukuttho wa ipwittipwitthi ni ipooyi sinceene, mwaha wa Yosafati ni atthu aarina awe. Akhabi aahimuthipelela Yosafati wiira orowe ni owo otuphela oRamothi-Xileyaadi.+ 3 Mwene Akhabi a wIsarayeli aahimukoha mwene Yosafati a oYuda wiira: “Kiireke munoorowa ni miyo otuphela oRamothi-Xileyaadi?” Owo aahaakhula wiira: “Miyo kinrowa okhala ni nyuwo. Atthu aka anrowa okhala ni atthu anyu, nave animookhaliheryani okhottoni”.
4 Masi Yosafati, aahimuleela mwene a wIsarayeli wiira: “Xontte, nipacerye toko omukoha Yehova”.+ 5 Vano mwene a Isarayeli aahaathukumanya maprofeta, alopwana 400 onaakoha wiira: “Nirooke natupheleke oRamothi-Xileyaadi wala nnaari?” Awo yaahimwaakhula wiira: “Muroweke, Muluku eekeekhai onimoovahereryani muttetthe owo mmatatani mwanyu”.
6 Vano Yosafati aahikoha wiira: “Niireke nno khokhanle profeta a Yehova?+ Nrowe nimukohe Muluku nimurumeelaka yoowo”.+ 7 Mwene a Isarayeli aahimuleela Yosafati wiira: “Nlelo ookhala mulopwana mmosa+ okhanle oonikohererya Yehova, masi miyo kinnimunyokha, okhala wiira khonikihimyana itthu sooloka, masi okathi wootheene onikihimyana itthu sootakhala.+ Owo Mikaya, mwaana a Imila”. Yosafati aahimuleela wiira: “Mwene ohihimyeke itthu ntoko iyo”.
8 Vano mwene a Isarayeli aahimwiihana mukhulupale onamuhimeerya wiira: “Mwaakuveke! Mukiruuhele Mikaya, mwaana a Imila”.+ 9 Vano mwene a wIsarayeli ni Yosafati mwene a oYuda, yiira ekilanthe ene khula mmosa veehiceni vawe. Awo yaakilanthi opuro oneepetthiwa ipyo vamukhora va oSamariya, awanre ene ikuwo saya sa omwene. Nto maprofeta ootheene yiira elavulaka eprofesia ohoolo waya. 10 Sedekiya mwaana a Kenaana, aahiipakela manyaka a eyuuma, onahimya wiira: “Etthu onihimya awe Yehova, tiila: ‘Murumeelaka manyaka ala, munimwaatuphela atthu a oSiiria mpakha waamala-maliha’”. 11 Maprofeta ootheene yiira elavulaka eprofesia emosa-ru, ariki: “Murowe oRamothi-Xileyaadi, munookuxa muttetthe owo,+ okhala wiira Yehova onimoovahereryani mmatatani mwanyu”.
12 Mulopwana owo aaronwe omwiihana Mikaya aahimuleela wiira: “Moolumo ootheene maprofeta animuhimeerya aya mwene, tooreera. Xontte, moolumo anyu yalikaneke ni moolumo aya,+ mulavuleke itthu sooloka”.+ 13 Masi Mikaya aahihimya wiira: “Ntoko siisaale Yehova onikhala awe, itthu sootheene Muluku aka onrowa awe ohimya, ti seiyo kinrowa aka ohimya”.+ 14 Nto Mikaya aahirowa wa mwene, mwene onamukoha wiira: “Mikaya, kirooke katupheleke oRamothi-Xileyaadi wala nnaari?” Owo aahimwaakhula wiira: “Muroweke, munookuxa muttetthe owo. Munoovahereriwa mmatatani mwanyu”. 15 Mwene aahimukoha wiira: “Ikwaha ikavi kinrowa aka woolaphihani wiira muhikileele etthu ekina, mukileele paahi ekeekhai mwa nsina na Yehova?” 16 Mikaya aahihimya wiira: “Kinnaaweha aisarayeli ootheene amwarenle ene omiyaakoni, ntoko ipwittipwitthi sihirina makampusi.+ Vano Yehova oohimya wiira: ‘Awo kharina-tho muhooleli aya. Khula mmosa otthikeleke owannyawe ni murettele’”.
17 Moottharelana, mwene a wIsarayeli aahimuleela Yosafati wiira: “Miyo nkoolenleni wiira, ‘owo khonrowa okihimyana itthu sooloka, onrowa okihimyana itthu sootakhala paahi’?”+
18 Mikaya aahihimya wiira: “Nwiriyane moolumo a Yehova: Konweha Yehova okilanthi ene veehiceni vawe,+ anakhotto awe ootheene a wiirimu+ yeemenle ene moono awe woolopwana ni moono awe woothiyana.+ 19 Vano Yehova aahikoha wiira: ‘Tani onrowa onwoka mwene Akhabi a wIsarayeli, wiira orowe oRamothi-Xileyaadi akhwele weiwo?’ Mmosa aahimya etthu emosa, vano mukina aahimya etthu ekina. 20 Vano nlaikha nimosa+ naaheemela ohoolo wa Yehova nnahimya wiira: ‘Miyo kinoorowa onwoka’. Yehova aahikoha wiira: ‘Munrowa opaka sai eyo?’ 21 Nlaikha nlo naahihimya wiira: ‘Kinrowa owiiriha maprofeta awe ootheene olavula itthu sihikhanle seekeekhai’. Vano owo aahaakhula wiira: ‘Nyuwo munoowerya onwoka, tthiri munoowerya opaka eyo. Muroweke, mwiire siiso’. 22 Vano Yehova oowiiriha maprofeta anyu olavula itthu sihikhanle seekeekhai,+ masi-tho Yehova oohimya wiira enimookhumelelani ehasara”.
23 Sedekiya,+ mwaana a Kenaana, aahimwaattamela Mikaya+ onvaha epuraata,+ onahimya wiira: “Niireke ikuru sa Yehova sookihiya, sinalavula soorumeelakani nyuwo?”+ 24 Mikaya aahaakhula wiira: “Nyuwo munimoona eyo, nihiku munrowa anyu wiipitha ekwartu ya muhina”. 25 Mwene a wIsarayeli aahihimya wiira: “Mmukuxe Mikaya, munvahererye Amoni, xeefi a epooma ni Yowaxi mwaana a mwene. 26 Mwaaleele wiira: ‘Etthu onihimya awe mwene, tiila: “Mmutthukwele mulopwana ola mukhatteya,+ nave munvaheke ephaawu ni maasi vakhaani, mpakha miyo otthika ni murettele”’”. 27 Masi Mikaya aahihimya wiira: “Mwatthika ni murettele, weeso Yehova kholavunle ni miyo”.+ Nave aahincererya-tho oriki: “Nyuwo atthu ootheene, mwiiwe eyo”.
28 Siiso, mwene a wIsarayeli ni Yosafati mwene a oYuda, yaahirowa oRamothi-Xileyaadi.+ 29 Mwene a wIsarayeli aahimuhimeerya Yosafati wiira: “Miyo kinoorula ikuwo sa omwene, kiware ikuwo sa okhottoni wiira kihisuweliwe, masi nyuwo nwareke ikuwo sanyu sa omwene”. Siiso, mwene a wIsarayeli aahirula ikuwo sa omwene, owara ikuwo sa okhottoni anawana ekhotto. 30 Vano mwene a oSiiria aahaaruma maxeefi awe yeettiha ikaaro sa ekhotto oriki: “Ohikhale oniwanana anyu, okhale mwaamukhaani wala muulupale. Mwawane ni mwene a wIsarayeli paahi”. 31 Moowaakuveya, nuumala maxeefi ale yeettiha ikaaro saapuruliwa ni inama, onweha Yosafati, yaahihimya wiira: “Ola mwene a wIsarayeli”. Siiso yaahirukunuwa wiira yamutuphele, vano Yosafati aahipacerya okhuwela ovekelaka okhaliheriwa.+ Nto Yehova aahimukhaliherya, nave niinaano-ru Muluku aahimwaakiherya. 32 Okathi maxeefi ale yeettiha ikaaro sa ekhotto yoonale aya wiira ole khahiyo mwene a wIsarayeli, moowaakuveya yaahihiya omoomola.
33 Masi mulopwana mmosa, aahivonya nttheere* nawe, ohisuwelaka anvonyerya awe, omuhoma mwene a wIsarayeli opuro waalupanyiwa aya ekuleti awe ya eyuuma. Nto mwene aahimuleela mulipa-eettiha ekaaro awe ya ekhotto oriki: “Mukuruvari, mukikumihe okhottoni nno, okhala wiira nkireere ovulalihiwa”.+ 34 Ekhotto khiyaareere oviha nihiku nle, nto mwene a wIsarayeli aarimweemela mukaaroni mwawe ya ekhotto, ohoolo wa atthu a oSiiria mpakha makaaripi. Nto owo aahikhwa nuumala nsuwa okela.+