Yesaya
34 Nyuwo atthu a mulaponi, mwaattamele nno mwiiwe,
Nyuwo atthu ootheene, nvahe ephoole.
Nyuwo elapo ya vathi ni itthu sootheene siri memmo, nwiriyane,
Nyuwo elapo ni itthu sootheene siri memmo.
2 Yehova oonanariwa ni maloko ootheene,+
Owo oonanariwa ni anakhotto aya ootheene,+
Onrowa waapwetexa;
Onrowa owiiva.+
3 Atthu yiiviwe, anooriheliwa ota,
Wunkha wa mirutthu saya onoowela osulu;+
Miyaako sinoonaanihiwa ni ephome aya.+
4 Anakhotto ootheene a wiirimu, animuntta,
Nave erimu enimuupaanyiwa ntoko eroolu.
Anakhotto aya ootheene anoonyaala, amorele vathi,
Ntoko nikukhu noonyaala na mwiri wa ewuuva, nimmorela aya vathi,
Ni ntoko efiiku yoonyaala, enimora aya mmwirini mwaya.
5 “Wiirimu, espaata* aka enoosareya ephome.+
Eyo enookhuruwa wiira yaaphukele atthu a wEdomi,+
Yaawo kaalamunle aka wiira apwetexiwe.
6 Miyo Yehova khookhanala espaata. Eyo enoosareya ephome.
Eyo enoosareya ekortuura,+
Ni ephome ya ipwittipwitthi saamukhaani soolopwana, ni ipuri soolopwana,
Nave enoosareya ekortuura ya isyo sa ipwittipwitthi soolopwana.
Miyo Yehova kookhalana mukuttho kilokihenrye aka oBosira,
Kinrowa wiiva inama sinceene elapo ya wEdomi.+
7 Ipooyi soolopwana sa mutakhwani sinimwiiviwa vamosa ni inama iyo,
Ipooyi saamukhaani soolopwana sinrowa wiiviwa vamosa niiye suulupale.
Elapo aya enoosareya ephome,
Nave etthaya aya enoosareya ekortuura”.
8 Yehova oothanla nihiku onrowa awe wunla ikuhu,+
Mwaakha onrowa awe oliverya itthu sootakhala wiirihiwe aya muttetthe wa oSiyoni.+
9 Miro saya,* sinoothatuwa sikhale alikatarau,*
Nave ntthupi naya, nnoothatuwa nikhale enxoofere,
Etthaya aya enoothatuwa ekhale ntoko piriniixi onipatta.
10 Piriniixi owo, khonrowa ottiphaka othana ni ohiyu;
Mwiixi awe onrowa owelaka osulu mahiku ootheene.
Hata oviraka okathi munceene, elapo eyo khenrowa okhaliwaka;
Elapo eyo khenikhala-khala eviriwaka.+
11 Elapo eyo, enrowa okhaliwaka ni anamunyoma ni axipalame anlikana ni anapiphi,*
Ni isiisi ni anakhuku.
Orumeelaka mukhoyi ni epurumu, Muluku onoophima elapo ela,
Wiira ooniherye wiira khenrowa okhaliwaka ni enoopwetexiwa.
12 Khuuvo mukhulupale a elapo eyo onrowa okhala mwene,
Anamalamulela aya ootheene anoolakaseya.
13 Ipa soolipihiwa sa elapo eyo, sinoomela miri sa miiwa,
Oyele ni miiwa sinimunnuwa muhina mwa ipa soolipihiwa.
Alapwa a mutakhwani anrowa orupaka mulaponi memmo,+
Nave mipisa sinrowa okhalaka memmo.
14 Inama sa moothakoni sinrowa okumana ni alapwa a moothakoni,
Ipuri sa mutakhwani* sinoowiitthana apatthani aya.
Aayo, axipalame a ohiyu anookhalaka weiwo ni anoophwanyaka opuro woophumurya.
15 Inowa sinoopaka ipuru saya weiwo sireleke mooce* aya,
Iyo sinootothola ni sinimwaakhapelela axaana aya.
Aayo, axawawe anoothukumana weiwo, khula xawawe oothiyana ni mwaapara awe oolopwana.
16 Mwaavye muliivuruni mwa Yehova ni musome ni nsu noowiiwanyeya.
Khuuvo mwaamunama mmosa onrowa ohala;
Nave khuuvo ohinrowa okhalana mwaapara awe,
Okhala wiira mwaneene Yehova torumme,
Nave ikuru soowaarya sa Muluku ti sithukumannye inama iyo.
17 Ti yoowo othanlale etthu aarowa awe waavaha,
Nave ntata nawe nihaaphimela opuro athanleliwe aya.
Awo anrowa okhalaka memmo, hata oviraka okathi munceene;
Anrowa okhalaka memmo mahiku ootheene.