Silempwale ni Luka
17 Nuumala-vo, Yesu aahaahimeerya awiixutti awe wiira: “Okathi wootheene sinookhala itthu sinimwiiriha mutthu ottheka. Masi, ootakhaliwa ole onimwiiriha mutthu ottheka! 2 Fataari mutthu owo aatthukweleliwe muxikoni nluku nuulupale, khuriheliwa mphareya, ohiya omutthekiha mmosa a acikhaani ala.+ 3 Mwiikasoope. Akhala wiira munninyu ohootthekelani, mmuttaruxe.+ Attharuwa, mmulevelele.+ 4 Hata ootthekelakani ikwaha 7 nihiku nenlo, nave onarwa ikwaha 7 ohimyaka wiira: ‘Koottharuwa’, muhaana omulevelela”.+
5 Vano arummwa yaahimuhimeerya Pwiya wiira: “Muncererye waamini wahu”.+ 6 Pwiya aahiwaakhula wiira: “Vaakhanle wiira mookhalana waamini onlikana ni enuku yaamukhaanixa,* mwaamuhimeerya mwiri* ola wiira: ‘Mwiiphele-vo, murowe mwaiphatteye mphareya!’ Nto mwiri owo, waarowa owiiwelelani.+
7 “Ti pani a nyuwo oniira okhalanne ene epottha, elimaka mmatta ni ipooyi aahiiso okukhulaka inama, yahokolowa omatta, onahimeerya wiira: ‘Murwe-va, mwaakuveke nilyeeke vameesa’? 8 Khuuvo. Masi, owo onrowa ohimeerya wiira: ‘Mulokiherye yoolya aka. Nave nware ikuwo sa muteko sa murumeyi, mukirumeele, mpakha miyo omaliha olya ni owurya. Nuumala-vo, nyuwo munrowa olyaaka ni owurya’. 9 Nto yamaliha muteko aya, niireke onrowa oxukhurela epottha eyo? Nnaari. 10 Siiso-tho, nyuwo mwavara miteko sootheene murummwale anyu, muhimyeke wiira: ‘Hiyo na ipottha paahi. Khinimphwanela etthu. Etthu nipanke ahu, ti etthu naakhanle ahu oopaka’”.+
11 Okathi Yesu aarowa awe oYerusalemu, aahivira elapo ya oSamariya ni oGalileya. 12 Akelaka-ru muttetthe mmosa, alopwana 10 yaarina makokho,* yaahirowa okumana nuuwo. Masi awo, yeemenle ottaiwene.+ 13 Awo yaahikhuwela, yiiraka: “Yesu, Mwiixuttihi, munimorele ikharari!” 14 Yesu owoonaka-ru, aahiwiirela wiira: “Murowe mwaixooniherye wa anamukuttho”.+ Nto okathi yaarowa aya, yaahipenuxiwa.+ 15 Mmosa a yaawo, voonale awe wiira aahipenuxiwa, aahitthika onvuwihaka Muluku ni nsu noowiiwanyeya. 16 Vano, aahikokhora ohoolo wa Yesu, aahuurama mpakha vathi, omuxukhurelaka. Mulopwana owo aari musamariya.+ 17 Nto Yesu aahikoha oriki: “Kiira alopwana apenuxiwe yaari 10? Akina 9 ari vai? 18 Xeeni alopwana akina ahitthinke aya wiira anvuwihe Muluku, ohikhanle paahi mulopwana ola a nloko nikina?” 19 Vano Yesu aahimuhimeerya wiira: “Nvenye, muroweke. Waamini wanyu ohookhalihani saana”.+
20 Afarisi yaahimukoha ariki: “Omwene wa Muluku onrwa liini?”+ Yesu aahiwaakhula wiira: “Omwene wa Muluku khonrwa ntoko etthu enooneya. 21 Khaavo onrowa ohimya wiira: ‘Ola-va!’ aahiiso ‘Ole vale!’ Moone wiira, Omwene wa Muluku, ori eriyari anyu”.+
22 Vano aahaaleela awiixutti awe wiira: “Anoophiya mahiku munrowa anyu ophavelaka woona nihiku nimosa na Mwaana a Mutthu, masi khamunrowa woona. 23 Nave atthu anrowa woohimeeryakani so: ‘Mmooneke, ori vale’, aahiiso ‘Mmooneke, ori va’. Muhirowe aahiiso muhaatthare.+ 24 Veekeekhai, ntoko etari enaarya aya ekhumaka mpantta mmosa wa erimu mpakha mpantta mukina wa erimu, siiso-tho, tonrowa aya wiiraneya okathi+ onrowa awe wooniheriwa Mwaana a Mutthu.+ 25 Masi, owo ohaana toko ohaaxiwa vanceene ni okhoottiwa ni atthu a okathi ola.+ 26 Nave-tho, ntoko yaari aya mahiku a Nowe,+ siiso-tho, vanimwiiraneya mahiku a Mwaana a Mutthu:+ 27 atthu yaanilya, yaaniwurya, alopwana yaanithela ni athiyana yaanitheliwa, mpakha nihiku Nowe aakenle awe mukalawani.+ Nto epula ya mutaaseke yaahirupa, yaapwetexa ootheene aya.+ 28 Nave, ntoko yiiraneyale aya mahiku a Lothi:+ atthu yaanilya, yaaniwurya, yaanithuma, yaanitumiha, yaanaala ni yaaniteka. 29 Masi nihiku Lothi aakhumme awe oSodoma, waahimora mooro ni enxoofere* okhumaka wiirimu, khwaapwetexa ootheene aya.+ 30 Vanrowa wiiraneya siiso, okathi Mwaana a Mutthu onrowa awe wiixooniherya.+
31 “Nihiku nlo, ole ori vasulu va empa,* masi mireerelo sawe siri ene mpaani, ohikhuruwe wiira okuxe mireerelo iyo. Nave, ole ori omatta, ohitthike wiira akuxe itthu sihanle ottuli. 32 Mmuupuweleke mwaarawe Lothi.+ 33 Ole oniphavela woopola okumi awe, onompweteya. Masi, ole onimpweteya okumi awe, onimoopola.+ 34 Kinooleelani wiira, ohiyu yoowo, atthu anli anrowa orupa ekhaama emosa, vano mmosa onookuxiwa, masi mukina onrowa ohiiwa.+ 35 Nave anookhala athiyana anli anrowa oxilaka nxilo nimosa-ru. Mmosa onookuxiwa, masi mukina onrowa ohiiwa”. 36* —— 37 Nto awiixutti yaahimukoha ariki: “Pwiya, eyo enrowa wiiraneya woowi?” Yesu aahiwaakhula wiira: “Vari murutthu, vaavo tanithukumana aya amurumaasi”.+