Nehemiya
2 Mweeri wa Nisani,* eyaakha ya namuloko miili+ ya mwene Artaxerxe,+ yaahipwehiwa eviinyu ohoolo wawe, nto miyo kaahikuxa eviinyu eyo kinvaha mwene ntoko kaamakela aka opaka.+ Masi, nkaatonko oriipiwa murima ohoolo wawe. 2 Vano mwene aahikihimeerya wiira: “Xeeni muriipiwe anyu murima muhiwereiwaka? Woonasa wene, iwo oriipiwa murima paahi”. Nto miyo kaahoova vanceene.
3 Vano miyo kaahimuhimeerya mwene wiira: “Mwene okhaleke mahiku ootheene! Kihinrowa oriipiwa sai murima, epooma evithiwe amuhavinre aka epwexakasiwe ene ni mikhora saya sipahiwe ene ni mooro?”+ 4 Mwene aahikikoha wiira: “Exeeni muniphavela anyu?” Nto miyo kaahinvekela Muluku a wiirimu.+ 5 Kaahimuhimeerya mwene wiira: “Mwene oona oreerela, nave mwamweemererya murumeyi anyu ola, mukihiye kirowe oYuda epooma aavithiwe aya amuhavinre aka, wiira katthikele oteka”.+ 6 Nuumala-vo, mwene okilanthi ene vakhiviru ni pwiyamwene, aahikikoha wiira: “Mukwaha anyu owo munrowa omaliha mahiku makavi? Nave munitthika silini?” Siiso, mwene aahikeemererya orowa,+ nave kaahimuleela okathi kahaarowa aka oviriha kiri ene wuuwu.+
7 Vano kaahimuleela mwene wiira: “Mwene oona oreerela okivahererye ikarta wiira kaavahererye makuvernatoro a mpantta onikela nsuwa wa muro Eufrate,+ wiira akeemiherye ovira ni murettele mpakha ophiya oYuda, 8 ni ekarta wiira kanvahererye Asafi, kwarta a Etakhwa ya Mwene, wiira okivahererye matera para iviika sa mikhora sa Opuro Woolipihiwa+ wa Etemplo, sa ixiri sa epooma+ ni sa empa kinrowa aka okhala”. Nto, mwene aahikivaha ikarta,+ okhala wiira Muluku aka ooreera murima aanikikhaliherya.+
9 Vano, kaahiphiya mpantta onikela nsuwa wa muro Eufrate, kaavahererya makuvernatoro ikarta sa mwene. Nave mwene aahaaruma maxeefi a anakhotto ni anakhavalo wiira arowe ni miyo. 10 Okathi Sanibalati+ a oHoroni, ni mukhulupale* Tobiya+ a wAmoni,+ yaasuwenle aya eyo, yaahinyoonyiwa vanceene mwaha woophiya mutthu aarowa owiirela etthu yooreera atthu a Isarayeli.
11 Wookiseryani waya, kaahiphiya oYerusalemu, kimumula weiwo mahiku mararu. 12 Kaahivenya nuuhiyu, miyo ni alopwana vakhaani yaari ni miyo, nave nkaamulenle mutthu ele Muluku aka aahenle awe vamurimani vaka kaarowa aka opaka oYerusalemu. Nkaamukunxe mwaamunama, ohikhanle paahi ole kanwenle aka. 13 Kaahivenya nuuhiyu kiviraka Vamukhora wa Omukotini,+ kivira ohoolo wa Opuro Oniphattuwa Maasi wa Enowa Yuulupale, kirowa mpakha Mukhora wa Osalani.+ Kaahiwehaweha ixiri sa oYerusalemu, seiyo saapwexakasiwe, ni mikhora seiyo saapahiwe ni mooro.+ 14 Kaahitthara ephiro mpakha mukhora wa Opuro Oniphattuwa Maasi,+ ni Ntthiya na Mwene, nto khiwaakhanle opuro waaphiyerya wiira ovire mwaamunama kanwenle aka. 15 Masi kaahithipelela weetta nuuhiyu kirowaka oxepani+ kiwehawehaka exiri. Nuumala-vo kaahitthika, kiviraka Mukhora wa Omukotini. Siiso kaahitthikela owaani.
16 Makuvernatoro makina+ khiyaasuwela opuro kaarowa aka ni etthu kaavara aka, okhala wiira kiira kihaaleelale ayuda, anamukuttho, atthu oovuwa, makuvernatoro makina nnakhala anamuteko akina. 17 Wookiseryani waya, kaahaaleela wiira: “Nkawehani moota makhalelo ahu ari aya ooxankiha. Yerusalemu oopwexakasiwa, nave mikhora saya soopahiwa ni mooro. Murwe, nitthikele oteka ixiri sa oYerusalemu wiira nimalihe wuuliwa muru nno”. 18 Moottharelana, kaahaaleela moota Muluku aka ooreera murima aakikhalihenrye awe+ ni ele mwene aakihimenrye awe.+ Nuumala wiiwa eyo, awo yaahihimya wiira: “Nrowe nipacerye oteka moowaakuveya!” Nto awo yaahilipihana mukina ni mukhwaawe,* wiira avare muteko owo wooreera.+
19 Okathi Sanibalati a oHoroni, mukhulupale Tobiya+ a wAmoni,+ ni Gexemi a wArabia+ yaiwale aya eyo, yaahipacerya oniveeha+ ni oninyohola ariki: “Exeeni ela enipaka anyu? Niireke muninvirikanya mwene?”+ 20 Masi kaahaakhula wiira: “Muluku a wiirimu tonrowa oniiriha ovara saana muteko ahu,+ nave hiyo, arumeyi awe, nnoopacerya oteka. Masi nyuwo khamurina etthu yoohiyeriwa, nnakhala itireitu, wala mpantta wa itthu siniiraneya oYerusalemu”.+