Yoona
1 Yoona*+ mwaana a Amitayi, aahaakhela moolumo a Yehova yaahimya wiira: 2 “Nvenye murowe oNiinive,+ epooma yuulupale, mwalaleye ophukeliwa waya, okhala wiira koosuwela itthu sootakhala sinipaka aya”.
3 Masi, Yoona aahilakela omutthyawa Yehova orowaka oTaarisi, owo aahirowa oYope, weiwo amphwanye awe pakiti aarowa oTaarisi. Aahiliva epasaxe awe wiira oroweke ni atthu yaari mpakitini mme aarowa oTaarisi, omutthyawaka Yehova.
4 Nto Yehova aahikumiherya epheyo yuulupale mphareya, mawimpi yaahipacerya wunnuwa anahala vakhaani omusamiha pakiti. 5 Alipa animweettiha pakiti yaahipacerya woova vanceene, nto khula mmosa aahipacerya omukhuwelela muluku awe onvekelaka nikhaliheryo. Awo yaahipacerya orihela mphareya itthu saari mpakitini, wiira pakiti ohilemeliwe.+ Masi Yoona aari mpantta wa vathi wa pakiti, weiwo ampaathale awe orupaka vanceene. 6 Kapitau a pakiti aahimwaattamela Yoona onamuhimeerya wiira: “Xeeni munirupa anyu? Nvenye, munvekeleke muluku anyu! Woonasa wene, Muluku eekeekhai onoonimorela ikharari, nto khaninrowa okhwa”.+
7 Moottharelana, yaahihimeeryana wiira: “Nrowe nivonye esoorti+ wiira nimusuwele ti pani orina mulattu mwaha wa ehasara ela”. Siiso, yaahivonya esoorti, nto esoorti yaahimmorela Yoona.+ 8 Awo yaahimukoha Yoona wiira: “Xontte, munileele, ti pani orina mulattu mwaha wa ehasara ela ennikhumelela? Muteko anyu tuuvi? Munkhuma woowi? Ankhi elapo anyu tiivi, nave atthu anyu tani?”
9 Owo aahiwaakhula wiira: “Miyo ka muheeperi, nave kinimukokhorela Yehova, Muluku a wiirimu, yoowo opanke ephareya ni etthaya yoowuuma”.
10 Siiso, alopwana ale yaahitepa woova anamukoha wiira: “Mpankeni?” (Alopwana ale yaahisuwela wiira aamutthyawa Yehova, okhala wiira Yoona aahaaleela.) 11 Nave yaahimukoha wiira: “Niwiiriheni exeeni wiira ephareya ela emaaleleye?” Tthiri munamukhaya ole aamutepa mphareya. 12 Owo aahaakhula wiira: “Mukiteexe ni mukirihele mphareya, nto ephareya ela enoomaaleleya. Tthiri, koosuwela wiira epheyo ela yuulupale yookhumelenleni mwaha wa miyo”. 13 Masi alopwana ale yaahiimananiha vanceene omuttikiherya pakiti etthaya yoowuuma, masi khiyaawerya, okhala wiira ephareya ele ni munamukhaya aamutepa okhala ootupa.
14 Vano, alopwana awo yaahimukhuwelela Yehova ahimyaka wiira: “Khoo Yehova, xontte, muhinihiye nikhwaaka mwaha wa mulopwana ola! Khoo Yehova, muhinivahe nthowa mwaha woomwiiva mutthu ohitthenke etthu, okhala wiira eyo ti etthu eniphavela anyu”. 15 Awo yaahimuteexa Yoona amurihela mphareya, nto ephareya yaahimaaleleya. 16 Siiso, alopwana ale yaahimoova* vanceene Yehova,+ yaahinvaha mukuttho Yehova, nave yaahimmana natiri.
17 Vano Yehova aahiruma ehopa yuulupale wiira emmirye Yoona, nto Yoona aahikhala mmirimani mwa ehopa mahiku mararu, othana ni ohiyu.+