Miteko sa Arummwa
18 Nuumala-vo, Paulo aahikhuma wAthena, onarowa oKorinto. 2 Weiwo, aahimphwanya muyuda mmosa aihaniwa Aakila+ ni mwaarawe, aihaniwa Prisila. Aakila owo, aayariwe oPonto, nave amphiya-ru okhumaka wItaalia, okhala wiira mwene Klaudio, aahiruma wiira ayuda ootheene akhume oRoma. Nto Paulo aahirowa waaxukurya. 3 Okhala wiira ootheene aya yaarina muteko mmosa-ru wa opaka itenta,* Paulo aahikhala vatthokoni vaya,+ onavara muteko hoothe. 4 Isaabadu sootheene,+ Paulo aanilavula myaha* musinagoga*+ ni aaniwiiriha ayuda ni akereku okupali moolumo awe.
5 Okathi Sila+ ni Timootheyo+ yaaphiyale aya akhumaka oMasedonia, Paulo aahikhalela nthiti wiixuttiha nuulumo na Muluku, owooniheryaka ayuda wiira Yesu ti Kristu.+ 6 Masi okathi awo yaathipelela aya onvirikanya ni onveeha, Paulo aahitatha ntthupi na malaya awe,+ onaahimeerya wiira: “Khula etthu enrowa wookhumelelani, ti nyuwo murina nthowa.+ Miyo nkirina nthowa na ephome anyu.+ Okhuma olelo orowa ohoolo, kinrowa waalaleeryaka atthu ahikhanle ayuda”.+ 7 Siiso, aahikhuma opuro* ole, onarowa vatthokoni va mulopwana mmosa aihaniwa Tiisio Naxariya, yoowo aamukokhorela Muluku. Empa awe yaari waattamela esinagoga.* 8 Nto Krispo,+ mukhulupale aahoolela musinagoga,* aahiwaamini Apwiya, vamosa ni atthu ootheene a vatthokoni vawe. Nave akorinto anceene yaiwale ihapari sooreera, yaahaamini ni yaahipatisiwa. 9 Ohiyu, Paulo aahiloha owiiwaka Apwiya ahimyaka wiira: “Muhoove etthu, masi nlelo mulaleyeke, nnakhala muhimaale, 10 okhala wiira miyo kiri ni nyuwo,+ nave khuuvo onrowa wootuphelani wiira ookumiheryeni ehasara. Mweekeekhai, aakhala atthu anceene epooma ela anrowa okaamini”. 11 Siiso, Paulo aahikhala weiwo eyaakha emosa ni miyeeri 6, owiixuttihaka nuulumo na Muluku atthu a epooma ele.
12 Okathi Gaalio aari awe kuvernatoro* a wAkhaya, ayuda yaahiiwanana, amutuphela Paulo, anamuroiha opuro waaphukiwa milattu. 13 Awo yaahihimya wiira: “Mulopwana ola oniwiixuttiha atthu omukokhorela Muluku mwa enamuna enivirikanya nlamulo”. 14 Masi okathi Paulo aaphavela awe olavula, Gaalio aahaahimeerya ayuda wiira: “Nyuwo ayuda, vakhala wiira mulopwana ola oopaka etthu yoohiloka aahiiso yootakhala, weeso kinimoowiriyanani oratteene. 15 Masi vakhala wiira munivaanyihana mwaha wa moolumo, masina ni nlamulo nanyu,+ mphukeke mmansinyu. Miyo nkiniphavela ophuka myaha iyo”. 16 Siiso, Gaalio aahiwoomola opuro ole waaphukiwa milattu. 17 Vano ootheene aya yaahinvara Soositene,+ mukhulupale aahoolela musinagoga,* anapacerya ommana opuro ole waaphukiwa milattu. Masi Gaalio, khaaphavela wiirela mpantta itthu iyo, nnakhala vakhaani.
18 Nuumala Paulo okhala mahiku manceene oKorinto, aahaalaxerya anna, onawela ekalawa orowaka oSiiria, ohooliwaka ni Prisila ni Aakila. Nto vaaphiyale aya oKenkhere,+ Paulo aahimettha ikharari sawe, okhala wiira aahimmana natiri. 19 Okathi yaaphiyale aya wEefeso, Paulo aahimuhiya Prisila ni Aakila weiwo. Owo aahikela musinagoga,* onawiixuttiha ayuda, aakhaliheryaka wiiwexexa Soolempwa.+ 20 Nnaamwi awo yanvekela wiira ohale mahiku manceene, Paulo kheemerenrye. 21 Masi aahaalaxerya, aahimeerya wiira: “Yehova* aphavela vale, kinootthikela wenno”. Nto aahiwela ekalawa wEefeso, 22 onarowa oKesareya. Weiwo, aahirowa* oxukurya muloko. Nuumala-vo, aahikhuruwa orowaka wAntiyokiya.+
23 Nuumala oviriha mahiku vakhaani wAntiyokiya, Paulo aahikhuma, onarowa oxukurya mapuro manceene a ilapo sa oGalasia ni oFiriixia,+ aalipihaka awiixutti ootheene.+
24 Okathi ene yoowo, muyuda mmosa aihaniwa Apolo,+ yoowo aayariwe wAlexandriya, aahiphiya wEefeso. Mulopwana owo aari oorattela olavula ni aanisuwela saana Soolempwa. 25 Mulopwana owo aahiixuttihiwa ephiro ya Yehova.* Nave okhaliheriwaka ni ikuru soowaarya, owo aanikhalela nthiti olaleya ni wiixuttiha oratteene itthu saamuhimya Yesu, nnaamwi aasuwenle opatiso wa Yohani paahi. 26 Apolo owo aahipacerya olavula ohoovaka etthu musinagoga.* Nto okathi Prisila ni Aakila+ yaamwiiwale aya, yaahimukuxa, amutthokiherya oratteene ephiro ya Muluku. 27 Vano, okhala wiira Apolo aaphavela orowa wAkhaya, axinna yaahaalepela epaphelo awiixutti a weiwo, yaatumereryaka wiira amwaakhele saana. Vaaphiyale awe, owo aahaakhaliherya vanceene ale yaaminni mwaha wa oreereliwa murima vaalupale ni Muluku. 28 Tthiri, Apolo aanilavula ohoolo wa atthu ootheene ni nthiti nuulupale, owooniheryaka oratteene ayuda wiira soowiixuttiha saya saari soowoothiwa. Nave aaniwooniherya ni Soolempwa, wiira Yesu ti Kristu.+