Isaalimu
Para tiretoore a isipo. Nsipo ninlavula sa “Muhikipwetexe”. Nsipo na Asaafi.+
75 Ninnooxukhurelani, nyuwo Muluku, ninnooxukhurelani;
Nsina nanyu nri vakhiviru,+
Atthu anoolaleya miteko sanyu sootikiniha.
2 Nyuwo munihimya wiira: “Okathi kinithanla aka wiira kiphuke mulattu,
Miyo kinniphuka mwa xariya.
3 Okathi elapo yaatetereya aya vamosa ni atthu ootheene yaakhala memmo,
Ti miyo kaalipinhe ipilaari saya”. (Selahi)
4 Miyo kinnaaleela atthu oowiittottopa, kiiraka: “Muhiittottopeke”,
Nave kinnaaleela atthu ootakhala wiira: “Muhiittottopeke mwaha wa okhalana ikuru.
5 Muhiittottopeke mwaha wookhalana ikuru* sinceene,
Nnakhala muhilavuleke mwiittottopaka.
6 Nttittimiho na mutthu khaninrwa onikhuma nsuwa,
Nnakhala onikela nsuwa, aahiiso osuuli.
7 Muluku tori Mulipa-oophuka milattu.+
Owo onnimuyeviha mutthu mmosa, masi onnimunnuwiha mutthu mukina.+
8 Yehova ookuxa ekaalisi mmatatani mwawe;+
Eviinyu ennikhuma nipheru ni ti yoowaawa.
Mweekeekhai, onimwaamwarexela eviinyu eyo atakhali ootheene anikhala mulaponi,
Awo anoowurya, mpakha omaliha”.+
9 Mahiku ootheene, kinoolaleyaka itthu Muluku opanke awe;
Kinimwiipaka isipo, kimuttottopelaka Muluku a Yakobe.