Yesaya
5 Xontte, mukihiye kimwiipele nsipo ole kinimphenta aka,
Kiipe nsipo ninlavula sa ole kinimphenta aka ni ematta awe ya ewuuva.+
Ole kinimphenta aka, aahikhalana ematta awe ya ewuuva mukerekhere mwa nipuro noottukhuwa noowunttelana.
2 Owo aahipatthula etthaya ni aahikumiha maluku.
Aahaala ewuuva yooxeerya ni yooreera.
Eriyari ya ematta eyo, aahiteka empa yoorakamela musulu,
Ni aahithipa nipuro ninnyakattiwa ewuuva.+
Owo aalipelela wiira aamuruwerya ewuuva yooreera,
Masi aaruwenrye ewuuva yoohiloka paahi.+
3 “Vano, nyuwo munikhala oYerusalemu ni nyuwo alopwana a oYuda,
Xontte mukiphukele miyo ni ematta aka ya ewuuva.+
4 Exeeni-tho yaakhanle aka oowiiriha ematta aka ya ewuuva,
Masi kihiwenrye aka wiiriha?+
Miyo kaalipelela wiira kinooruwerya ewuuva yooreera,
Nto xeeni kihalaka oruwerya ewuuva yoohiloka paahi?
5 Xontte, vano mukihiye kooleeleni,
Etthu enrowa aka wiiriha ematta aka ya ewuuva:
Miyo kinookumiha ekintaali kitekelenle aka,
Nto ematta eyo enoopahiwa.+
Kinrowa opwexakasa ekintaali eyo ya maluku,
Nto ematta eyo enrowa onyakeliwa.
7 Ematta ya ewuuva ya Yehova a anakhotto, ti nloko na Isarayeli;+
Itthu aalale awe saamusivela, ti alopwana a oYuda.
Owo aalipelela wiira atthu yaarowa ophukaka milattu ettharaka exariya,+
Masi awo khiyaatthara nlamulo.
Owo aalipelela wiira atthu yaarowa othokoreryanaka mwa xariya,
Masi iiwa okhuwela wa atthu yaahaaxiwa”.+
8 Aatakhaliwa atthu yaale anikhalana ipa sinceene,+
Ni ale anikhalana imatta sinceene,+
Mpakha ohihala opuro para atthu akina,
Nto nyuwo munakhala axineene mulaponi!
9 Miyo koomwiiwa Yehova a anakhotto, olaphaka wiira:
Hata ipa iyo sinceene siri ene suulupale ni sooreera,
Sinrowa opwexakasiwa,
Nave khuuvo onrowa okhalaka-mo.+
10 Ikitaari ixexe sa ewuuva, sinrowa oruwerya epaathu* emosa paahi ya eviinyu,
Nave ehoomeri* emosa ya mmiso, enrowa okhuma eefa* emosa paahi ya ipyo.+
11 Aatakhaliwa atthu yaale anivenya voosiisu, wiira awurye itthu soohapala,+
Yaawo anikhala mpakha ohiyu, ni mpakha eviinyu waahapala ahinaisuwela.
12 Ifesta saya, awo annikhalana aviola ni ikaruma sa isipo sirina mikhoyi,
Ni malapa macikhaani,* ni iphivi* ni eviinyu;
Masi awo khanithokorerya miteko sa Yehova,
Nnakhala khanoona itthu onipaka awe.
13 Atthu aka anoorowa weepotthani,
Okhala wiira awo khanikisuwela;+
Makhulupale aya anoovoliwa etala,+
Nave atthu ootheene anoovoliwa ntthona.
14 Nto Mahiye* ahincerereya,
Aahula eyano aya vanceene;+
Siiso, makhulupale, ni atthu anceene aninyakula, ni ale anitthapa,
Anookhuruwela mmahiye memmo.
15 Atthu anooyevihiwa,
Atthu animuulihihiwa muru,
Nave ale oowiittottopa, animuulihihiwa muru.
16 Yehova a anakhotto, onoovuwihiwa mwaha wa ophukela wawe;*
Muluku eekeekhai, Muluku Oowaarya,+ onooreeriha nsina nawe orumeelaka exariya.+
17 Ipwittipwitthi sinrowa olyaaka mulaponi-mmo, siisaale siniira aya mapuro silimalenle aya olyihiwa;
Nave anamurwa anrowa olyaaka mapuro yaale khalai inama saalya aya saana.
18 Aatakhaliwa ale anootha! Ni wootha waya, awo annipurula itampi,
Siisaale enama enipurula aya ekaaro ni mikhoyi.
19 Awo anihimya wiira: “Mmuhiye Muluku aakuve;
Miteko sawe, sirwe voowaakuveya wiira noone.
Yiireye etthu oniphavela awe Muluku Oowaarya a wIsarayeli,
Wiira hiyo noone!”+
20 Aatakhaliwa ale anihimya wiira etthu yooreera ti yootakhala, nave etthu yootakhala ti yooreera,+
Ale anirantteliha epiphi ni okokola, nave okokola ni epiphi,
Ale anihimya wiira etthu yoowaawa ti yoosiva, nave etthu yoosiva ti yoowaawa!
21 Aatakhaliwa ale aniixoona okhalana miruku,
Ni aniixoona okhalana ankhili!+
22 Aatakhaliwa atthu yaale anisuwelexiwa mwaha wa owurya eviinyu yinceene,
Yaale anisuwela saana otakaaha soowurya soohapala.+
23 Aatakhaliwa atthu yaale aninvaha erasau mutakhali mwaha wa okunyariwa,*+
Ni ale animukhoottela exariya,+ mutthu orina erasau!
24 Tivonto, siisaale mooro onipaha aya malaxi,
Nave malaxi oowuuma anivya aya vaikho,
Siiso-tho, mitathaari saya sinimuntta,
Nave ifilori saya sinoomwara-mwareya ntoko ntthupi,
Okhala wiira awo aakhootta nlamulo na* Yehova a anakhotto,
Ni khacanle nuulumo na Muluku Oowaarya a wIsarayeli.+
25 Nave-tho, Yehova onrowa onanariwa vanceene ni atthu awe,
Nave onimookola ntata nawe, aamane.+
Miyaako sinootetereya,
Nave mirutthu sa atthu awo, sinrowa okhala ntoko ikokhola mustaraatani.+
Mwaha wa itthu iya sootheene, onanariwa wa Muluku khomanle,
Masi nlelo ohookola ntata nawe wiira aamane.
26 Owo onimweemexa ekanyeryo wiira aavahe esinaale atthu a nloko na ottaiwene;+
Onoowiipela muturi, wiira arwe akhumaka omalenle elapo;+
Mwiiwe! Awo annoorwa atthimakaka.+
27 Atthu awo khavenle aahiiso khanimora.
Khuuvo sininvola ikhove nnakhala onirupa.
Esintu awanre aya khenimora-mora,
Nnakhala mikhoyi sa isantaalya saya khasinikhwaseya.
28 Mattheere* aya ootheene toothokowa,
Nave miyuura saya sootheene ti sookokheya.
Itthottopwa* sa ikhavalo saya ti soolipa ntoko nluku,
Nave maroota a ikaaro saya anlikana ni nayuupuri.+
29 Oruma waya onlikana ni murukulu wa kharamu;
Awo annoopa murukulu ntoko akharamu acikhaani.+
Animoopa murukulu ni anoovara enama aya,
Anookuxa enama eyo, ni khuuvo onrowa waakiherya.
30 Nihiku nlo, nuumala ovara enama eyo, awo animoopa murukulu,
Ntoko oruma wa ephareya.+
Atthu ootheene anrowa owehaka elapo eyo, anrowa woonaka epiphi yoowoopiha;
Hata nsuwa ninrowa oriipa, mwaha wa meeku.+