Aamulepenle Awe Tito
2 Masi nyuwo, mwiixuttiheke itthu sinivarihana ni mwiixuttiho wooreera.*+ 2 Alopwana oowuuluvala ahaana osuwela wiiphimela itthu sootheene, ekhaleke oororomeleya, yuupuweleke vookhalela, ekhalaneke waamini woolipa, aphenteke vanceene ni evileleke vanceene. 3 Siiso-tho, athiyana oowuuluvala ahaana okhalana mweettelo onimuttittimiha Muluku, ehiwootheryeke atthu, ehikhaleke ipottha sa eviinyu, yiixuttiheke itthu sooreera, 4 wiira aweryeke waavaha miruku* athiyana oohuuluvala, wiira athiyana awo oohuuluvala yaaphenteke axiiyaya, yaaphenteke anaaya, 5 yuupuweleke vookhalela, ekhalaneke mweettelo wooloka, evareke miteko sa vatthokoni vaya,* ekhaleke ooreera murima, ewiiweleleke axiiyaya voohinlaseya,+ wiira nuulumo na Muluku nihiveehiweke.
6 Nave-tho, muhihiyeke waatumererya amiravo wiira yuupuweleke vookhalela.+ 7 Mukhaleke ntakiheryo na miteko sooreera, mwa itthu sootheene. Mwiixuttiheke itthu sooreera,* mooniheryaka ororomeleya,+ 8 murumeelaka moolumo ooreera* atthu akina ahinwerya aya ovaanyiha,+ wiira ale anivaanyiha yuuliwe muru, mwaha woohiphwanya etthu yootakhala wiira enihimyane.+ 9 Ale ari ipottha, ewiiweleleke ale anaavarela aya muteko ahinlaseyaka ni mwa itthu sootheene.+ Ephaveleke waahakalaliha, ehaavaanyiheke, 10 ehiwiiyeryeke,+ masi yooniheryeke okhala oororomeleya vanceene, wiira mwa itthu sootheene, ereeriheke mwiixuttiho wa Moopoli ihu, Muluku.+
11 Mweekeekhai, Muluku ohooniherya oreera wawe murima wuulupale, weiwo onaaphwanyiha woopowa atthu a mikhalelo sootheene.+ 12 Oreera murima iwo, onniniixuttiha okhootta itthu sootheene sinivirikana ni ele Muluku oniphavela awe, vamosa ni itthu sootakhala sa olumwenku ola.+ Nave-tho, onniniixuttiha okhala olumwenku ola,*+ nrina ene muupuwelo wookhalela ni exariya ni omoova Muluku. 13 Nave ninniwehererya wiiraneya nlipelelo noohakalaliha,+ okhumelela woovuwa wa Muluku muulupale ni wa Moopoli ihu Yesu Kristu. 14 Owo oovaha okumi awe mwaha wa hiyo,+ siiso oonoopola+ itthu sootheene sootakhala ni oonireeriha wiira nikhale atthu awe, aniwerya ovara miteko sooreera ni nthiti.+
15 Muhihiye owiixuttiha atthu itthu iya ni waatumererya.* Nave nwooniheryeke vatthenke aya, okhala wiira mookhalana owerya wa opaka itthu iyo.+ Muhimuhiye mutthu ooyeveihakani.*