Amoosi
5 “Nyuwo atthu a nloko na Isarayeli, nwiriyane moolumo ala anooleelaakani ntoko nsipo na wiikhupanyerya:
2 ‘Mwali Isarayeli oomora,
Owo khoniwerya-tho ovenya.
Oonyanyaliwa elapo awe,
Khuuvo oninvenxa’.
3 “Etthu onihimya awe Pwiya Muulupalexa Yehova, tiila:
‘Epooma enirowa okhottoni ni alopwana 1.000, anrowa ohala 100,
Nave epooma enirowa okhottoni ni alopwana 100, anrowa ohala 10 para nloko na Isarayeli’.+
4 “Etthu Yehova onaaleela awe atthu a nloko na Isarayeli, tiila:
‘Mukiphaveleke, wiira mukhaleke akumi.+
5 Muhiroweke okokhorela oBeteli,+
Nnakhala muhirowe oXiligali+ aahiiso muhivire oBeri-Xeba,+
Okhala wiira Xiligali onooroihiwa weepotthani,+
Nave Beteli onoomala-malihiwa.*
6 Mumphaveleke Yehova ni mukhaleke akumi,+
Wiira ohaapwetexe atthu a osuulu wa Yosefe ntoko mooro,
Mooro owo onoopaha oBeteli, ohikhalaka mutthu onwerya ottipiherya.
7 Nyuwo muhiiriha exariya okhala etthu yoowaawa,
Nave moorihela vathi exariya.+
8 Ole opanke ekurupu ya itheneeri eniihaniwa Khiima* ni ekurupu ya itheneeri eniihaniwa Khesiili,*+
Ole oniiriha epiphi okhala waarya wa voosiisu,
Ole oniiriha othana okhala wooriipela ntoko ohiyu,+
Ole onithukumanya maasi a mphareya,
Wiira omwarexele mulaponi,+
Nsina nawe ti Yehova.
9 Owo onimwaapwetexa atthu oowerya vootutuxerya
Nave onoopwetexa mapuro oolipihiwa.
10 Awo annaanyokha ale anaapwapwela atthu vamukhora wa epooma,
Nave annaathanya ale anilavula ekeekhai.+
11 Okhala wiira munnimwiiriha mulipa-oohaawa waalukari imatta,
Nave munnikuxa ipyo sawe ntoko mpoosito,+
Khamunrowa otthikela okhala ipa sa maluku oolokiheriwa mutenke anyu,+
Nnakhala khamunrowa otthikela owurya eviinyu ya ematta sa ewuuva yooreera mwaalale anyu.+
12 Tthiri miyo kinnisuwela waatta wa ikrime sanyu,
Nave wunnuwa wa itampi sanyu.
Nyuwo munnimuhaaxa naxariya,
Munneemererya okunyariwa,
Nave munnikhootta itireitu sa mulipa-oohaawa vamukhora wa epooma.+
13 Masi, ale arina osuwela anrowa omaala okathi owo,
Okhala wiira onrowa okhala okathi wa maxakha.+
Vano Yehova Muluku a anakhotto okhale ni nyuwo,
Ntoko siisaale munihimya anyu wiira ori ni nyuwo.+
15 Munyokheke itthu sootakhala, nave mphenteke itthu sooloka,+
Mweemereryeke wiira exariya ekhaleke vamukhora wa epooma.+
Woonasa wene, Yehova Muluku a anakhotto,
Onimwaamorela ikharari atthu ahanle a etthoko ya Yosefe”.+
16 “Masi etthu onihimya awe Yehova, Yehova Muluku a anakhotto, tiila:
‘Mapuro ootheene oowaatta atthu onimunliwa,
Nave istaraata sootheene atthu anoohimyaka wiira: “Nootakhaliwa, nootakhaliwa!”
Awo anoowiihana alimi wiira yinleke,
Nave anoowiihana alipa-oowiikhupanyerya wiira yinleke’.
17 ‘Imatta sootheene sa ewuuva onimunliwaka,+
Okhala wiira kinoovira eriyari anyu wiira koohukhumuni’. Yehova tonihimya.
18 ‘Aatakhaliwa ale anlipelela nihiku na Yehova!+
Munuupuwela wiira nihiku na Yehova enrowa wiiraneya exeeni?+
Ninrowa okhala nihiku na epiphi, ohiya na waarya.+
19 Ninrowa olikanaka ni mulopwana onimutthyawa kharamu, masi onakumana ni mwaamunama a mutakhwani oniihaniwa ursu.
Nave okathi onikela awe mpaani mwawe, onavarela exiri, onalummwa ni enowa.
20 Nihiku na Yehova kiira ninrowa okhala nihiku na epiphi, ohiya na waarya?
Kiira ninrowa okhala nihiku nooriipela, ohiya nookokola?
21 Miyo kinninyokha, kinnithanya ifesta sanyu,+
Nave nkinsiveliwa ni wunkhela wa soovaha sanyu okathi wa mithukumano sanyu suulupale.
22 Hata mukivahaka soovaha sootheene para opahiwa,
Miyo nkinrowa osiveliwa ni soovaha iyo.+
Nave nkinrowa osiveliwa ni mikuttho sanyu sa opatthani sa inama sooneneva.+
24 Mweemererye wiira exariya esareyeke ntoko maasi,+
Nave exariya elikaneke ni opuro oniphattuwa maasi, ohinuuma.
25 Nyuwo atthu a Isarayeli,
Niireke mwaanikiruuhela mikuttho ni soovaha okathi mwaari anyu moothakoni iyaakha 40?+