Silempwale ni Luka
7 Okathi Yesu aamalihale awe waaleela itthu iya atthu ale, aahiphiya oKafarnawu. 2 Vano, aahikhala weiwo mukhulupale mmosa a anakhotto, aarina murumeyi awe amphentexa awe. Murumeyi owo aahiwereiwa vanceene, onahala okhwa.+ 3 Okathi mukhulupale owo vaiwale awe olavuliwaka Yesu, aahaaruma makhulupale makina a ayuda orowa okumana ni Yesu, wiira yanvekele wiira ompenuxe murumeyi awe. 4 Atthu awo yaahirowa omphwanya Yesu, anamuxonttela amuthipelelaka wiira: “Owo onniphwanela wiira mmukhaliherye, 5 okhala wiira onniphenta nloko nahu ni ti yoowo otenke esinagoga* ahu”. 6 Siiso, Yesu aahirowa ni yaawo. Masi ohalaka ophiya etthoko eyo, mukhulupale owo aahaaruma apatthani awe omuleela Yesu wiira: “Atokweene, ahixanke, maana miyo nkiniphwanela wiira iwo akele mpaani mwaka.+ 7 Tivo, nnakhala miyo nkoonale oreerela orwa okumana ni iwo. Masi alavule paahi, wiira murumeyi aka openuwe, nto owo onookhala saana. 8 Tthiri aakhala atthu anikilamulela, nave-tho miyo kookhalana atoropa kinaaruma aka. Kamwiirela toropa mmosa wiira: ‘Murowe iwe!’, owo onnirowa. Nave kamwiirela mukina wiira: ‘Murwe!’, owo onnoorwa. Vano karuma epottha aka wiira: ‘Nvare ela!’, eyo ennivara”. 9 Nuumala Yesu wiiwa itthu iya, aahitikinihiwa vanceene, onahimeerya muttitthi ole wa atthu waamutthara wiira: “Kinooleelani wiira, hata wIsarayeli nkinamphwanye mutthu orina waamini wuulupale siisa”.+ 10 Okathi atthu ale yaarummwale yaatthikenle aya owaani, yaahimphwanya murumeyi owo aawereiwa, ori ene saana.+
11 Voohipisa, Yesu aahirowa epooma yaihaniwa Nayini. Nto awiixutti awe yaahimutthara vamosa ni muttitthi muulupale wa atthu. 12 Yesu, ohalaka ophiya vamukhora wa epooma, aahikumana ni atthu yaakunxe murutthu. Owo aari mwaana mwaamulopwana mmoseene,+ a muthiyana naamukhweli. Nave muttitthi muulupale wa atthu waakhuma opooma, waanimuhoola muthiyana owo. 13 Okathi Pwiya Yesu, anwehale awe muthiyana ole, aahimmorela ikharari,+ onamuhimeerya wiira: “Mmaale wunla”.+ 14 Vano Yesu aahaattamela nrepa,* khuvara. Atthu yaateexale nrepa nle yaaheemela. Yesu aahiira: “Mmiravo, kinooleelani wiira: Nvenye!”+ 15 Nto mmiravo ole aakhwiiye aahivenya, okilaathi, onapacerya olavula. Yesu aahaavahererya mmiravo owo amamawe.+ 16 Atthu ootheene yaahoova vanceene, ananvuwiha Muluku, ariki: “Oonikhumelela profeta muulupale”.+ Nave yaanihimya wiira: “Muluku ohaamorela ikharari atthu awe”.+ 17 Ehapari ela yaamuhimya Yesu, yaahimwareela oYudeya wootheene ni ilapo sootheene soowaattamela.
18 Vano, awiixutti awe Yohani yaahimuleela itthu iya sootheene.+ 19 Siiso, Yohani aahaathanla awiixutti awe anli, aaruma orowa okumana ni Pwiya ni omukoha wiira: “Nyuwo ti Kristu yoole onimulipelela ahu,+ aahiiso onimoorwa mukina?” 20 Okathi vaaphiyale aya, alopwana awo yaahimukoha Yesu wiira: “Yohani Mpatisa tonirumme wookohani, wiira: ‘Nyuwo ti Kristu yoole onimulipelela ahu, aahiiso onimoorwa mukina?’” 21 Ewoora ene yeele, Yesu aahaapenuxa atthu anceene yaawereiwa iretta+ soovirikana ni atthu anceene yahoona yaaniwerya woona. Nave aahoomola malaikha ootakhala. 22 Yesu aahiwaakhula wiira: “Murowe mwamuleele Yohani itthu siniiwa anyu ni sinoona anyu: Alipa-oohoona, vano annoona.+ Alipa-oorakala, anneetta oratteene. Anamakokho,* annipenuxiwa. Alipa-oohiiwa, vano anniiwa.+ Alipa-ookhwa, annihihimuxiwa. Atthu oohaawa, annilaleeriwa ihapari sooreera.+ 23 Oohakalala tuule ohinihiya waamini mwaha wa miyo”.+
24 Nuumala awiixutti a Yohani okhuma, Yesu aahipacerya olavula ni mittitthi iye sa atthu, omuhimyaka Yohani, oriki: “Mwaaronwe woona exeeni woothakoni? Mwaaronwe woona mutathi onittikinyiwa ni epheyo?+ 25 Nto mwaaronwe woona exeeni? Niireke mwaaronwe onweha mulopwana owanre ene malaya a musurukhu munceene?+ Atthu aniwara ikuwo sooreerexa ni atthu oopuha, taale anikhala ipa sa mamwene. 26 Vano-nto, mwaarowenle-ni? Mwaaronwe onweha profeta? Aayo! Kinooleelani wiira, owo muulupale onvikana profeta.+ 27 Ola ti yoole aahimmwale ni soolempwa wiira: ‘Mwiiwe! Kinnimuruma namitthaka* aka ohoolo wanyu* wiira oolokiheryeni ephiro’.+ 28 Kinooleelani wiira, eriyari ya apinaatamu, khuuvo mutthu ori muulupalexa onvikana Yohani. Masi, ole ori mwaamukhaanixa Moomweneni mwa Muluku, ti muulupalexa onvikana owo”.+ 29 (Okathi atthu ootheene ni alipa-ooliviha mpoosito yaiwale aya eyo, yaahimuhimya Muluku okhala naxariya, maana yiira apatisiwe ene ni Yohani.+ 30 Masi, afarisi ni atthu yaasuwela saana Nlamulo, khiyaaphavela opaka ele Muluku aaphavela awe,+ okhala wiira khiyaapatisiwe ni Yohani).
31 “Vano, kaalikanyihe naani atthu a mahiku ala? Atthu ala anlikana naani?+ 32 Atthu ala anlikana ni anamwane acikhaani akilanthi omerkaatu, anikhuwelelana, yiiraka: ‘Nihoopa iphivi,* masi nyuwo khamwiinale; noowiipelani masipo ooriipiha murima, masi nyuwo khamuriipiwe murima’.* 33 Mwa enamuna emosa-ru, Yohani Mpatisa onnitthukwa ni khoniwurya eviinyu,+ masi nyuwo munihimya wiira: ‘Owo ookhalana nlaikha nootakhala’. 34 Vano Mwaana a Mutthu onnoolya ni onniwurya eviinyu, masi nyuwo munihimya wiira: ‘Mmooneke mutthu ole, namalya ni oniwurya vootepana. Nave owo mpatthani a alipa-ooliviha mpoosito ni anatampi!’+ 35 Mweekeekhai, ankhili a mutthu annooneya ni itthu sa xariya onipaka awe”.+
36 Vano nfarisi mmosa aahithipelela omulattula Yesu wiira alye owannyawe. Siiso, Yesu aahirowa owannyawe nfarisi owo, khukilaathi onalya.* 37 Nto epooma ele aahikhala muthiyana mmosa aasuweliwa okhala natampi. Muthiyana owo, aahisuwela wiira Yesu aamoolya* owannya awe nfarisi. Vano, aahiruuha ekarafa* ya makhura oowunkhela.+ 38 Owo aahikokhora aattamenle ene inawu sa Yesu, onapacerya wunla. Vano muthiyana owo, aaninaaniha inawu sa Yesu ni maithori awe, onapuputtha ni ikharari sawe. Nave-tho, aanipexari ni aanihela makhura oowunkhela inawu sa Yesu. 39 Voonale awe ele, nfarisi ole aamulattunle Yesu, aahipacerya wuupuwela, oriki: “Mulopwana ola aari profeta eekeekhai, ammusuwela muthiyana ola oninvara ni aamusuwela makhalelo awe, wiira muthiyana ola natampi”.+ 40 Masi Yesu aahimuhimeerya nfarisi owo wiira: “Simoni, ehaavo etthu eniphavela aka wooleelani”. Simoni aahaakhula oriki: “Mwiixuttihi, muhimyeke!”
41 “Mulopwana mmosa onikophiha musurukhu, aahikopheliwa ni alopwana anli: Mmosa, aamukophenle itenaario* 500, mukina, aamukophenle 50. 42 Okhala wiira alopwana ale khiyaarina etthu yoomulivana, aahaalevelela ni murima wootheene. Vano, wa alopwana ale anli, tuuvi onrowa omphentexa mulopwana ole onikophiha musurukhu?” 43 Simoni aahaakhula wiira: “Kinoona wiira tuule oleveleliwe musurukhu munceene”. Yesu aahimuhimeerya wiira: “Muhaakhula saana”. 44 Yesu aahirukunuwa, onanweha muthiyana owo, nto onamuhimeerya Simoni wiira: “Munnimoona muthiyana ola? Miyo kookela mpaani mwanyu, nyuwo khamukivanhe maasi oorapihela inawu saka. Masi, muthiyana ola, oorapiha inawu saka ni maithori awe, opuputtha ni ikharari sawe. 45 Nyuwo khamukivanhe epeexo, masi okathi wootheene kiri aka va, muthiyana ola onnipexari inawu saka. 46 Nyuwo khamukihenle makhura vamuru, masi muthiyana ola oohela makhura oowunkhela inawu saka. 47 Tivonto, kinooleelani wiira, itampi sawe sirookhala-ru sinceene,* sootheene sooleveleliwa,+ maana ookiphenta vanceene. Tthiri ole onileveleliwa vakhaani, oniphenta vakhaani”. 48 Vano, Yesu aahimuhimeerya muthiyana ole wiira: “Itampi sanyu sooleveleliwa”.+ 49 Ale yaakilanthi vamosa ni Yesu ahaamenle ene meesa, yaahipacerya wiikoha ariki: “Ti pani mutthu ola oniwerya olevelela itampi?”+ 50 Masi, Yesu aahimuhimeerya muthiyana ole wiira: “Waamini wanyu woowoopolani.+ Muroweke ni murettele”.