Silempwale ni Yohani
1 Woopaceryani naari Nsu+ ni Nsu naari ni Muluku,+ nave Nsu naari muluku.*+ 2 Woopaceryani, owo aari ni Muluku. 3 Itthu sootheene sipattuxiwe mwa yoowo.+ Nave khiivo etthu epattuxiwe ehikhanle mwa yoowo.
Mwa yoowo, 4 vaaweryaneya okhala okumi, nto okumi waari muthuko wa atthu.+ 5 Muthuko owo onnaarya mweepiphini,+ vano epiphi eyo, kheniwerya ottipiha.
6 Aahikhala mulopwana mmosa aarummwale ni Muluku, nsina nawe naari Yohani.+ 7 Mulopwana owo, aarwenle okhalela onamoona muthuko owo,+ wiira atthu ootheene yiiwaka onamoona awe, yaamini. 8 Yohani, khahiyo aari muthuko,+ masi aarwenle okhalela onamoona muthuko owo.
9 Muthuko weekeekhai, yoowo onaamwaleela atthu ootheene, waahanle orwa moolumwenkuni.+ 10 Owo waari moolumwenkuni.+ Nave olumwenku opattuxiwe orumeeliwaka yoowo.+ Masi olumwenku khiwaamusuwenle. 11 Owo aahirwa elapo awe, masi atthu a elapo awe khiyaamwaakhenle. 12 Nto ootheene ale yaamwaakhenle, owo aahaavaha owerya wa okhala anamwane a Muluku,+ maana yaahaamini nsina nawe.+ 13 Anamwane awo khayariwe ni apinaatamu, nnakhala ni ophavela wa atthu, masi ayariwe ntoko Muluku aaphavela awe.+
14 Tivo, Nsu naahikhala pinaatamu,+ khukhala ni hiyo, nave hiyo nihoona ovuwa waya. Ovuwa iwo ori ntoko ovuwa mwaana mmoseene+ onivahiwa awe ni paapa awe. Owo aahisareya oreera murima wuulupale wa Muluku ni ekeekhai. 15 (Yohani aahimukhalela onamoona yoowo, okhuwelaka wiira: “Ola ti yoole miyo kaamuhimyaka wiira: ‘Ole onrwa ottuli waka, ookivikana miyo, okhala wiira owo aahikhala kihinatthi miyo’”.)+ 16 Tthiri owo oonivaha ootheene ahu voowaatta oreera murima wuulupale wa Muluku, okhala wiira owo oosareya oreera murima wuulupale wa Muluku. 17 Muluku oovaha Nlamulo omurumeelaka Moise,+ nave oreera murima wuulupale wa Muluku+ ni ekeekhai, sikumiheriwe mwa Yesu Kristu.+ 18 Khuuvo mutthu otonko onweha Muluku.+ Masi mwaana mmoseene+ yoowo onlikana ni Muluku ni ori vakhiviru va Tiithi,*+ tonisuwelinhe Tiithi awe.+
19 Ola onamoona Yohani aavanhe awe, okathi ayuda yaarumme aya anamukuttho ni alevi, akhumaka oYerusalemu, wiira yamukohe Yohani ariki: “Nyuwo mwa pani?”+ 20 Owo khaakhoottale, masi aahihimya ekeekhai, oriki: “Miyo nkihiyo Kristu”. 21 Vano awo yaahimukoha wiira: “Nyuwo mwa pani? Nyuwo mwa Eliya?”+ Owo ahaakhula oriki: “Nkihiyo”. “Niireke nyuwo mwa Profeta yoowo aakela orwa?”+ Owo aahaakhula wiira: “Nnaari!” 22 Nto awo yaahimukoha-tho wiira: “Weeso nyuwo mwa pani? Munileele hiyo, wiira naahimeerye ale anirumme. Nyuwo muniihimya okhala pani?” 23 Yohani aahiira: “Miyo ka nsu na mutthu onikhuwela moothakoni iiraka: ‘Mookolole ephiro ya Yehova’,*+ ntoko sihimmye awe profeta Yesaya”.+ 24 Atthu awo yaarummwale, yaari afarisi. 25 Nto awo yaahimukoha Yohani ariki: “Xeeni munaapatisa anyu atthu, muhikhanle Kristu, aahiiso Eliya, nnakhala Profeta yoowo aakela orwa?” 26 Yohani aahiwaakhula oriki: “Miyo kinipatisa ni maasi. Vano, ookhala ori eriyari anyu, muhinimusuwela anyu, 27 onirwa ottuli waka, yoowo kihimphwanela aka otaphula mikhoyi sa isantaalya sawe”.+ 28 Itthu iya siiraneyale oBethania, ekhopela ekina ya muro Yordani, weiwo Yohani aapatisa awe atthu.+
29 Mmeeloni mwaya, Yohani aahimoona Yesu orwaaka okumana nuuwo. Vano aahihimya wiira: “Mmooneke!+ Ola ti Mwaapwittipwitthi a Muluku, yoowo onttipiha itampi+ sa moolumwenkuni!+ 30 Ola ti yoole miyo kaamuhimyaka wiira: ‘Ottuli waka onnoorwa mutthu ookivikana miyo, okhala wiira owo aahikhala kihinatthi miyo’.+ 31 Hata miyo nkaamusuwela. Nto wiira osuweliwe ni atthu a wIsarayeli, tivo kinipatisa aka ni maasi”.+ 32 Nave-tho, Yohani aahivaha onamoona oriki: “Miyo kihoona ikuru soowaarya sikhuruwaka wiirimu ntoko epompa,* sikhala vasulu vawe.+ 33 Hata miyo nkaamusuwela. Masi Muluku, yoowo okirumme opatisa ni maasi, ookihimeerya wiira: ‘Yoole onimoona anyu simukhuruwelaka ikuru soowaarya ni okhalaka vasulu vawe,+ ti yoowo onipatisa ni ikuru soowaarya’.+ 34 Miyo kooweha eyo, nave kinnivaha onamoona wiira ola Mwaana a Muluku”.+
35 Mmeeloni mwaya, Yohani aari-tho vaavale ni awiixutti awe anli. 36 Nto okathi anweha awe Yesu eettaka, aahihimya wiira: “Mmooneke! Ola ti Mwaapwittipwitthi+ a Muluku!” 37 Okathi awiixutti ale anli vaiwale aya moolumo awo, yaahimutthara Yesu. 38 Vano Yesu aahirukunuwa, onaaweha amuttharaka, nto onaakoha wiira: “Muniphavela-ni?” Awo yaahimwaakhula ariki: “Rabi, munikhala vai?” (Nuulumo noowi Rabi, nintaphulela “Mwiixuttihi”). 39 Yesu aahiwaakhula oriki: “Murwe, moone”. Nto awo yaahirowa, aweha nipuro aakhala awe, khikhala weiwo nihiku nne. Eyo yiiraneyale 16 oora.* 40 Mmosa wa ale anli yaiwale moolumo a Yohani khimutthara Yesu, aari Andreya,+ munnawe Simoni Pedru. 41 Owo aapacenrye omphwanya munnawe, yoowo aihaniwa Simoni, onamuhimeerya wiira: “Nomphwanya Mesiya”+ (nuulumo nenlo nintaphulela, “Kristu”), 42 nto aahimuroiha wa Yesu. Vano, Yesu aahinwehexexa Simoni, omuhimeerya wiira: “Nyuwo mwa Simoni,+ mwaana a Yohani. Nyuwo munrowa wiihaniwaka Keefa” (nuulumo nenlo nintaphulela, “Pedru”).+
43 Mmeeloni mwaya, Yesu aaphavela orowa oGalileya. Vano aahimphwanya Filipe,+ khimuhimeerya wiira: “Mukhale mwiixutti aka”. 44 Filipe owo, aari a oBethisaida, epooma ya Andreya ni Pedru. 45 Filipe aahimphwanya Natanayeli,+ khimuhimeerya wiira: “Nomphwanya yoole onihimmwa ni Nlamulo na Moise ni soolempwa sa Maprofeta. Owo ti Yesu, mwaana a Yosefe,+ a oNazarethi”. 46 Masi Natanayeli aahimukoha wiira: “ONazarethi wookhala wookhuma etthu yooreera?” Filipe aahimwaakhula wiira: “Murwe, moone”. 47 Yesu aahinweha Natanayeli orwaaka vaari awe, onahimya wiira: “Mmooneke, mwisarayeli eekeekhai. Tthiri owo khorina wootha”.+ 48 Vano Natanayeli aahimukoha wiira: “Mukisuwenle sai?” Yesu aahimwaakhula, oriki: “Filipe ohinatthi owiihanani, muri ene vathi va mwiri wa ifiiku, miyo kihoowehani”. 49 Natanayeli aahimuhimeerya Yesu wiira: “Rabi,* nyuwo mwa Mwaana a Muluku, nyuwo mwa Mwene a Isarayeli”.+ 50 Nto Yesu aahimwaakhula wiira: “Nyuwo munaamini mwaha woowi kihooleelani wiira kihoowehani muri ene vathi va mwiri wa ifiiku? Vano munooweha itthu suulupalexa ovikana iya”. 51 Yesu aahihimya-tho wiira: “Kinooleelani ekeekhai wiira, nyuwosa munimoona erimu ehuleiye ene ni malaikha a Muluku awelaka ni amukhuruwelaka Mwaana a Mutthu”.+