Aalepenle Awe Aefeso
3 Nto miyo, Paulo, kitthukweliwe+ mwaha wookhala murumeyi a Kristu Yesu, ni mwaha wa wookhaliheryani nyuwo, muhikhanle ayuda . . .* 2 Kinoona wiira muhiiwa tthiri wiira kihaakhela muritti wa wookhaliheryani+ ottottela mureerelo, oreera murima wuulupale wa Muluku. 3 Aayo, Muluku ookisuweliha esiiri awe. Nto kaahoolepelani ni moolumo vakhaani. 4 Vano, mwasoma epaphelo ela, munimoona moota kinsuwela aka esiiri ya Muluku+ enimuhimya Kristu. 5 Atthu a maloko a khalai khiyaasuwelihiwe esiiri ela, ntoko aasuwelihale awe vano arummwa ni maprofeta awe oothanliwa, orumeelaka ikuru sawe.+ 6 Esiiri eyo tiila: Ale ahikhanle ayuda ni yiiraanale ni Kristu Yesu, animwaakhela ele Kristu aakhenle awe, ni anookhala ekurupu emosa-ru.*+ Animwaakhela itthu simosa-ru Muluku onileihenrye awe mwaha wa ihapari sooreera. 7 Mwaha wa oreera murima wuulupale wa Muluku, miyo kookhala murumeyi a esiiri ela ya Muluku. Owo ookivaha muteko ola orumeelaka owerya wawe.+
8 Nnaamwi kiri ene mutthu mwaamukhaanixa mwa atthu ootheene oororomeleya,*+ kihooniheriwa oreera murima wuulupale wa Muluku,+ wiira kaalaleerye ale ahikhanle ayuda, ihapari sooreera sa mareeliho anikhuma wa Kristu, yaawo ahinitthokihereya. 9 Muluku yoowo opattunxe itthu sootheene, ookivaha muteko woowaasuweliha atthu enamuna oneettiha awe esiiri awe,+ yeeyo yiipithihiwe okhuma khalai. 10 Eyo ehiiraneya wiira vano, orumeelaka muloko,+ Muluku aaphavela waasuweliha anamalamulela ni makhulupale ari wiirimu, ankhili awe,+ yaawo anooneya mwa inamuna sinceene soovirikana. 11 Eyo ennivarihana ni yoolakela yoohimala, yeeyo Muluku orina awe moovarihana ni Kristu+ Yesu, Pwiya ahu. 12 Mwa yoowo, hiyo ninniwerya olavula nihoovaka etthu+ ni ninnimwaattamela Muluku ni ororomela, maana ninnimwaamini Yesu. 13 Tivonto, kinnoovekelani wiira muhikhulumuwe, okhala wiira ohaawa waka mwaha wa nyuwo, onoowiirihani ottittimihiwa.+
14 Mwaha wa yeeyo, kinnikokhora ohoolo wa Tiithi, 15 okhala wiira owo tokumihenrye imusi sootheene wiirimu ni valaponi. 16 Kinnivekela wiira Muluku, yoowo orina ovuwa woowaatta, orumeele ikuru sawe, wiira olipihe mirima sanyu,+ 17 ni kinnivekela-tho wiira Kristu, vamosa ni niphento, sikhale vamurimani vanyu, mwaha wa waamini wanyu.+ Nave-tho, wiira mulipe ntoko mitathaari soolipa,+ muthipeliwe ene saana.+ 18 Siiso, nyuwo vamosa ni ootheene ale oororomeleya,* munoosuwela moota ophenta wa Kristu ori aya wuulupale, woowunnuwa, woorakama ni woowiixerya. 19 Ophenta iwo,+ wookhalana efaita yuulupale ovikana osuwela, wiira musareye mikhalelo Muluku onivaha awe.
20 Vano, okhala wiira owerya wa Muluku ori ni hiyo,+ nto owo otepeke oniirela itthu soowaatta, ovikana iye sininvekela ahu ni sinuupuwela ahu.+ 21 Muluku yoowo, ovuwihiweke mwaha wa muloko ni mwaha wa Kristu Yesu, mahiku ootheene. Amen.