Zakariya
14 “Mwiiwe! Ninnoorwa nihiku, nihiku na Yehova, nihiku sinrowa aya okawanyiwa eriyari mireerelo sanyu wiira sikuxiwe. 2 Kinoothukumanya maloko ootheene wiira yawane ni Yerusalemu. Epooma eyo enookuxiwa, itthu siri mpaani inookuxiwa, nave athiyana anooraruxiwa. Nimeya na atthu a epooma eyo anooroihiwa weepotthani, masi ale anrowa ohala khanrowa omala-malihiwa epooma eyo.
3 “Yehova onookhuma wiira awane ni maloko awo,+ ntoko okathi oniwana awe nihiku na ekhotto.+ 4 Nihiku nlo, inawu sawe sinoonyakela vasulu wa mwaako Olivera,+ yoowo ori ohoolo wa oYerusalemu, mpantta onikhuma nsuwa. Nave mwaako Olivera onoophweeya eriyari, okhuma mpantta onikhuma nsuwa mpakha mpantta onikela nsuwa, okumiheryaka nxepa nuulupale. Mpantta mmosa wa mwaako owo onimweetta orowaka onorti, nave mpantta mukina wa mwaako owo onimweetta orowaka osuuli. 5 Nyuwo munootthyawela oxepani wa miyaako saka, okhala wiira nxepa nno na miyaako nnoorowa mpakha wAseli. Munootthyawa, ntoko saatthyanwe anyu mwaha wa etetere yaakhumelenle mahiku a mwene Oziya a oYuda.+ Nto Yehova, Muluku aka, onimoorwa vamosa ni ootheene ale oowaarya.+
6 “Nihiku nlo, khonrowa okhala muthuko woowaarya,+ itthu sootheene sinrowa okhala ntoko exeelu. 7 Ninrowa okhala nihiku nimosa paahi, nenno ninrowa osuweliwaka ntoko nihiku na Yehova.+ Khonrowa okhala othana nnakhala ohiyu, nave ohiyu onrowa okhala wookokola. 8 Nihiku nlo, oYerusalemu+ anookhuma maasi a okumi,+ makina ankela orowaka mpantta onikhuma nsuwa*+ wa ephareya, nave makina ankela orowaka mpantta onikela nsuwa* wa ephareya.+ Eyo enrowa wiiraneyaka elimwe ni eyiita. 9 Yehova onrowa okhala Mwene a elapo yootheene.+ Nihiku nlo, Yehova onrowa okhala mekhawe paahi,+ nave ninrowa ohala nsina nawe paahi.+
10 “Elapo yootheene, osuuli wa oYerusalemu, okhuma oXeba+ mpakha oRimoni,+ enrowa olikanaka ni wAraba.+ Nave oYerusalemu onrowa okhala opuro woorakamela osulu, ni onrowa okhaliwaka,+ okhuma Mukhora wa Beniyamini+ mpakha opuro ori aya Mukhora Woopacerya. Okhuma weiwo, mpakha Mukhora wa Vakantu, ni okhuma empa yoorakamela osulu ya Hananeli+ mpakha mapuro aninyakattiwa ewuuva a mwene. 11 Nave atthu anrowa okhalaka memmo. Epooma eyo khenrowa otthikela-tho olamuliwa opwetexiwa,+ nto atthu anrowa okhalaka oYerusalemu anrowa okhalaka ni murettele.+
12 “Ehasara Yehova onrowa awe waakumiherya atthu ootheene anrowa owana ni Yerusalemu,+ tiila: Erutthu aya enimuntta nlelo yeemenle ene, maitho aya animuntta opuro aya, nave nlumi naya nnimuntta mwaano mwaya.
13 “Nihiku nlo, Yehova onookumiherya ohiiwanana eriyari aya. Khula mmosa ononvarela ntata mukhwaawe, nave awo anoowana yaawo-ru ni anootuphelana mukina ni mukhwaawe.+ 14 Nave-tho Yuda onookela ekhotto eyo oYerusalemu. Vano sinoothukumanyiwa mihakhu sinceene sa maloko ootheene yaarukurenrye: eweero, eparatha ni ikuwo.+
15 “Ehasara emosa-ru, enoophwanya ikhavalo, axinama aniihaniwa muula,* ikamelo, apuuru, ni inama sootheene siri mittetthe iyo.
16 “Atthu ootheene anrowa ohala a maloko ootheene anrowa owana ni Yerusalemu, animoorwa khula mwaakha,+ wiira yuurame* ohoolo wa Mwene, Yehova a anakhotto,+ ni wiira atthapele Efesta ya Maxaxa.+ 17 Masi nakhala nloko nihinrowa oYerusalemu omukokhorela Mwene, Yehova a anakhotto, khaninrowa orupeliwa epula.+ 18 Imusi sa wExiitu seiyo sihinrowa okela opuro owo, iyo khasinrowa orupeliwa epula. Ohiya-vo, sinoophwanyiwa ni ihasara seiyo Yehova onrowa awe okumiherya maloko ahinrowa otthapela Efesta ya Maxaxa. 19 Ela tenrowa okhala ehukhumu mwaha wa etampi ya atthu a wExiitu, ni mwaha wa etampi ya maloko ootheene ahinkela otthapela Efesta ya Maxaxa.
20 “Nihiku nlo, moolumo oowi: ‘Waarya ti wa Yehova!’+ anoolempwa vasiinuni* siwarihiwe ikhavalo. Nave ipanela*+ sinaapeeliwa empa ya Yehova, sinrowa olikanaka ni itixela+ ohoolo wa altaari. 21 Nave ipanela sootheene sa oYerusalemu ni sa oYuda sinrowa okhala soowaarya, ni sinrowa okhala sa Yehova a anakhotto. Atthu ootheene anrowa ovahaka mikuttho animoorwa ni anrowa waapeelaka ipanela iyo. Nihiku nno, khonrowa okhala nnakhala mukanaani* mmosa, empa ya Yehova a anakhotto”.+