Yesaya
54 Yehova onihimya wiira: “Mutthapeke, nyuwo muthiyana ohiniyara ni ohitonko oyara!+
Nyuwo muhitonko woona owereya onimphwanya muthiyana oniyara,+ muhakalaleke ni mukhuweleke+ mutteeliwe ene murima,
Okhala wiira anamwane a muthiyana ohiniyara khareere waatta,
Mookolole ikuwo sa etenta anyu yuulupale.
Muhoovelele, mookolole mikhoyi sa etenta anyu,
Nave mulipihe iyeemexeryo sa etenta anyu.+
3 Nyuwo munimuncererya eyo, muroihaka moono woolopwana ni moono woothiyana.
Osuulu anyu onooxintta maloko makina,
Ni onrowa okhalaka ipooma sihinkhaliwa.+
4 Muhoove,+ okhala wiira khamunrowa wuuliwa muru;+
Muhuuliwe muru, okhala wiira etthu munilipelela anyu, enimwiiraneya.
Munooliyala wuuliwa wanyu muru, okathi mwaari anyu mmiravo,
Nave khamunrowa-tho wuupuwela wuuliwa muru mwaarina anyu, muri ene naamukhweli”.
Muluku Oowaarya a Isarayeli, ti Moopoli anyu.+
Owo onrowa wiihaniwaka okhala Muluku a elapo yootheene ya vathi.+
6 Yehova oowiihanani okhalaka ntoko mwaari muthiyana aahiiwale ni aariipiwe murima,+
Ntoko muthiyana aatheliwe ori ene mwali, nuumala-vo ohiiwa”. Muluku anyu, tonihimya siiso.
7 “Mwa okathi vakhaani, miyo kaahoonyanyalani,
Masi mwaha wa woomorelani ikharari vanceene, miyo kinoowaakhelani.+
8 Mwaha wa onanariwa vanceene, miyo nkaaphavenle woowehani mwa okathi vakhaani.+
Masi kinimoomorelani ikharari, mwaha wa ophenta waka woororomeleya ohinimala”.+ Yehova, Moopoli anyu,+ tonihimya siiso.
9 “Eyo enlikana ni mahiku a Nowe:+
Siisaale kaalamphe aka wiira maasi yaakhumelenle mahiku a Nowe khanrowa-tho okhuneela elapo,+
Siiso-tho, kinnilapha wiira nkinrowa-tho onanariwa ni nyuwo nnakhala woopwapwelani.+
10 Miyaako pooti ovenxiwa mapuro aya,
Nave mattumuxa pooti oxekexiwa,
Masi ophenta woororomeleya kiniwooniheryaakani, khonrowa omala,+
Nnakhala nivarihano na murettele kipanke aka ni nyuwo, khaninrowa omala”.+ Yehova, yoowo onoomorelani ikharari, tonihimya siiso.+
11 “Nyuwo muthiyana oohaaxiwa,+ omaniwe ni epheyo yuulupale ni ohimaalihiwe,+
Kinoolipiha maluku anyu ni alukamasa,
Nave kinimwaalipiha alisenso anyu ni maluku aniihaniwa safira.+
12 Vasulu va ixiri sa epooma, kinoopaka muuru wookhuveya wa maluku aniihaniwa rupi,
Mikhora sanyu, sinrowa okhala sa maluku oowaarya,
Nave exiri erukurenrye muttetthe anyu wootheene, enrowa okhala ya maluku oowaarya.
13 Aniinyu ootheene, anrowa wiixuttihiwaka ni Yehova.+
Nave murettele wa aniinyu, onrowa okhala munceene.+
14 Nyuwo munoolipihiwa oratteene ni exariya.+
Khuuvo onrowa woohaaxakani,+
Khamunrowa woovaka etthu, nnakhala khiivo etthu enrowa owoopopihakani,
Okhala wiira khiivo etthu yoowoopiha, enrowa owaattamelani.+
15 Akhala mutthu onrowa wootuphelani,
Khahiyo miyo kinrowa omuruma.
Khula mutthu onrowa owana ni nyuwo, onooxinttiwa”.+
16 “Mwiiwe! Miyo kompattuxa mulipa onihana iyuuma,
Yoowo oniiseelela makhala a mooro,
Nuumala-vo onampaka kapwitthi.
Nave-tho, ti miyo kimpattunxe mutthu onirumeela ikapwitthi, wiira opwetexeke itthu.+
17 Khuuvo kapwitthi opakeliwe woohaaxani, onrowa ovara muteko,+
Nave nlumi ninlavula itthu sinoovirikanyani omilattuni, munimooniherya okhala noowootha.
Ela ti etthu, miyo Yehova, kinaavaha aka arumeyi aka.
Nave, miyo kinniwoona awo okhala anaxariya”. Yehova tonihimya siiso.+