Zakariya
5 Kaahiweha-tho musulu, kiweha eroolu evavaka. 2 Nto nlaikha nlo naahikikoha wiira: “Munoona-ni?”
Miyo kaahaakhula wiira: “Kinoona eroolu evavaka, yeeyo orakama waya erina imeeturu 9* ni okhuveya waya imeeturu thanu”.
3 Vano nlaikha nlo naahikileela wiira: “Nno otakhaliwa omwarenle mulaponi mootheene, okhala wiira ole oniiya khonihukhummwa,+ ntoko silempwale aya mpantta mmosa wa eroolu. Nave ole onilapha oothaka khonihukhummwa,+ ntoko silempwale aya mpantta mukina wa eroolu. 4 Yehova a anakhotto onihimya wiira: ‘Miyo kooruma otakhaliwa iwo, nto otakhaliwa iwo onookela empa ya latarau ni empa ya ole onilapha ni nsina naka oothaka. Otakhaliwa iwo onookhala muhina mwa empa eyo, nave onoohonona empa eyo, ithaapwa saya ni maluku aya’”.
5 Vano nlaikha nle naalavula ni miyo naahikaattamela, nnakileela wiira: “Xontte, mutthukule maitho, nweheke etthu eniiraneya”.
6 Nto miyo kaahikoha wiira: “Exeeni ela?”
Vano nlaikha nlo naahikaakhula wiira: “Ele enirwa esestu enirumeeliwa para ophimaniwa ipyo”.* Nave naahincererya niiraka: “Ola tori mukhalelo wa atthu anikhala mulaponi mootheene”. 7 Nto kaahoona wiira etampa yoovilikeya ya exumpu yaahivenxiwa, vano kaahimoona muthiyana aakilanthi muhina mwa esestu eyo. 8 Nto nlaikha nle naahikileela wiira: “Muthiyana ola onithoonyerya otakhala”. Nuumala-vo, nlaikha nle naahimuttikiherya muthiyana ole musestuni-mme, nittiyela esestu ele ni etampa ele yoolemela ya exumpu.
9 Vano kaahiweha musulu ni kaahiwoona athiyana anli erwaaka, evavihiwaka ni epheyo. Awo yaahikhalana mapupha yaalikana ni mapupha a napiphi.* Nto awo yaahiteexerya esestu eyo eriyari ya elapo ni erimu. 10 Nto miyo kaahikoha nlaikha nle naalavula ni miyo wiira: “Anroiha woowi esestu ele?”
11 Nlaikha nlo naahikaakhula wiira: “Anroiha elapo ya oXineyari*+ wiira yaamutekele empa muthiyana ole. Nto yamalihiwa empa awe, onoopwehiwa weiwo, nipuro nawe”.