Isaalimu
Nsipo na Davidi.
108 Khoo Muluku, murima aka woolipa.
Kinoowiipelani isipo, koottottopelakani.+
2 Miyo kinoovenya oxaka,
Kimphavela omoopa viola,+ ni ikaruma sikina sa isipo sirina mikhoyi.
3 Khoo Yehova, kinimoottottopelani eriyari ya atthu,
Nave kinoowiipelani isipo eriyari ya atthu a maloko ootheene.
4 Ophenta wanyu woororomeleya ti wuulupale, onniphiya wiirimu,+
Nave ororomeleya wanyu, onniphiya mmeekuni.
5 Khoo Muluku, nvuwihiwe wiirimu;
Nave ovuwa wanyu okhale elapo yootheene ya vathi.+
6 Wiira ale munaaphenta anyu yoopoliwe,
Munoopole ni ntata nanyu noolopwana ni mwaakhule* ovekela wahu.+
7 Muluku oowaarya,* oolavula wiira:
“Kinookawa muttetthe wa oSikhemi,+ kitteeliwe ene murima,
8 Muttetthe wa oXileyaadi+ ti wawaka, nave muttetthe wa Manase ti wawaka.
9 OMowabi ti epasiya aka kiniirapiha aka.+
WEdomi kinoorihela esantaalya aka.+
OFilisti miyo kinootteeliwa murima, okhala wiira kinooxintta-wo”.+
10 Ti pani onrowa okiroiha epooma yoolipihiwa?
Ti pani onrowa okihoola mpakha wEdomi?+
11 Muluku, kiira ti nyuwo munikhoottale?
Muluku ahu, kiira ti nyuwo muhinaakhaliherya-tho anakhotto ahu?+