Silempwale ni Yohani
2 Nuuvira mahiku manli, yaahikhala efesta ya ekasamento oKana wa oGalileya. Nto amamawe Yesu yaari weiwo. 2 Nave-tho, Yesu ni awiixutti awe yaahilattuliwa orowa efesta eyo ya ekasamento.
3 Okathi eviinyu yaahala aya vakhaani omala, amamawe Yesu yaahimuhimeerya wiira: “Eviinyu ehaamalela”. 4 Masi Yesu aahiwaakhula wiira: “Muthiyana, owo khahiyo mwaha ahu.* Ewoora aka khenatthi ophiya”. 5 Vano, amamawe yaahaahimeerya ale yaarumeela, ariki: “Mpake sootheene onrowa awe wooleelani”. 6 Saahikhala vaavale mino 6 sa maluku, seiyo saaheliwa maasi, ntoko saaruma aya ikano sa ayuda sa wiireeriha.+ Khula muno waanikela etthu yoowiiraka iliituru 44 aahiiso 66.* 7 Yesu aahaahimeerya ale yaarumeela, oriki: “Musarihe maasi mino iyo”. Tivo, awo yaahisariha mino iyo. 8 Vano, Yesu aahaahimeerya-tho wiira: “Murike vakhaani, mmuroihele tiretoore a efesta”. Awo yaahimuroihela. 9 Tiretoore a efesta aahilawiha maasi yaatatuxiwe eviinyu. Owo khaasuwela waakhuma aya eviinyu eyo, nnaamwi arumeyi yaarinke maasi awo, yaasuwela. Vano aahimwiihana mutheli, 10 onamuhimeerya wiira: “Atthu akina anipacerya okumiha eviinyu yoowaawa, nto ale alattuliwe yahapaliwa, annikumiha eviinyu yoohiwaawa. Masi nyuwo moosuka eviinyu yoowaawa mpakha vano”. 11 Ti siiso Yesu aapacenrye awe opaka miiriirya sawe, oKana wa oGalileya. Nto, aahooniherya ovuwa wawe,+ nave awiixutti awe yaahimwaamini.
12 Nuumala-vo, Yesu ni amamawe ni axihima awe+ ni awiixutti awe, yaahikhuruwela oKafarnawu,+ masi khiyaapinse.
13 Paasikha+ a ayuda aanaattamela. Nto Yesu aahirowa oYerusalemu. 14 Yesu aahaaphwanya mutemplo atthu yaatumiha ipooyi, ipwittipwitthi ni ipompa,*+ vamosa ni ale yaaturuka musurukhu, akilanthi ene. 15 Vano, Yesu aahipaka murepettho wa mikhoyi, onawoomola mutemplo atthu ootheene, vamosa ni ipwittipwitthi ni ipooyi saya. Nave-tho, aahimwarexa musurukhu wa alipa-ooturuka musurukhu ni aahipittula meesa aya.+ 16 Nto aahaahimeerya ale yaatumiha ipompa,* wiira: “Mukumihe-va itthu iya! Muttharuwe opaka empa ya Tiithi aka, okhala empa ya nakoso!”*+ 17 Vano awiixutti awe yaahuupuwela moolumo alempwale wiira: “Ophenta waka empa anyu, onrowa olikanaka ni mooro onivarela vamurimani vaka”.+
18 Tivonto, ayuda yaahimukoha yiiraka: “Ethoonyeryo xeeni erina anyu wiira munooniherye+ wiira muheemereriwa opaka itthu iya?” 19 Yesu aahiwaakhula oriki: “Mpwexakase etemplo ela, miyo kinooteka muhina mwa mahiku mararu”.+ 20 Vano ayuda yaahimuleela wiira: “Etemplo ela yaamanle iyaakha 46 etekiwaka, nto nyuwo munrowa owerya sai oteka muhina mwa mahiku mararu?” 21 Masi etemplo Yesu aahimya awe, yaathoonyerya erutthu awe.+ 22 Siiso, okathi Yesu aahihimuxiwe awe mookhwaani, awiixutti awe yaahuupuwela wiira aanilavula moolumo ala.+ Vano awo yaanikupali ele yaalempwe ni moolumo Yesu aalavunle awe.
23 Yesu ori ene oYerusalemu, okathi wa niira na Paasikha, aahipaka miiriirya sinceene. Nuumala oweha miiriirya iyo, atthu anceene yaahimwaamini. 24 Masi Yesu khaaroromela vanceene atthu awo, okhala wiira aanisuwela mirima saya, 25 ni khaaphavela ohimeeriwa makhalelo a atthu,+ maana aanisuwela.