Silempwale ni Marko
12 Yesu aahipacerya waalaleerya atthu orumeelaka malikanyiho, oriki: “Mulopwana mmosa aahikhalana ematta awe ya ewuuva.+ Aahitekelela ematta yootheene ni aahithipa nipuro naanyakattiwa ewuuva. Nave-tho aahiteka empa yoorakamela osulu* mmatta-mmo.+ Nuumala-vo, aahaahiyerya alimi, khurowa elapo ekina.+ 2 Waaphiyale aya okathi woohepha, mwaneene ematta aahimuruma murumeyi awe orowa okumana ni alimi ale, wiira aakhele epantta ya mihokorokho sawe. 3 Vano, alimi ale yaahinvara murumeyi owo, emmana ni emoomola matata-ru. 4 Nave, aahimuruma murumeyi mukina, nto awo yaahimmana vamuru ni yaahinveeha.+ 5 Mwaneene aahimuruma murumeyi mukina-tho, awo khumwiiva. Nave-tho, aahaaruma arumeyi anceene, vano alimi ale yaahaamana, akina yaahiwiiva. 6 Nuumala-vo, mwaneene ematta ya ewuuva, aahimuruma mwanawe amphentexa awe+ wiira akumane ni alimi ale, oriki: ‘Awo anoomuttittimiha mwanaka’. 7 Masi alimi ale yaahihimeeryana wiira: ‘Ola tonrowa ohalana ematta ela.+ Nrowe nimwiive, itthu sootheene sikhale sawihu’. 8 Nto awo yaahinvara, amwiiva, amurihela ota wa ematta ya ewuuva.+ 9 Vano mwaneene ematta onrowa opaka exeeni? Owo onimoorwa owiive alimi ale, nto ematta ele aavahe atthu akina.+ 10 Niireke nyuwo khamunasome yoolepa ela, eni: ‘Nluku nenlo alipa-ooteka empa yaakhontte aya, nookhalihiwa nluku nuulupale na alisenso?’+ 11 Khamunasome-tho wiira, ‘Nluku nlo ninkhuma wa Yehova* ni ti nootikiniha vamaithoni vahu’?”+
12 Okathi alipa-oowiixuttiha nlamulo ni makhulupale a anamukuttho yaiwale aya malikanyiho awe, yaaniphavela onvara. Masi yaanoova muttitthi wa atthu, okhala wiira yaanisuwela wiira Yesu aahilavula nlikanyiho nne aahimyaka yaawo. Nto awo yaahimuhiya, anarowa.+
13 Vano yaahaaruma afarisi akina vamosa ni atthu yaamutthara Herodi, wiira yanvare Yesu ni moolumo awe.+ 14 Vaaphiyale aya, yaahimuleela wiira: “Mwiixuttihi, noosuwela wiira okathi wootheene munilavula ekeekhai ni muniixuttiha ekeekhai ya Muluku ni khamunimuthanla mutthu, okhala wiira khamuniweha makhalelo a atthu. Niireke vannireerela omuliva mpoosito Seesari wala nnaari? 15 Nliveke aahiiso nihiliveke?” Osuwelaka muupuwelo aya wootakhala, Yesu aahaakoha wiira: “Xeeni munikeehererya anyu? Muruuhe etenaario,* kiwehe”. 16 Awo yaahimuruuhela etenaario* emosa. Nto, Yesu aahaakoha wiira: “Elatarato ela ni nsina nilempwale-va, ti yawani?” Awo yaahaakhula wiira: “Ti ya Seesari”. 17 Vano, Yesu aahaahimeerya wiira: “Weeso, munvaheke Seesari ekhanle ya Seesari,+ nave munvaheke Muluku ekhanle ya Muluku”.+ Nto awo yaahitikinihiwa vanceene ni moolumo awe.
18 Asaduki, yaawo anihimya wiira alipa-ookhwa khanihihimuxiwa,+ yaahimwaattamela Yesu, anamukoha yiiraka:+ 19 “Mwiixuttihi, Moise oolepa wiira: Mulopwana akhwa, khimuhiya mwaarawe ohiyaranne mwaana, munnawe ohaana omuthela naamukhweli owo, wiira omuyarele anamwane ole okhwiiye.+ 20 Nto yaahikhala axinna 7. Ole oopacerya aahimuthela mwaarawe, masi mulopwana owo aahikhwa ohiyaranne mwaana. 21 Nave a nenli aahimuthela naamukhweli owo, nto mulopwana owo aahikhwa ohiyaranne mwaana. Yaahiiraneya-tho ni munnawe a neeraru. 22 Alopwana ale 7, yaahikhwa ahiyaranne mwaana. Wookiseryani waya, muthiyana ole aahikhwa. 23 Vano, okathi anrowa aya ohihimuxiwa alipa-ookhwa, tuuvi onrowa omukuxa muthiyana owo? Maana alopwana ale 7, yaahimuthela”. 24 Yesu aahaahimeerya wiira: “Nyuwo khamunsuwela Soolempwa nnakhala owerya wa Muluku.+ Tivo muniiwoka anyu. 25 Okathi alipa-ookhwa anrowa aya ohihimuxiwa, alopwana khanrowa othelaka, nnakhala athiyana khanrowa otheliwaka, masi anrowa olikanaka ni malaikha ari wiirimu.+ 26 Vano, mwaha woohihimuxiwa wa alipa-ookhwa, khamunasome muliivuruni mwa Moise ele Muluku aamuhimenrye awe vamiiwani* waapatta mooro, iiraka: ‘Miyo ka Muluku a Abrahamu, Muluku a Isaakhi ni Muluku a Yakobe’?+ 27 Owo khahiyo Muluku aalipa-ookhwa, masi Muluku a atthu akumi. Tivo, nyuwo munniiwoka vanceene”.+
28 Aahikhala vaavale, mulipa-oowiixuttiha nlamulo mmosa, yoowo aawiriyana etthu yaalavuliwa. Tivonto, nuumala wiiwa moota Yesu aatthokihenrye awe mwaha ole, aahimukoha oriki: “Tiivi eri yooruma yuulupalexa ya nlamulo?”+ 29 Yesu aahaakhula wiira: “Yooruma yoopacerya tiila: ‘Nyuwo atthu a Isarayeli, nwiriyane: Yehova* Muluku ahu, ori mmosa paahi, Yehova.* 30 Nave, mumphenteke Yehova* Muluku anyu ni murima anyu wootheene ni okumi anyu wootheene ni muupuwelo anyu wootheene ni ikuru sanyu sootheene’.+ 31 Yooruma ya nenli, tiila: ‘Mumphenteke mukhwiinyu ntoko muniiphenta anyu’.+ Khiivo yooruma ekina enivikana sooruma iya”. 32 Mulipa-oowiixuttiha nlamulo, aahimuhimeerya Yesu wiira: “Vaareera, Mwiixuttihi, moolavula ekeekhai: ‘Muluku ori mmosa paahi, khuuvo-tho mukina ohikhanle yoowo paahi’.+ 33 Nave omphenta Muluku ni murima ahu wootheene, osuwela wahu wootheene, ikuru sahu sootheene ni omphenta mukhwiihu ntoko nniiphenta ahu, ti etthu yuulupalexa ovikana soovaha sootheene para opahiwa ni mikuttho”.+ 34 Yesu voonale awe wiira mulipa-oowiixuttiha nlamulo aahaakhula saana, aahimuhimeerya wiira: “Khamurakamenle Omwene wa Muluku”. Vano khuuvo-tho aawerya omukoha etthu.+
35 Masi, nlelo Yesu iixuttihaka mutemplo, aahihimya wiira: “Alipa-oowiixuttiha nlamulo aniwerya sai ohimya wiira Kristu ti mwaana a Davidi?+ 36 Eettihiwaka ni ikuru soowaarya,+ Davidi oohimya wiira: ‘Yehova* oomuleela Pwiya aka wiira: “Mukilaathi moono aka woolopwana, mpakha miyo waapweha awanani inyu vathi va inawu sanyu”’.+ 37 Davidi onnimuhimya owo okhala Pwiya, nto vaniweryaneya sai Kristu okhala mwaana a Davidi?”+
Vano muttitthi ole muulupale wa atthu waanisiveliwa wiiwa itthu Yesu aalavula awe. 38 Nlelo iixuttihaka, Yesu aahihimya-tho wiira: “Mwiikasoope ni alipa-oowiixuttiha nlamulo. Awo waasivela weetta awanre ene malaya oorakama ni okhomasiwa ni nttittimiho mapuro oowaatta atthu.*+ 39 Nave waasivela okilaathi musinagoga,* mapuro oohoolo* ni mapuro oosuwanyeya ofestani.+ 40 Awo anniiya mireerelo sa anaamukhweli, nave annipaka mavekelo oorakama wiira yooniwe ni atthu. Ophukeliwa waya onrowa okhala wuulupalexa”.
41 Yesu aahikilaathi vakhiviru va ikaaxa saaheliwa musurukhu,+ nto aaniweha muttitthi ole wa atthu orihelaka musurukhu ikaaxa iye. Athaaciri anceene yaanirihela musurukhu munceene.+ 42 Vano aahirwa muthiyana naamukhweli, oothoiwa, khurihela musurukhu miili waarina efaita vakhaani.*+ 43 Yesu aahiwiihana awiixutti awe, aahimeerya wiira: “Kinooleelani ekeekhai wiira, muthiyana ole naamukhweli oothoiwa, oovaha musurukhu munceene waavikana atthu ootheene.+ 44 Mweekeekhai, ootheene ale aavaha musurukhu waahala, masi naamukhweli ole ni othoiwa wawe, oovaha musurukhu wootheene aarina awe, eyo piiyo, itthu sootheene aalipana awe”.+