Yoobi
34 Vano, Elihu aahithipelela olavula oriki:
2 “Nyuwo asuweli, nwiriyane moolumo aka;
Nyuwo munisuwela itthu sinceene, mukiwiriyane.
3 Moolumo anlawihiwa ni maaru,
Siisaale nlumi ninlawiha aya eyoolya.
4 Nrowe nivarerye mmansihu etthu eri yooloka;
Nave nithanle mmansihu etthu eri yooreera.
5 Okhala wiira Yoobi onihimya wiira: ‘Miyo kookhalana erasau,+
Masi Muluku ookhootta okiirela exariya.+
6 Kiireke kihaana wootha kihimyaka wiira kinniphwanelela ophukeliwa saana?
Ohaawa waka khonimala nnaamwi kihitthenke etthu’.+
7 Mutthu xeeni onlikana ni Yoobi,
Yoowo oniwurya oruwaniwa ntoko maasi?
8 Owo ori ekurupu ya atakhali,
Ni oneetta ni atthu ootakhala.+
9 Owo onihimya so: ‘Mutthu khoniphwanya etthu,
Aamananihaka omuhakalaliha Muluku’.+
10 Vano, nyuwo atthu oosuwela, mukiwiriyane:
Muluku eekeekhai khonikhala-khala opakaka etthu yootakhala,+
Muluku Oowerya Sootheene, khonikhala-khala opakaka etthu yoohikhalela!+
11 Muluku onoomuliva mutthu ottharaka miteko sa mutthu owo,+
Nave ononvaha mutthu owo ele oniphwanela awe.
12 Mweekeekhai, Muluku khonipaka itthu sootakhala;+
Muluku Oowerya Sootheene, okathi wootheene onnipaka itthu sa xariya.+
13 Ti pani onvaherenrye Muluku muritti woolamulela ni okhapelela elapo,
Ni omuthanlale wiira okhapeleleke elapo?
14 Vaakhanle wiira Muluku onniwehexexa itthu apinaatamu anivara aya,
Vaakhanle wiira onnikuxa okumi aya ni iphumu saya,+
15 Atthu ootheene yaamookhwa,
Nave apinaatamu yaamutthikela vatthayani.+
16 Tivonto, mwaarina ene osuwela, nwiriyane oratteene etthu ela;
Nvahe ephoole etthu kinihimya aka.
17 Niireke mutthu oninyokha exariya onniwerya olamulela?
Aahiiso mwanwerya omphukela mutthu orina ikuru ni orina exariya?
18 Niireke mwammwiirela mwene wiira: ‘Nyuwo khamurina efaita’,
Aahiiso mwanwiirela makhulupale wiira: ‘Nyuwo mwa atakhali’?+
19 Muluku khonaathanla makhulupale,
Nnakhala khonitepa omphenta thaaciri onvikana mutthu oohaawa,*+
Okhala wiira ootheene aya, aapanke ni matata awe.+
20 Niinaano-ru, awo annookhwa+ ohiyu eriyari;+
Annittettemela vanceene, anakhwa;
Hata atthu oowerya annikumihiwa, masi ohiya ni matata a apinaatamu.+
21 Maitho a Muluku anniweha iphiro sa atthu,+
Nave owo onniweha itthu sootheene anivara aya.
23 Muluku khomuthanlenle mutthu nihiku,
Wiira orowe ohoolo wawe aphukeliwe ni yoowo.
24 Owo onnaapwetexa atthu arina owerya, ohipirisariki waakoha-koha.
Nave onnaarantteliha ni atthu akina.+
25 Muluku onnisuwela etthu anipaka aya.+
Owo onnaakumiha ohiyu, ananyakattiwa.+
26 Owo onnaapwetexa mwaha wa otakhala waya,
Opuro atthu ootheene aniwerya aya waaweha,+
27 Okhala wiira aahiya omutthara,+
Nave khanivaha efaita itthu onivara awe;+
28 Awo anniwiiriha atthu oohaawa, okhuwela anvekelaka nikhaliheryo,
Nto owo onniiwa okhuwela wa atthu ale ahirina mutthu oowaakhaliherya.+
29 Okathi Muluku onimaala awe, ti pani oniwerya omphukela?
Okathi oniipithiha awe owiitho wawe, ti pani oniwerya onweha?
Hata iipithihaka para nloko wala mutthu, khuuvo oniwerya onweha,
30 Siiso, mutakhali* khonrowa owerya olamulela,+
Nnakhala khonrowa waareya ntapha atthu.
31 Niireke ookhala mutthu onrowa omwiirela Muluku wiira:
‘Koovahiwa ehukhumu, nnaamwi kihitthenke;+
32 Mukooniherye etthu kihiwenrye aka oweha.
Akhala wiira koopaka etthu yootakhala nkintthikela-tho’?
33 Niireke owo ohaana wootthuvelani ottharaka etthu muniphavela anyu, variki mukhoottale ene ophukela wawe?
Nyuwo muthanleke etthu munrowa anyu opaka, ohiya miyo.
Nto mukileele etthu munisuwela anyu saana.
34 Atthu oosuwela anookileela,
Khula mutthu a miruku onikiwiriyana, onoohimya wiira:
35 ‘Yoobi khonisuwela etthu onihimya awe,+
Nave moolumo awe anooniherya wiira khorina ankhili’.
36 Yoobi ohaana weehereriwa* mpakha vahinwerya awe ovilela,
Okhala wiira itthu onaakhula awe onikhala mwa atakhali!