Samuweli Oopacerya

18 Nuumala Davidi ovaanela ni Sawuli, Yonathani+ ni Davidi yaahikhala apatthani aalupale. Nto Yonathani aahipacerya omphenta Davidi ntoko aiphenta awe.+ 2 Okhuma nihiku nenle, Sawuli khaamuhiyale Davidi, nave khaamweemihenrye otthikela etthoko ya paapa awe.+ 3 Yonathani ni Davidi yaahipaka nivarihano,+ okhala wiira Yonathani aanimphenta Davidi ntoko aiphenta awe.+ 4 Yonathani aahirula nlaya nawe nahaarina miyoono, onvaha Davidi. Nave, aahinvaha-tho ikuwo sawe sa okhottoni, espaata* awe, muura awe ni esintu awe. 5 Davidi aahipacerya orowa okhottoni, nave aanipaka itthu mwa miruku+ khula opuro Sawuli aamuruma awe. Vano, Sawuli aahimukhaliha muhooleli a anakhotto,+ nto eyo yaahaasivela aisarayeli ootheene ni arumeyi a Sawuli.

6 Okathi Davidi ni anakhotto yaahokolowa aya, nuumala waaxintta afilisti, athiyana a ipooma sootheene sa wIsarayeli, yaanirwa okumana ni mwene Sawuli, atteeliwe ene murima vanceene, yiipaka+ ni yiinaka akunxe ene malapa macikhaani+ ni atthakare. 7 Athiyana awo yaanitthapa ni yaaniipa ariki:

8 Sawuli aahinanariwa vanceene,+ nave nsipo nne khinaamusivenle, maana aahihimya wiira: “Awo anihimya wiira Davidi owiivale ikonto muloko, masi miyo kiwiivale ekonto emosa. Etthu emosa paahi enimuhaleela Davidi, ovahiwa omwene!”+ 9 Okhuma nihiku nle, Sawuli khanweha saana Davidi.

10 Mmeeloni mwaya, Muluku aaheemererya wiira Sawuli ohaaxiweke ni miyuupuwelo sootakhala,+ nave owo aahipacerya opaka itthu ntoko namukhwa-anepa* owannyawe, okathi Davidi aamoopa awe viola,+ ntoko iira awe khalai. Sawuli aahikuxa nivaka mmatatani,+ 11 aahivonya nivaka nno,+ ohimyaka wiira: ‘Kinoomukhomela Davidi vaxirini!’ Masi Davidi aahifintari ikwaha piili. 12 Vano, Sawuli aanimoova Davidi, okhala wiira Yehova aari ni yena,+ masi aahimuhiya Sawuli.+ 13 Nto, Sawuli aahimuhiiha Davidi onvarela muteko, omuthanla wiira okhale xeefi a anakhotto 1.000. Vano Davidi aanaahoolela anakhotto, okhottoni.+ 14 Itthu sootheene Davidi aapaka awe, aanipaka mwa miruku,+ nave Yehova aari nuuwo.+ 15 Okathi Sawuli aawenhe awe wiira Davidi aanipaka itthu mwa miruku, aahipacerya omoova. 16 Masi atthu ootheene a Isarayeli ni a Yuda, yaanimphenta Davidi, okhala wiira taahoolela okhottoni.

17 Sawuli aahimuhimeerya Davidi wiira: “Kinimoothelihani mwanaka+ muulupale, Merabi.+ Masi, muhihiye okooniherya olipa murima, ni owana ikhotto sa Yehova”.+ Sawuli aanuupuwela wiira: ‘Nkimphavela omwiiva yoomi ene, afilisti tanrowa omwiiva’.+ 18 Davidi aahimwaakhula Sawuli wiira: “Miyo ka pani? Amusi aka, atthu a etthoko ya paapa aka wIsarayeli tani, wiira kiphwanele okhala mutthepa a mwene?”+ 19 Waaphiyale aya okathi wiira Merabi, mwaana a Sawuli, othelihiwe Davidi, Merabi owo iira othelihiwe ene Adriyeli,+ a oMehola.

20 Vano Mikali, mwaana mwaamuthiyana a Sawuli,+ aahisiveliwa ni Davidi. Nuumala Sawuli oleeliwa eyo, aahihakalala. 21 Sawuli aahihimya wiira: “Kinrowa omutheliha Mikali Davidi, kiphavelaka omureya muraakho, wiira afilisti amutuphele”.+ Vano Sawuli aahimuhimeerya Davidi ekwaha ya nenli oriki: “Olelo munrowa okhala mutthepa aka”. 22 Moottharelana, Sawuli aahaaruma arumeyi awe wiira: “Mmuleele Davidi wiiphiini wiira: ‘Mwene ni arumeyi awe ootheene annisiveliwa ni nyuwo. Tivo mweemererye okhala mutthepa a mwene’”. 23 Okathi arumeyi a Sawuli yaamulenle aya Davidi moolumo ala, Davidi aahaakoha wiira: “Munoona wiira ti vookhweya mutthu oohaawa ni ohinooneliwa vatthu ntoko miyo, okhala mutthepa a mwene?”+ 24 Arumeyi a Sawuli yaahimuhimeerya moolumo aalavunle awe Davidi.

25 Sawuli aahihimya wiira: “Mwamuleele Davidi wiira: ‘Mwene khoniphavela onvaha musurukhu wiira mmuthele mwanawe.+ Masi oniphavela wiira nwiive afilisti 100 ni mmuruuhele etthu enooniherya*+ wiira ahookhwa, wiira yinleliwe ikuhu awanani a mwene’”. Tthiri, Sawuli ampaka palano wiira Davidi iiviwe ni afilisti. 26 Siiso, arumeyi a mwene yaahimuleela Davidi moolumo ala. Vano Davidi yaahimusivela enamuna ela ya okhala mutthepa a mwene.+ Ohinatthi ophiya okathi waathanliwe, 27 Davidi aahirowa ni anakhotto awe, owiiva anakhotto afilisti 200. Nuumala-vo, Davidi aahimuroihela mwene etthu yooniherya wiira aahiwiiva afilisti, wiira okhale mutthepa a mwene. Vano, Sawuli aahimutheliha Davidi mwanawe mwaamuthiyana Mikali.+ 28 Sawuli aahisuwela wiira Yehova aari ni Davidi,+ ni wiira mwanawe mwaamuthiyana Mikali, aanimphenta Davidi.+ 29 Tivo, Sawuli aamutepa omoova Davidi. Nto Sawuli aahikhala nwanani a Davidi mahiku ootheene aari awe mukumi.+

30 Makhulupale a afilisti yaanirowa owana ekhotto, masi ikwaha sootheene yaarowa aya owana, Davidi anipaka itthu mwa miruku waavikana arumeyi ootheene a Sawuli.+ Nto nsina na Davidi naanittittimihiwa vanceene.+