Aalepenle Awe Aefeso
4 Miyo Paulo, kitthukweliwe+ mwaha wa Apwiya, kinnootumereryani wiira mukhaleke moovarihana+ ni ele mwiihaneliwe anyu. 2 Okathi wootheene, mukhaleke oowiiyeviha,+ oomaala ni oopixa murima.+ Nvilelaneke mukina ni mukhwaawe, mphentanaka.+ 3 Mmananiheke okhalana wiiwanana omosa-ru onikumiheriwa ni ikuru soowaarya, ni murettele onniiriha wiiraana.+ 4 Erutthu eri emosa-ru,+ ikuru soowaarya siri simosa-ru,+ ntoko nikhanle aya nlipelelo nimosa-ru,+ nenno mwiihaneliwe anyu. 5 Pwiya ori mmosa-ru,+ waamini ori omosa-ru, opatiso ori omosa-ru; 6 Muluku ori mmosa-ru, yoowo tori Tiithi a atthu ootheene. Owo ti muulupalexa waavikana atthu ootheene ni onnivara muteko onirumaka ootheene ahu. Nave owerya wawe onnivara muteko mwa inamuna sootheene.
7 Khula mmosa a hiyo ohaakhela oreera murima wuulupale wa Muluku. Nto Kristu tonvahale khula mmosa a hiyo oreera murima iwo.+ 8 Soolempwa sinihimya wiira: “Okathi aawenle awe nipuro noorakama, aahaakuxa alipa-ootthukweliwa; aahaaruma alopwana awo wiira akhale soovaha”.+ 9 Vano, antaphulela exeeni masu oowi “aawenle awe nipuro noorakama”? Antaphulela wiira aapacenrye okhuruwela elapo ela ya vathi. 10 Ole aakhuruwenle vathi-va, ti yoole aawenle osulu,+ ovikana erimu,+ wiira omalelihe itthu sootheene.
11 Nave aahaavahererya akina mmulokoni wiira arumeeleke ntoko arummwa,+ akina ntoko maprofeta,+ akina ntoko anamalaleya,*+ akina ntoko amakampusi ni alipa-oowiixuttiha.+ 12 Owo aahiira siiso, wiira owiirihe* ale oororomeleya* weetta vookhalela, avaraka muteko wookhaliherya ni olipiha erutthu ya Kristu,+ 13 wiira ootheene ahu nikhalane waamini omosa-ru, ni omusuwela saana Mwaana a Muluku, wiira nikhale atthu aalupale+ ni atthu ookhoomala ntoko siri awe Kristu. 14 Tivonto, nihikhaleke ntoko anamwane, okhala wiira ole onitthara soowiixuttiha soowoothiwa sa atthu anaawoka akhwaaya,+ onrowa olikanaka ni ekalawa eri mphareya, enipuruliwa ni epheyo vamosa ni mawimpi, eroihiwaka ninno-ninno. 15 Masi, nilavuleke ekeekhai ni wooniherya ophenta, siiso nnoowerya okhala atthu ookhoomala mwa inamuna sootheene, wiira neetteke moovarihana ni Kristu, ori muru.+ 16 Mwa yoowo, erutthu yootheene+ yoolupanyiwa* oratteene, nto khula mpantta wa erutthu onnikhaliherya ipantta sikina ovaha ele erutthu eniphavela aya. Okathi khula mpantta onivara aya saana, onniiriha erutthu wunnuwa wiira yootheene elipe moophentani.+
17 Tivo, kinnooleelani kootumereryakani ohoolo wa Apwiya, wiira muheetteke-tho ntoko sineetta aya atthu oohaamini;+ awo antthara miyuupuwelo saya soohiloka.*+ 18 Muupuwelo aya oneettihiwa ni epiphi, nave aarakamela okumi Muluku onivaha awe, okhala wiira khaniphavela omusuwela Muluku mwaha wa wuumiha waya murima.* 19 Awo aarimeeliwa mukhalelo wootheene wooreera, khanuuliwa muru;* nave ahiivahererya mweettelo woohiloka onooniherya ohuuliwa muru,*+ ni anniira itthu sootheene soonanara ahiphiyeriwaka.
20 Masi nyuwo muhiixutta wiira Kristu khahiyo siiso. 21 Yesu ohiixuttiha ekeekhai. Nto vakhala wiira muhiiwa ni muhiixuttihiwa ni yena, weeso munnisuwela oratteene itthu iyo. 22 Nyuwo muhiixuttihiwa wiira murule omutthu anyu wa khalai,+ yoowo onivarihana ni mweettelo anyu wa khalai ni onihononiwa ni soophavela saya sowoototha.+ 23 Ni wiira muhihiyeke okhalihiwa musya ni ikuru sineettiha muupuwelo anyu.+ 24 Masi nwareke omutthu musya,+ opattuxiwe moovarihana ni ele Muluku oniphavela awe, oneettihiwa ni exariya yeekeekhai ni ororomeleya weekeekhai.
25 Vano muhiyale anyu wootha, khula mmosa a nyuwo olavuleke ekeekhai ni mukhwaawe,+ okhala wiira ootheene ahu nniirela mpantta erutthu emosa-ru.+ 26 Pooti onanariwa, masi muhittheke.+ Muhihiye nsuwa nikelaka nlelo munanariwe ene.+ 27 Muhinvahe opuro Diabo.+ 28 Ole ori nawiiye,* ottharuwe wiiya; ohiya-vo, iimananiheke ovara muteko wooloka ni matata awe,+ wiira okhalaneke etthu yoowaavaha ale ahirina.+ 29 Mwaano mwanyu, ahikhume moolumo ootakhala,+ masi mulavuleke itthu soolipiha vanreerela aya, wiira mwaaphwanyihe mureerelo ale anoowiriyanani.+ 30 Nave, muhimuriipiheke* murima Muluku, mukhoottaka ikuru soowaarya,+ seiyo muheliwe anyu ekanyeryo+ ya nihiku ninrowa anyu woopoliwa.*+
31 Murihele ottaiwene makhalelo ootheene a oruttu,+ onanariwa, oviruwa, owali, oruwana,+ vamosa ni itthu sootakhala sa khula enamuna.+ 32 Masi mureerelaneke murima, moonelaneke othunku,+ mulevelelaneke ni murima wootheene, ntoko Muluku oolevelenlyaaweni ni murima wootheene, mwa Kristu.+