Samuweli Oopacerya

27 Davidi aanuupuwela vamurimani vawe oriki: “Nihiku nlo Sawuli onookiiva. Etthu yooreerela opaka, ori otthyawela elapo ya afilisti.+ Nto Sawuli onoohiya okaavya muttetthe wootheene wa Isarayeli,+ vano miyo kinimoopowa mmatatani mwawe”. 2 Siiso Davidi aahivenya ni alopwana 600+ aarina awe, onarowa wa Akixi,+ mwaana a Mawoki, mwene a oGathi. 3 Davidi ni alopwana aarina awe yaahikhala ni Akixi, oGathi, khula mulopwana ni etthoko awe. Davidi aari ni axaarawe anli: Ahinowami+ a oYezireyeli ni Abigayili+ a oKarmelo, naamukhweli a Nabali. 4 Okathi aaleeliwe awe Sawuli wiira Davidi aahitthyawela oGathi, aahihiya omwaavya.+

5 Vano Davidi aahimuhimeerya Akixi wiira: “Mwakeemererya, mukivahe opuro wookhala muttetthe mwaamukhaani ori ota wa epooma. Tthiri khivanrerela murumeyi anyu ola okhala vamosa ni mwene”. 6 Nto, nihiku nle Akixi aahinvaha Davidi muttetthe wa oSikilaki.+ Tivo muttetthe wa oSikilaki ori aya wa mamwene a oYuda mpakha olelo-va.

7 Davidi aahiviriha mwaakha mmosa ni miyeeri mixexe okhalaka muttetthe wa afilisti.+ 8 Davidi ni anakhotto awe yaanaatuphela axesuri,+ axirizi ni atthu a wAmaleki,+ okhala wiira yaakhala elapo yaakhuma oTelami mpakha oXuri,+ ekhuruwelaka elapo ya wExiitu. 9 Okathi Davidi aatuphela awe elapo eyo, khaamuhiya nnakhala mutthu mmosa mukumi, okhale mulopwana wala muthiyana.+ Owo aanikuxa ipwittipwitthi saya, ipooyi saya, apuuru aya, ikamelo saya ni ikuwo saya. Nuumala-vo aanitthikela wa Akixi. 10 Okathi Akixi aamukoha awe oriki: “Muttetthe xeeni mutuphenle anyu olelo?” Davidi aanaakhula wiira: “Olelo kituphenle osuuli wa oYuda”;+ aahiiso “Kituphenle osuuli wa oYerameyeli”;+ wala “Kituphenle osuuli wa akenewu”.+ 11 Davidi khaamuhiya mukumi mulopwana wala muthiyana, wiira atthu awo ahiroihiwe oGathi, maana aanihimya wiira: “Awo anoonikaxari, ni anoohimya etthu kipanke aka”. (Ela ti etthu Davidi aapaka awe okathi wootheene aakhala awe muttetthe wa afilisti.) 12 Siiso Akixi aanimukupali Davidi, uupuwelaka wiira: ‘Voohaaniherya owo oopacerya onyokhiwa ni atthu awe aisarayeli, nto okathi wootheene onrowa okhalaka murumeyi aka’.