Yesaya
6 Mwaakha mwene Oziya aakhwiiye awe,+ miyo kaahinweha Yehova okilanthi ene veehiceni yoottittimiheya ni yoorakamela osulu.+ Nave nlaya noorakama aawanre awe, naahisarya mutemplo mootheene. 2 Vasulu vawe, yaahikhala malaikha aniihaniwa maserafi. Khula serafi, aahikhalana mapupha 6. Ni mapupha manli yaanikhuneela owiitho waya, ni mapupha manli makina, yaanikhuneela inawu saya. Vano mapupha makina manli yaanivavana.
3 Serafi mmosa aahaakhuwelela maserafi makina, iiraka:
“Oowaarya, oowaarya, oowaarya ti Yehova a anakhotto.+
Elapo yootheene ya vathi, yoosareya ovuwa wawe”.
4 Aaro a mikhora yaahixekexeya mwaha wa ale yaakhuwela, nave empa yaahisareya mwiixi.+
5 Nuumala-vo, kaahihimya wiira: “Miyo kootakhaliwa!
Kiri ntoko mutthu ookhwa.
Miyo ka natampi, ni moolumo aka toohiloka,
Nave kinikhala eriyari ya atthu arina moolumo oohiloka,+
Okhala wiira konweha Mwene, Yehova a anakhotto!”
6 Nto serafi mmosa aahivava mpakha vaari aka. Owo aahikuxa nikhala nimosa na mooro,+ nenlo aapanne* awe valtaari.+ 7 Owo aahikwatiha nikhala nno vayanoni vaka, onahimya wiira:
“Moone! Miyo kookwatiha eyano anyu nikhala nna.
Mulattu anyu woomalihiwa,
Nave Muluku ohoolevelelani itampi sanyu”.
8 Nuumala-vo, kaahiiwa nsu na Yehova, nihimyaka wiira: “Ti pani onrowa aka omuruma?+ Ti pani ontthuna orowa mwa nipuro nahu?” Miyo kaahaakhula, kiiraka: “Miyo-va, mukirumeke!”+
9 Owo aahaakhula wiira: “Murowe mwaaleele atthu ala wiira:
‘Nyuwo munrowa wiiwaka ikwaha sinceene,
Masi khamunrowa osuwela etthu;
Munrowa woonaka ikwaha sinceene,
Masi khamunrowa osuwela etthu’.+
10 Muumihe murima wa atthu ala,+
Muttiyele maaru aya,
Nwale maitho aya,+
Wiira ahooneke ni maitho aya,
Ni ahiiweke ni maaru aya.
Siiso, awo khanrowa osuwela etthu,
Nave khanrowa orukunuxa mirima saya nnakhala khanrowa openuxiwa”.+
11 Vano miyo kaahikoha wiira: “Nyuwo Yehova, itthu iya sinrowa okhala siisa mpakha silini?” Vano owo aahaakhula wiira:
“Mpakha ipooma opwexakasiwa ni ohikhaliwa,
Ipa ohikhaliwa atthu,
12 Mpakha Yehova waaroiha atthu ottaiwene,+
Ni elapo yootheene okhala milepe.
13 Eriyari ya atthu 10 a wIsarayeli, mmosa onoohala weiwo, nave atthu awo anootthikela opahiwa. Atthu a Isarayeli anlikana ni mwiri muulupale ni mwiri oniihaniwa karvaalyo. Okathi mwiri owo oniikitthiwa aya, ennihala exa. Vano exa eyo enoophuwa osuulu woowaarya”.