Okhuma
15 Okathi ole, Moise ni aisarayeli,* yaahimwiipela Yehova nsipo nla:+
“Kinoomwiipela Yehova, okhala wiira owo oovuwihiwa vanceene.+
Oorihela mphareya+ ekhavalo ni nakhavalo aya.
2 Yah* tori ikuru saka ni owerya waka, okhala wiira tonikoopola.+
Ola Muluku aka, nto miyo kinoomuttottopela;+ ola Muluku aamuhavinre aka,+ miyo kinonvuwiha.+
3 Yehova nakhotto oowerya.+ Yehova ti nsina nawe.+
4 Owo ohaarihela mphareya+ anakhotto a Farawo, ni ikaaro saya sa ekhotto,
Oowiiriha anakhotto aya ooweryexa, omireya mphareya Yooxeerya.+
5 Maasi ootupa ahaakhuneela; awo aamireya mpakha vathi ntoko nluku.+
6 Khoo Yehova, ntata nanyu noolopwana ti nootepexa owerya;+
Khoo Yehova, ntata nanyu noolopwana ninniwerya omunyakatta nwanani.
7 Ni owerya wanyu, munnaamoroxa awanani inyu;+
Onanariwa wanyu, onlikana ni mooro, ni onnaapaha awo ntoko malaxi oowuuma.
8 Iphumu sanyu saahiiriha maasi othukumana;
Maasi awo yaaheemela ntoko exiri.
Maasi ootupa, yaaheemela eriyari ya ephareya.
9 Awanani inyu yaahimya wiira: ‘Miyo kinimwaatthimakela!
Miyo kinimwaaphwanya! Kinookawanya mireerelo saya mpakha okiphiyerya!
Kinookumiha espaata* aka! Ntata naka nnimwaaxintta!’+
10 Nyuwo muhoopa epheyo anyu, ephareya ehaakhuneela;+
Awo aamireya ntoko exumpu eriheliwe mmaasini ootupa.
11 Khoo Yehova,+ niireke aakhala amuluku anlikana ni nyuwo?
Ti pani onlikana ni nyuwo, yoowo onooniherya waarya wuulupalexa?+
Nyuwo ti yoole onireerela wooviwa ni ottottopeliwa ni isipo, yoole onipaka itthu sootikiniha.+
12 Nyuwo muhookola ntata nanyu noolopwana, nto elapo ehaamirya.+
13 Mwaha wa ophenta wanyu woororomeleya, nyuwo munniweettiha atthu nwooponle anyu;+
Ni owerya wanyu, munimwaahoola nipuro nanyu noowaarya.
14 Atthu animwiiwa,+ awo anoottettemela;
Atthu a oFilisti, onimwaaphwanya owereya wuulupale.
15 Okathi owo, makhulupale a wEdomi, animoova vanceene,
Nave anamalamulela oowerya a oMowabi,+ anoottettemela.
Atthu ootheene anikhala oKanaani, anooriipiwa murima vanceene.+
16 Awo animoova vanceene ni ottettemela.+
Mwaha wa moono anyu woowerya, awo anrowa ohala yeemenle ene, ahiittikinyaka, ntoko nluku
Mpakha atthu anyu ovira, nyuwo Yehova,
17 Khoo Yehova, mwaahoole wiira yakhaleke vamwaako vanyu,+
Opuro munikhala anyu, opuro yoowo mwiithanlenle anyu,
Opuro woowaarya, nyuwo Yehova mpanke anyu ni matata anyu.
18 Yehova onrowa olamulelaka ntoko mwene mahiku ootheene.+
19 Okathi ikhavalo sa Farawo, vamosa ni ikaaro sawe sa ekhotto ni anakhavalo awe yaakenle aya mphareya,+
Nto Yehova aahiiriha maasi a mphareya waamorela,+
Masi aisarayeli yaahilapuwa yeettaka vatthayani voowuuma, eriyari ya ephareya”.+
20 Vano profeta Miriyamu, yoowo aari murokorawe Aroni, aahikuxa nlapa naamukhaani onoopa.* Nave athiyana ootheene yaanimutthara yoopaka malapa* aya macikhaani ni yiinaka. 21 Miriyamu aaniipa owaakhulelaka axilopwana, oriki:
“Mmwiipele Yehova, okhala wiira oovuwihiwa vanceene.+
Oorihela mphareya+ ekhavalo ni nakhavalo aya”.
22 Muhoolo mwaya, Moise aahaakumiha aisarayeli ephareya Yooxeerya, anarowasa woothakoni wa oXuri. Yaaheetta mahiku mararu moothakoni, masi khiyaaphwannye maasi. 23 Awo yaahiphiya oMara,*+ masi khiyaawenrye owurya maasi a oMara mwaha woowi yaari oowaawa. Tivonto aavanhe awe nsina noowi Mara. 24 Nto atthu yaahipacerya omukhupanya Moise+ yiiraka: “Ninrowa owurya exeeni?” 25 Vano Moise aahinvekela Yehova+ wiira omukhaliherye. Nto Yehova aahimooniherya mwiri. Okathi aarihenle awe mwiri ole mmaasini, maasi yaahithatuwa, anasiva.
Opuro ole Muluku aahaavaha nlamulo atthu ni mathowa yaarowa owiiriha ophukeliwa. Nave-tho, aahiweehererya+ opuro ole. 26 Muluku aahimmye wiira: “Mwaiwelela oratteene moolumo aka, miyo Yehova Muluku anyu, ni mwapaka itthu sooloka vamaithoni vaka, ni wiiwelela saana sooruma saka ni weettela malamulo aka,+ nkinrowa wookumiheryani iretta ntoko kaakumihenrye aka atthu a wExiitu.+ Miyo Yehova, kinimoovahakani ekumi yooreera”.+
27 Nuumala-vo, yaahiphiya wElimi, weiwo saari ihime 12 sa maasi ni mikole 70. Nto yaahimaka weiwo, waattamela maasi.