Mammeru

14 Vano, nloko nle nootheene naahithipelela wunla nikhuwelaka ohiyu ole wootheene.+ 2 Aisarayeli ootheene yaahipacerya omukhupanya Moise ni Aroni.+ Nave nloko nootheene naaniwaapa, niiraka: “Fataari naakhwenle elapo ya wExiitu, aahiiso naakhwiiye moothakoni muumu! 3 Xeeni Yehova ohalaka oniruuha elapo ela, wiira niiviwe ni espaata?*+ Awanani ahu animwaakuxa axaarihu ni aniihu.+ Nto xeeni nihitthikelaka wExiitu?”+ 4 Awo yaanihimeeryana wiira: “Nimuthanle muhooleli wiira nitthikele wExiitu!”+

5 Tivo, Moise ni Aroni yaahikokhora, yuurama mpakha vathi, ohoolo wa nloko nle nootheene na aisarayeli naathukumanne. 6 Yooxuuwa+ mwaana a Nuuni, ni Kalebi+ mwaana a Yefune, yaawo yaari ekurupu ya atthu ale yaaronwe ohottela elapo, yaahikhera malaya aya. 7 Nave yaahihimeerya nloko nle nootheene na aisarayeli wiira: “Elapo naaronwe ahu ohottela ti yootepa oreera.+ 8 Akhala wiira nnoomwiiwelela Yehova, owo onooneemererya, ni onoonikeliha elapo ele ni onoonivaha. Elapo ele ti yoowaatta eleeti ni oravo.+ 9 Masi muhimurukunuwele Yehova, ni muhiwoove atthu a elapo ele,+ vanookhweya waaxintta. Atthu awo khanilipana etthu. Yehova ori ni hiyo.+ Tivo, muhiwoove”.

10 Masi, nloko nootheene naalavula wiira naamwaavonyakasa maluku.+ Vano ovuwa wa Yehova waahikhumelela vatentani* va muthukumano, ohoolo wa atthu ootheene a Isarayeli.+

11 Vano, Yehova aahimuleela Moise wiira: “Atthu ala khanrowa okittittimiha mpakha silini?+ Khanrowa okaamini mpakha silini, hata kipanke ene itthu sootheene sootikiniha ohoolo waya?+ 12 Kinimwaakumiherya eretta wiira kaapwetexe. Nave kinimookhalihani nyuwo nloko noowaatta ni noowerya waavikana ale”.+

13 Masi Moise aahimuleela Yehova wiira: “Atthu a wExiitu, weiwo waakuminhe anyu atthu ala ni owerya wanyu, animwiiwa etthu ela.+ 14 Nto awo animwaleela atthu a elapo ela ya oKanaani. Nave-tho, ahiiwa wiira nyuwo Yehova, munnikhala ni atthu ala+ ni munnikhumelela ohoolo waya.+ Ahiiwa-tho wiira nyuwo mwa Yehova, ni muhiiriha neeku okhala vasulu omuttettheni waya. Nave othana munniweettiha murumeelaka neeku, vano ohiyu munniweettiha murumeelaka mooro.+ 15 Akhala wiira munoowiiva atthu ala ootheene okathi omosa,* maloko yiiwale ovuwa wanyu anrowa ohimyaka wiira: 16 ‘Yehova khowenrye waaroiha atthu ala elapo aaleihenrye awe waavaha, tivonto owiivale awe woothakoni’.+ 17 Xontte Yehova, mooniherye owerya wanyu, ntoko mwaaleihenrye anyu wiira: 18 ‘Miyo ka Yehova, oopisa onanariwa ni onooniherya vanceene ophenta woororomeleya,+ onaalevelela ale ahiniiwelela ni ooveeha. Masi onnaahukhumu atthu ootakhala murima. Nave onnaahukhumu axipaapa aya, anaaya, mpakha osuulu aya wa neeraru, ni osuulu aya wa neexexe.+ 19 Xontte, mwaalevelele atthu ala itampi saya, mwaha wa ophenta wanyu wuulupale woororomeleya, ntoko siisaale mwaalevelenle anyu atthu ala okhuma wExiitu mpakha vano”.+

20 Yehova aahimuleela wiira: “Miyo kinimwaalevelela ntoko muhimye anyu.+ 21 Masi kinnilaphela okumi aka wiira, elapo yootheene enooweha owerya wa Yehova.+ 22 Khuuvo mutthu oonale ovuwa waka ni itthu sootikiniha+ kipanke aka wExiitu, ni moothakoni, ni onithipelela okeehererya+ ikwaha 10, ni onikhootta okiiwelela,+ 23 onrowa oweha elapo kilamphe aka wiira kinimwaavaha axipaapa aya. Tthiri, khuuvo mutthu mmosa ohinikittittimiha, onrowa oweha.+ 24 Masi okhala wiira murumeyi aka Kalebi+ aahivirikana ni atthu akina, ni okathi wootheene onnikiiwelela ni murima awe wootheene. Mweekeekhai miyo kinoomwiiriha okela elapo ele aaronwe awe ohottela, ni osuulu awe onookhala axineene elapo ele.+ 25 Okhala wiira amaleki ni akanaani+ anikhala oxepani,* meelo muhaana ohokolowela woothakoni, nviraka ephiro enroiha ephareya Yooxeerya”.+

26 Nuumala-vo, Yehova aahimuleela Moise ni Aroni wiira: 27 “Nloko nla nootakhala ninrowa othipelela okikhupanya mpakha silini?+ Miyo koowiiwa aisarayeli akikhupanyaka.+ 28 Mwaaleele wiira, Yehova onihimya so: ‘“Kinnilaphela okumi aka wiira kinoowiirelani itthu sootheene kiwiiwalyaakani mulavulaka!+ 29 Tthiri ootheene yaarina iyaakha 20 orowa ohoolo, yaawo yaalempwale ni yaakikhupannye,+ animookhwa moothakoni-mu.+ 30 Khuuvo mutthu a nyuwo onrowa okela elapo koolaphenlyaakani* woovahani wiira mukhaleke-mo,+ ohikhanle Kalebi, mwaana a Yefune, ni Yooxuuwa, mwaana a Nuuni.+

31 “‘“Nave aniinyu yaawo muhimyale anyu wiira anookuxiwa,+ kinimwaakeliha ni waasuweliha elapo yeeyo nyuwo mukhontte anyu.+ 32 Masi nyuwosa munimookhwa moothakoni muumu. 33 Vano aniinyu anookhala amakampusi iyaakha 40+ moothakoni-mu, nyuwo munimwaakhula mwaha wookitthekela,* mpakha okhwa mutthu ookiserya a nyuwo moothakoni.+ 34 Nyuwo mwaahihottela elapo mahiku 40.+ Siiso, munimwaakhula mwaha wa itampi sanyu iyaakha 40.+ Nihiku nimosa kinrowa olikanyiha ni eyaakha emosa. Nto munoosuwela mixankiho sinikhumelela mwaha wa okikhootta.*

35 “‘“Miyo Yehova, kilavunle. Etthu enrowa aka wiiriha nloko nla nootheene nootakhala niiwananne ohikiiwelela, tiila: Anrowa okhwa, ni omala-mala moothakoni muumu.+ 36 Alopwana Moise aarumme awe wiira yahottele elapo, ni yiirinhe nloko nle nootheene omukhupanya Moise, okathi yaatthinke aya ahimyaka itthu soohiloka sa elapo ele,+ 37 eyo piiyo, alopwana yaale yaahimmye itthu soohiloka sa elapo ele, animwaakhela ehukhumu ni animookhwa ohoolo wa Yehova.+ 38 Masi Yooxuuwa, mwaana a Nuuni, ni Kalebi, mwaana a Yefune, yaawo yaari ekurupu ya atthu ale yaaronwe ohottela elapo, nlelo anookhala akumi”’”.+

39 Okathi Moise aalavunle awe moolumo ala, aaleelaka aisarayeli ootheene, atthu ale yaahiriipiwa murima vanceene. 40 Nave-tho, yaahivenya voosiisu aphavelaka owela vasulu va mwaako, anahimya wiira: “Vano hiyo nnoorowa elapo Yehova ohimmye awe wiira onoonivaha, okhala wiira noomutthekela Muluku”.+ 41 Masi Moise aahimmye wiira: “Xeeni muhiniiwelela anyu etthu Yehova onihimya awe? Itthu khasinrowa oweettelani saana. 42 Muhirowe! Yehova khokhanle ni nyuwo. Nave awanani anyu animooxinttani.+ 43 Amaleki ni akanaani animootuphelani,+ nave nyuwo munimwiiviwa ni espaata. Okhala wiira khammwiiwelenle Yehova, nto Yehova khonrowa okhala ni nyuwo”.+

44 Masi moowiikuxererya, awo yaahiwela vasulu va mwaako.+ Masi Nivuku na Nivarihano na Yehova khinaakhumme, nnakhala Moise khaakhumme omuttettheni.+ 45 Vano amaleki ni akanaani yaawo yaakhala mwaako ole, yaahikhuruwa yaatuphela, ni yaamwarya-mwarya mpakha oHorma.+