Wahala a Nenli
35 Yosiya aahimpakela Paasikha+ Yehova oYerusalemu, nto nihiku na namuloko ni xexe na mweeri woopacerya,+ saahihitiwa inama sa mukuttho wa Paasikha.+ 2 Owo aahaakawela anamukuttho miteko saya, aalipiha wiira avareke miteko saya empa ya Yehova.+ 3 Nuumala-vo aahaaleela alevi, yaawo yaawiixuttiha atthu ootheene a Isarayeli,+ yaakhalihiwe oowaarya ohoolo wa Yehova, oriki: “Mpwehe Nivuku empa Salomooni mwaana a Davidi, mwene a Isarayeli, otenke awe,+ wiira muhiteexeke mmakhatani.+ Vano mmurumeeleke Yehova Muluku anyu, ni atthu awe, aisarayeli. 4 Nave mwiilokiherye moovarihana ni ahooleli a imusi sanyu ni ikurupu sanyu, muttharaka ele elempwale ni Davidi,+ mwene a wIsarayeli, ni mwanawe, Salomooni.+ 5 Muhaana weemela nipuro noowaarya, moovarihana ni ekurupu muri anyu; muhaana weemela wiira khula emusi ekhale ekurupu ya emusi ya alevi munrowa anyu okhaliheryaka. 6 Muhite inama sa mukuttho wa Paasikha,+ mwiireerihe ni mulokiherye itthu para axinninyu wiira amalelihe moolumo a Yehova ovanhe awe omurumeelaka Moise”.
7 Yosiya aahivaha ipwittipwitthi soolopwana ni ipuri saamukhaani soolopwana 30.000, vamosa ni ipooyi 3.000 wiira sivahiwe mukuttho wa Paasikha para atthu ootheene yaari opuro ole. Inama iyo saakumihiwe eriyari ya mireerelo sa mwene.+ 8 Nave-tho makhulupale yaahaavaha atthu, anamukuttho ni alevi voohikhanyereriwa. Nto Hilikiya,+ Zakariya ni Yehiyeli, ahooleli a empa ya Muluku eekeekhai, yaahaavaha anamukuttho inama* sa Paasikha 2.600 ni ipooyi 300. 9 Konaniya ni axinnawe, Xemaya ni Netaneli, vamosa ni Haxabiya, Yeyeli ni Yozabadi, maxeefi a alevi, yaahaavaha alevi mikuttho sa Paasikha 5.000 ni ipooyi 500.
10 Nuumala ovariwa muteko owo, anamukuttho ni alevi yaaheemela opuro aya moovarihana ni ikurupu saya,+ ntoko mwene aarumale awe. 11 Awo yaahihita inama sa mukuttho wa Paasikha,+ nto anamukuttho yaahitathela valtaari ephome yaavahereriwe aya+ ni alevi, okathi alevi yaapera aya esapala ya inama.+ 12 Nuumala-vo, yaahilokiherya soovaha para opahiwa wiira yaakawele atthu, yaawo yaathukumanne ikurupu sene moovarihana ni imusi saya, wiira soovaha iyo sivahiwe Yehova ntoko silempwale aya eliivuru ya Moise. Nave yaahiiriha etthu emosa-ru ipooyi. 13 Yaahaapeya inama sa mukuttho wa Paasikha, attharaka yoolema aya,+ nave yaahaapeya inama sa mukuttho woowaarya mmwaapuni, mpanelani* ni munikhalakoni, nuumala-vo yaahaaroihela atthu ootheene moowaakuveya. 14 Moottharela, alevi yaahilokiherya yoolya ya Paasikha para awo ni para anamukuttho, okhala wiira anamukuttho, yaawo yaari a osuulu wa Aroni, yaahanle avahaka mikuttho soopahiwa ni ekortuura mpakha makaaripi. Siiso, alevi yaahilokiherya yoolya ya Paasikha para awo ni para anamukuttho, yaawo yaari osuulu wa Aroni.
15 Alipa-oowiipa, anamwane a Asafi,+ yaaheemela opuro aya moovarihana ni yooruma ya Davidi,+ ya Asafi,+ ya Hemani ni ya Yedutuni,+ yoowo aamutaphulela mwene itthu ooniheriwa awe ni Muluku. Nave yaahikhala makwarta mikhora sooviirikana.+ Khuuvo aahiyale muteko awe, okhala wiira axinnaya, alevi yaahilokiherya yoolya ya Paasikha para awo. 16 Nto muteko wootheene wa omulokiherya Paasikha+ a Yehova, wahivariwa nihiku nle wiira ampake Paasikha ni avahe soovaha para opahiwa valtaari a Yehova, attharaka ele yaarummwale aya ni mwene Yosiya.+
17 Aisarayeli yaari opuro ole, yaahimpaka Paasikha okathi ole ni Efesta ya Iphaawu Soohiheliwa Eferemento mahiku 7.+ 18 Okhuma mahiku a profeta Samuweli, khaatonko opakiwa Paasikha aalikana nuule wIsarayeli, nave khuuvo mwene a wIsarayeli ampanke Paasikha aalikana nuule aapakiwe ni Yosiya,+ anamukuttho, alevi, atthu ootheene a oYuda ni a wIsarayeli yaari opuro ole, ni atthu yaakhala oYerusalemu. 19 Paasikha ola aapakiwe eyaakha ya namuloko ni thanu na tthaaru ya olamulelo wa Yosiya.
20 Nuumala itthu iya sootheene, okathi Yosiya aalokihenrye awe etemplo,* Neko,+ mwene a wExiitu, aahirowa oKarkemixi waattamela wEufrate wiira awane. Nto Yosiya aahirowa owana nuuwo.+ 21 Siiso, owo aahaaruma atthu orowa omukoha Yosiya wiira: “Mwaha ola onoovarani sai, nyuwo mwene a oYuda? Nkinrowa owana ni nyuwo olelo, masi kinrowa owana ni omwene mukina, nave Muluku ookiruma wiira kaakuveke. Muhiye onvirikanya Muluku yoowo ori ni miyo wiira mphwanye mureerelo. Mwaahiire siiso onimoopwetexani”. 22 Masi Yosiya aahirowa owana nuuwo, aahituruka malaya awe wiira ohisuweliwe,+ onarowa owana nuuwo. Nave khaawiriyanne moolumo a Neko, yaawo yaakhuma mwaano mwa Muluku. Nto aahirowa owana nuuwo opuro woowaataleya wa oMegido.+
23 Ale yaavonya mattheere yaahimuhoma mwene Yosiya, nto mwene aahaaleela arumeyi awe wiira: “Mukikumihe opuro ola, okhala wiira nkireere ovulalihiwa”. 24 Vano arumeyi awe yaahimukumiha mukaaroni mwawe ya ekhotto anweliha ekaaro awe ya nenli ya ekhotto, amuroiha oYerusalemu. Siiso owo aahikhwa ovithiwa mahiye a amuhavinre awe,+ nto atthu ootheene a oYuda ni a oYerusalemu yaahimunlela Yosiya. 25 Yeremiya+ aahimwiipela nsipo na masikho Yosiya, nave alipa-oowiipa ootheene, alopwana ni athiyana+ annimwiipela Yosiya, mpakha olelo-va. Nto wiipa iwo yoolema ya wIsarayeli, nave masipo awo aalempwa eriyari ya eliivuru ya isipo sa wiikhupanyerya.
26 Itthu sikina siiraneyale ni Yosiya ni ophenta wawe woororomeleya, soolempwa muliivuruni mwa Nlamulo na Yehova. 27 Nave itthu opanke awe, okhuma woopaceryani mpakha wookiseryani, soolempwa Muliivuruni ya Mamwene a wIsarayeli ni a oYuda.+