Miteko sa Arummwa
6 Mahiku ale, awiixutti yaanincerereya, siiso, awiixutti yaalavula ekereku, yaahipacerya waakhupanya awiixutti yaalavula eheeperi, okhala wiira anaamukhweli yaalavula ekereku, khiyaavahiwa yoolya yaakaiwa khula nihiku.+ 2 Tivonto, arummwa 12 yaahaathukumanya awiixutti ootheene, anaahimeerya wiira: “Khivanireerela wiira hiyo nihiye wiixuttiha nuulumo na Muluku, wiira nikaweke yoolya.+ 3 Tivo, axinnaka, mwaathanle eriyari anyu, alopwana 7 oororomeleya,*+ oosareya ikuru soowaarya ni ankhili,+ wiira naathanlele ovara muteko ola wooreerela.+ 4 Masi hiyo ninrowa okhalelaka nthiti ovekela ni wiixuttiha nuulumo na Muluku”. 5 Etthu eyo yaahaasivela awiixutti ootheene. Vano yaahimuthanla Siteefano, yoowo aarina waamini wuulupale ni aasareyale ikuru soowaarya, Filipe,+ Prokhoro, Nikanore, Timoni, Parmena, ni Nikolawo, yoowo aakenle etiini ya ayuda, ni aari a wAntiyokiya. 6 Vano, alopwana awo yaahiruuhiwa ohoolo wa arummwa. Nuumala arummwa ovekela, yaahiwiixaatherya matata alopwana ale yaathanliwe.+
7 Siiso, nuulumo na Muluku naanitepa omwara-mwareya,+ nave nummeru na awiixutti naamutepa wuncerereya+ oYerusalemu. Nave-tho, anamukuttho anceene yaahipacerya waamini.+
8 Vano, Siteefano, yoowo aamusiveliha Muluku ni aavahiwe owerya wuulupale ni Muluku, aanipaka miteko sootikiniha ni miiriirya, eriyari ya atthu. 9 Masi alopwana akina a ekurupu yiihaniwa eSinagoga* ya Atthu Ootaphuwa, vamosa ni alopwana akina a oKirene ni a wAlexandriya, ni akina a oSilisia ni wAsia, yaahirwa anavaanyihana ni Siteefano. 10 Nto, khiyaawerya onvaanyiha Siteefano, okhala wiira owo aalavula ni ankhili ni aanikhaliheriwa ni ikuru soowaarya.+ 11 Siiso, yaahaawoka atthu wiiphiini, wiira ahimyeke so: “Hiyo noomwiiwa olavulaka itthu sootepa otakhala, onveehaka Moise ni Muluku”. 12 Vano, yaahaatumererya* atthu ni makhulupale a ayuda ni alipa-oowiixuttiha nlamulo, orowa niinaano-ru onvara Siteefano ni ikuru, wiira amuroihe oSineedrio.* 13 Nave, yaahaaruha anamoona oowootha, yaawo yaahimya wiira: “Mulopwana ola, onnithipelela olavula itthu soonanara, ohimyaka nipuro nla noowaarya ni ohimyaka Nlamulo. 14 Mwa ntakiheryo, hiyo noomwiiwa ohimyaka wiira Yesu munazarethi, onoopwexakasa nipuro nla ni onooturuka soolema Moise onihiyenrye awe”.
15 Nto, okathi atthu ootheene yaari muSineedrio* yanweha aya Siteefano, yaanoona wiira owiitho wawe waalikana ni owiitho wa nlaikha.