Silempwale ni Luka

6 Vano, esaabadu, Yesu ni awiixutti awe yaanivira mmatta mwa etiriku. Nto awiixutti awe yaanivurula makala a etiriku,+ anattikittha ni matata aya wiira akhuure.+ 2 Nuumala afarisi akina oweha eyo, yaahimukoha Yesu wiira: “Xeeni munipaka anyu etthu enikhoottihiwa ni nlamulo ovara esaabadu?”+ 3 Yesu aahiwaakhula wiira: “Khamunasome ele Davidi ni atthu aarina awe, yaapanke aya okathi yaavoliwe aya etala?+ 4 Owo aahikela mpaani mwa Muluku vamosa ni alopwana aarina awe. Nto awo yaahikhuura iphaawu saavahiwa Muluku. Awo khiyeemereriwa okhuura iphaawu iyo, maana anamukuttho paahi ti yeemereriwa”.+ 5 Vano Yesu aahaahimeerya wiira: “Mwaana a Mutthu tori Mwaneene esaabadu”.+

6 Esaabadu ekina,+ Yesu aahikela musinagoga* onapacerya wiixuttiha. Memmo aahikhala, mulopwana mmosa aarakanle ntata noolopwana.+ 7 Alipa-oowiixuttiha nlamulo ni afarisi, yaaninwehexexa oratteene Yesu, wiira amoone aarowaka ompenuxa mulopwana ole esaabadu, wiira emukumiherye mulattu. 8 Vano, Yesu osuwelaka muupuwelo aya,+ aahimwiirela mulopwana ole aarakanle ntata wiira: “Nvenye, mweemele variyari-va”. Nto mulopwana ole aahivenya, eemela variyari. 9 Nuumala-vo, Yesu aahaahimeerya atthu ale, oriki: “Kinimookohani etthu emosa: Esaabadu, vanneemereriwa mutthu opaka etthu yooloka aahiiso yootakhala, woopola okumi wala opwetexa?”+ 10 Nuumala Yesu waaweha atthu ootheene yaamurukurenrye, aahimuhimeerya mulopwana ole wiira: “Mookole ntata nanyu”. Mulopwana owo aahookola ntata nawe, nikhala saana. 11 Vano, alipa-oowiixuttiha nlamulo ni afarisi, yaahinanariwa vanceene, anavaanela etthu yaakela aya omwiiriha Yesu.

12 Nihiku nimosa, Yesu aahirowa omwaako ovekela,+ khuviriha ohiyu wootheene onvekelaka Muluku.+ 13 Nuumala oxa, aahiwiihana awiixutti awe, aathanla 12 eriyari aya, aavaha nsina na arummwa.+ 14 Masina aya taala: Simoni, yoowo-tho anvahale awe nsina na Pedru ni munnawe, aihaniwa Andreya, Yakobo, Yohani, Filipe,+ Bartolomeyo, 15 Matheyo, Tome,+ Yakobo mwaana a Alfeyo, Simoni, yoowo aihaniwa “nanthiti”, 16 Yuda, mwaana a Yakobo ni Yuda Isikariyoti, yoowo muhoolo mwaya anvarihale Yesu.

17 Yesu aahikhuruwa vamwaako vamosa naawo, eemela nipuro noowaataleya. Waahikhala vaavo muttitthi muulupale wa awiixutti awe ni muttitthi muulupale wa atthu yaakhuma oYudeya ni oYerusalemu, ni mittetthe sa oTiiro ni oSiidoni, seiyo saattamenle ephareya. Atthu awo yaarwenle onwiriyana Yesu ni openuxiwa iretta saya. 18 Nave atthu yaale yaavariwe ni malaikha ootakhala, yaahikhalihiwa saana. 19 Okathi atthu yanvara aya Yesu, saanimukhuma ikuru,+ nto atthu awo ootheene yaanipenuxiwa. Mwaha wa yeeyo, atthu ootheene yaaniphavela onvara.

20 Vano Yesu aahaawehexexa awiixutti awe, onaahimeerya wiira:

“Oohakalala ti nyuwo muri amasikhini, okhala wiira Omwene wa Muluku ti wawinyu.+

21 “Oohakalala ti nyuwo munivoliwa etala vano, okhala wiira munoovona.+

“Oohakalala ti nyuwo muninla vano, okhala wiira munrowa otheya.+

22 “Oohakalala ti nyuwo khula okathi muninyokhiwa,+ okhoottiwa,+ oveehiwa, ni munihimmwa okhala mutakhali mwaha wa miyo.* 23 Nihiku nlo, mutteeliweke murima ni mutthapeke vanceene, okhala wiira otthuveliwa wanyu ti wuulupale wiirimu. Nave, iyo ti itthu amuhavinre aya yaawiirela aya maprofeta.+

24 “Mootakhaliwa nyuwo athaaciri,+ okhala wiira muhaakhela itthu sootheene mwaarowa anyu waakhela.+

25 “Mootakhaliwa nyuwo nvonne vano, okhala wiira munrowa ovoliwa etala.

“Mootakhaliwa nyuwo munitheya vano, okhala wiira munrowa oriipiwa murima ni wunla.+

26 “Mootakhaliwa nyuwo, khula okathi munittottopeliwa anyu ni atthu ootheene,+ okhala wiira eyo ti etthu amuhavinre aya yaawiirela aya maprofeta oowootha.

27 “Masi kinooleelani nyuwo muniwiriyana wiira: Muthipeleleke waaphenta awanani inyu, nwiireleke itthu sooreera ale anoonyokhani.+ 28 Mwaareeliheke ale anoophavelelani itthu sootakhala ni mwaavekeleleke ale anooruwanani.+ 29 Ole onoomanani nlaku nimosa, mmutheteerye nikina. Oniwaakhani nlaya nanyu na ota, muhimukhoottiherye nlaya na muhina.+ 30 Ale anoovekelani etthu, mwaavaheke.+ Nave ole onikuxa itthu sanyu, muhinvekele wiira oottikiheryeni.

31 “Nave-tho, itthu sootheene muniphavela anyu wiireliwa ni atthu akina, nyuwo-tho nwiireleke siiso.+

32 “Nto, mwaaphentaka paahi ale anoophentani, muniphwanya exeeni? Hata anatampi annaaphenta ale anaaphenta.+ 33 Mwaawiirelaka sooreera ale aniwiirelani sooreera, muniphwanya exeeni? Hata anatampi anniira siiso. 34 Nave-tho, akhala wiira munaakophiha* ale munlipelela anyu woolivani, muniphwanya-ni?+ Hata anatampi annaakophiha anatampi akhwaaya, alipelelaka waakhela voolikanela. 35 Ohiya-vo, muthipeleleke waaphenta awanani inyu ni nwiireleke sooreera. Mwaakophiheke muhilipelelaka waakhela etthu.+ Nto otthuveliwa wanyu onrowa okhala wuulupale. Nave munrowa okhala anamwane a Muluku Muulupalexa, maana Muluku onnaareerela murima ale ahinxukhuru ni atakhali.+ 36 Muhihiye waamorela ikharari atthu, ntoko Tiithi inyu onaamorela awe ikharari atthu.+

37 “Nave-tho, muhiye waaphukela akina, wiira Muluku ohoophukeleni.+ Nave, muhiye waalamula akina, wiira Muluku ohoolamuleni. Muleveleleke okathi wootheene, wiira nyuwo muleveleliwe.+ 38 Nvaheke, nto nyuwo munoovahiwa.+ Awo animwiitthela voowaatta vaniveruni vanyu, anooxekexerya, ekhittelele, mpakha oyiiheya. Tthiri, mphimo munrowa anyu waaphimela akina, munrowa ophimeliwa yoowo”.

39 Yesu aahaaleela nlikanyiho nimosa, oriki: “Niireke mulipa-oohoona onniwerya omweettiha mukina ohinoona? Kiira oowanli aya anoomorela mulittini?+ 40 Naxikola* khoninvikana prusoore awe, masi ole oniixuttihiwa oratteene, onrowa olikanaka ni prusoore awe. 41 Nto, xeeni muniwehexexa anyu ekokhola eri mmaithoni mwa munninyu, masi muhinaweha mwiri* ori mmaithoni mwanyu?+ 42 Vaniweryaneya sai omwiirela munninyu wiira: ‘Munnaka, nkani kookumiheni ekokhola mmaithoni mwanyu’, variki nyuwo murina ene mwiri* mmaithoni mwanyu? Nawoothe! Mpacerye okumiha mwiri ori mmaithoni mwanyu, nuumala-vo munoowehaka saana, wiira nwerye okumiha ekokhola eri mmaithoni mwa munninyu.

43 “Khuuvo mwiri wooloka oniima mihokorokho soowuntta. Nave khuuvo mwiri woowuntta oniima mihokorokho sooloka.+ 44 Tthiri, mwiri onisuwanyeya ni mihokorokho saya.+ Mwa ntakiheryo, atthu khanuurula ifiiku nnakhala ewuuva mmiiwani. 45 Mutthu ooreera murima, onnilavula itthu sooreera, okhala wiira vamurimani vawe, siri itthu sooreera. Masi mutthu ootakhala murima, onnilavula itthu sootakhala, okhala wiira vamurimani vawe, siri itthu sootakhala.+

46 “Nto, xeeni munikiirela anyu ‘Apwiya! Apwiya!’ masi muhineettela itthu sinihimya aka?+ 47 Khula mutthu onrwa wa miyo ni oniiwa masu aka, oneettela, kinoowooniheryani mutthu onlikana awe.+ 48 Owo onlikana ni mulopwana, yoowo okathi aateka awe empa, aathimpe malitti oowiixa, ompaka alisenso vamwala. Vano, okathi yaarumpe aya epula yuulupale, maasi a muro yaahimana empa eyo, khuhiwerya oxekexa, maana yaahitekiwa oratteene.+ 49 Masi, ole oniiwa masu aka ohineettela,+ onlikana ni mulopwana aatenke empa vamihaavani ohimpanke alisenso. Vano maasi a muro yaahimana empa eyo, khumora niinaano-ru. Nto empa eyo yaahiphweeya voomalela”.