Silempwale ni Marko
7 Vano, afarisi ni alipa-oowiixuttiha nlamulo akina, yaahirwa ekhumaka oYerusalemu, emuthukumanela Yesu.+ 2 Awo yaahiwoona awiixutti a Yesu alyaaka matata aya anananre ene, eyo piiyo, ahinyanwe.* 3 (Afarisi ni ayuda ootheene khanilya ahinyanwe mpakha mweekookhinoni, attharihelaka soolema sa amuhavinre aya. 4 Nave yaatthikaka omerkaatu, khanilya ahiirapihale. Sookhala soolema sikina sinceene avahiwe aya ni anivarexexa aya, ntoko opatisa ikoopho, mirinki ni mino sa ekoopiri.)+ 5 Tivonto, afarisi ni alipa-oowiixuttiha nlamulo yaamukohale aya Yesu wiira: “Xeeni awiixutti anyu ahinittittimiha aya soolema sa amuhavinre, analya matata aya anananre ene?”+ 6 Yesu aahiwaakhula wiira: “Yesaya aahilavula ekeekhai oohimyakani nyuwo anawoothe, ntoko valempwale aya wiira: ‘Atthu ala anikittittimiha ni eyano paahi, masi mirima saya khisikhanle vaavo.+ 7 Anikikokhorela mahala ene, okhala wiira aniixuttiha sooruma sa atthu’.+ 8 Nyuwo munnihiya otthara sooruma sa Muluku, munatthara soolema sa atthu”.+
9 Nave-tho, Yesu aahaahimeerya wiira: “Nyuwo munnirumeela olavilavi wiira mukhootte sooruma sa Muluku, mphavelaka otthara soolema sanyu.+ 10 Mwa ntakiheryo, Moise oohimya wiira: ‘Mwaattittimiheke apapinyu ni amaminyu’.+ Nave oohimya wiira: ‘Ole onaaveeha* apapawe ni amamawe, ohaana wiiviwa’.+ 11 Masi nyuwo munihimya wiira: ‘Akhala mutthu onaaleela apapawe aahiiso amamawe wiira: “Itthu kaarina aka wookhaliheryani, kooleiherya onvaha Muluku”’,* 12 nyuwo munnimukhoottiherya waakhaliherya apapawe aahiiso amamawe.+ 13 Tivo, nyuwo muhiiriha nuulumo na Muluku ohikhalana efaita mwaha wa soolema sanyu,+ seiyo nwiixuttihale anyu akina. Nave munniira itthu sinceene sinilikana niiya”.+ 14 Vano Yesu aahiihana-tho muttitthi wa atthu wiira orwe vaari awe, onaahimeerya wiira: “Ootheene anyu mukiwiriyane ni mwiiwexexe saana ele enihimyaka.+ 15 Etthu enimunanariha mutthu khahiyo ele enikela mwaano mwawe, masi enimunanariha tiile enikhuma mwaano mwawe”.+ 16* ——
17 Nuumala Yesu ohiya muttitthi ole, aahiphiya vatthokoni, nto awiixutti awe yaahimukoha yootaphulela ya nlikanyiho nle.+ 18 Yesu aahaahimeerya wiira: “Nave nyuwo khamuniiwexexa ntoko atthu ale? Niireke khamunsuwela wiira itthu sootheene sinikela mwaano mwa mutthu, khasinimunanariha? 19 Tthiri itthu iyo, khasinikela vamurimani, masi sinikela mmirimani, nuumala-vo sinakhumela ota”. Ni moolumo ala, Yesu aahihimya wiira soolya sootheene ti sooloka. 20 Nave-tho, Yesu aahihimya wiira: “Itthu sootheene sinikhuma mwaano, ti sinimunanariha mutthu.+ 21 Veekeekhai, vamurimani va mutthu+ sinnikhuma miyuupuwelo sootakhala: Orupihana woohiloka,* wiiya, wiiva, 22 oraruwa, ohiphiyeriwa, otakhala, owoka, mweettelo woohiloka onooniherya ohuuliwa muru,* nrima, onveeha Muluku, wiisoona ni ohaathokorerya akina. 23 Itthu iya sootheene sootakhala, sinikhuma vamurimani, nto ti seiyo sinimunanariha mutthu”.
24 Nuumala okhuma opuro ole, Yesu aahirowa muttetthe wa oTiiro ni oSiidoni.+ Vano owo aahiphiya vatthokoni, nto khaaphavela wiira atthu asuwele wiira oophiya, hata vari siiso, awo yaahisuwela. 25 Yesu ophiyaka-ru, muthiyana mmosa, yoowo mwanawe mwaamuthiyana aavariwe ni nlaikha nootakhala, aahiiwa oromoliwaka Yesu, nto aahirwa okhoroma ohoolo wawe.+ 26 Muthiyana ole aari mukereku, aayariwe oFeniisia wa oSiiria. Nto aanithipelela onvekela Yesu wiira oomole nlaikha nootakhala nanvanre mwanawe mwaamuthiyana. 27 Yesu aahimuhimeerya wiira: “Mwaahiye toko anamwane alye mpakha ovona, maana khivanireerela owaakha anamwane yoolya, onaarihela axaana a alapwa”.+ 28 Vano muthiyana owo aahimwaakhula Yesu, iiraka: “Aayo, atokweene. Masi hata axaana a alapwa, annoolya itathela sinaamora anamwane”. 29 Nto Yesu aahimuhimeerya wiira: “Okhala wiira muhaakhula siiso, muroweke, nlaikha nootakhala, noomuhiya mwaninyu”.+ 30 Okathi muthiyana ole aaphiyale awe owannyawe, aahimphwanya mwanawe ommaathale ene vakhaamani, nlaikha nootakhala nimuhiyale ene.+
31 Yesu aahikhuma muttetthe wa oTiiro, onavira oSiidoni, orowaka ephareya ya oGalileya. Vaakhumale awe iwo, aahirowa muttetthe wa oDekaapoli.*+ 32 Weiwo, atthu yaahimuruuhela mulopwana mmosa ahaiwa ni ahaalavula saana.+ Awo yaanimuxonttela Yesu wiira omwiixaatherye matata awe. 33 Yesu aahimuroiha mulopwana owo wiiphiini, ottaiwene wa muttitthi ole. Nuumala-vo, aahikeliha ikatha sawe owaruni wa mulopwana ole. Nave, Yesu aahisenela ikatha sawe, okwata nlumi na mulopwana ole.+ 34 Nuumala oweha wiirimu, Yesu aahiittha iphumu, onahimya wiira: “Eph′pha·tha”, eyo piiyo, “Mutthukuwe”. 35 Niinaano-ru, owaruni wa mulopwana ole waahitthukuwa,+ nlumi nawe naahitaphuwa, nto owo aahipacerya olavula oratteene. 36 Vano, Yesu aahaalopola wiira ahimuleele mutthu.+ Masi okathi Yesu aatepa awe waaleela siiso, awo yaamutepa omulaleya.+ 37 Tthiri, atthu ale ootheene yaahitikinihiwa vanceenexa,+ anahimya wiira: “Owo onnipaka saana itthu sootheene. Ootthukula maaru a atthu yahaiwa, nave oowiiriha olavula ale yahaalavula”.+