Silempwale ni Marko
6 Yesu aahivenya onarowa muttetthe awe,+ nto awiixutti awe yaahimutthara. 2 Vaaphiyale aya esaabadu, Yesu aahipacerya wiixuttiha musinagoga.* Vano atthu anceene yaamwiiwa, yaahitikinihiwa anahimya wiira: “Mulopwana ola iixuntte vai itthu iya?+ Ti pani onvahale osuwela nno ni owerya opaka miteko iya sootikiniha?+ 3 Ola khahiyo kalapinteero,+ mwaana a Maria,+ ni munnawe Yakobo,+ Yosefe, Yuda ni Simoni?+ Ankhi axirokorawe, khahiyo yaala anikhala ni hiyo?” Tivonto, awo khiyaamukupanli.* 4 Vano Yesu aahaaleela wiira: “Khaavo profeta onittittimihiwa muttetthe awe aahiiso ni amusi awe, nnakhala vatthokoni vawe”.+ 5 Siiso, Yesu khaavanre miteko sootikiniha muttetthe ole, masi aapenunxe aretta vakhaani paahi, owiixaatheryaka matata awe. 6 Owo aahitikinihiwa vanceene mwaha wa ohaamini waya. Vano, aahirowa mittetthe soowaattamela, owiixuttihaka atthu.+
7 Yesu aahiwiihana arummwa 12, aaruma anli-anli,+ ni aahaavaha ikuru wiira aweryeke woomola malaikha ootakhala.+ 8 Nave-tho, owo aahaaruma wiira ahikuxe etthu yaarowaka mukwaha aya, masi amukuxe ttootto paahi. Nave ahikuxe ephaawu, murupa wa yoolya ya mukwaha, nnakhala musurukhu* mmurupani.+ 9 Masi Yesu aahaaleela wiira arowe paahi ni isantaalya yaawanre aya ni ikuwo saawanre aya. 10 Nave aahaaleela wiira: “Khula etthoko eniphiya anyu, mukhaleke vaavo mpakha okathi munikhuma anyu muttetthe owo.+ 11 Vano muttetthe muhinrowa anyu waakheliwa aahiiso owiriyaniwa, nto okathi onikhuma anyu, mutatheke ntthupi na inawu sanyu, ntoko ethoonyeryo yoowi, awo aattheka”.+ 12 Awiixutti yaahivenya, khurowa waalaleerya atthu wiira arukunuxe mirima saya.+ 13 Nave yaahoomola malaikha ootakhala manceene,+ yaahaattikitthela makhura aretta anceene, ni yaahaapenuxa.
14 Vano, mwene Herodi aahiiwa olavuliwaka Yesu, maana nsina nawe naahivuwa. Nto atthu yaanihimya wiira: “Owo ti Yohani Mpatisa, oroohihimuxiwa mookhwaani. Tivo orina awe owerya wa ovara miteko sootikiniha”.+ 15 Akina yaanihimya wiira: “Owo ti Eliya”. Akina-tho yaahimya wiira: “Owo profeta, ntoko ale a khalai”.+ 16 Vano, Herodi vaiwale awe, aahiira: “Yohani, yoowo miyo kaarumme aka wiikitthiwa muru, oroohihimuxiwa”. 17 Tthiri, Herodi mwaneene, aahiruma ovariwa Yohani, khitthukweliwa mukhatteya, mwaha wa Herodiya, mwaarawe Filipe, munnawe Herodi, okhala wiira Herodi aahimuthela.+ 18 Yohani aanimuhimeerya Herodi wiira: “Nyuwo khamuneemereriwa omuthela mwaara a munninyu”.+ 19 Tivo, Herodiya aanimunyokha Yohani, onaphavela omwiiva, masi khaawerya. 20 Herodi aanimoova Yohani, maana aanisuwela wiira Yohani aari naxariya ni aanimukokhorela Muluku.+ Nto Herodi aanimukhapelela. Khula okathi anwiriyana awe Yohani olavulaka, Herodi khaasuwela yoomwiiriha. Tivonto, vaanimusivela onwiriyana.
21 Naahiphiya nihiku nooreerela, nenlo Herodi aapanke awe efesta ohiyu, otthapelaka nihiku na oyariwa wawe.+ Owo aahaalattula makhulupale a mulaponi, makumantanti a atoropa ni atthu oovuwa a oGalileya.+ 22 Okathi ene yoowo, mwaana mwaamuthiyana a Herodiya, aahiphiya, oniina. Eyo yaahimusivela Herodi ni atthu yaalya* vamosa nuuwo. Mwene Herodi aahimuhimeerya mwali ole, wiira: “Mukivekele khula etthu eniphavela anyu, miyo kinimoovahani”. 23 Nave aahilapha oriki: “Khula etthu enrowa anyu okivekela, miyo kinimoovahani, hata okawanya omwene aka eriyari”. 24 Nto aahirowa omukoha maama awe, oriki: “Kaveke exeeni?” Maama awe aahimuhimeerya wiira: “Mwaveke muru wa Yohani Mpatisa”. 25 Niinaano-ru, mwali ole aahitthimakela wa mwene Herodi, onanvekela, oriki: “Mukivahe niinaano-va, muru wa Yohani Mpatisa, muthaaluni”.+ 26 Nnaamwi aariipiwe murima vanceene, mwene Herodi khaaphavela okhootta ele aavekeliwe awe, maana aahilapha ni mwaha wa atthu aalattunle awe.* 27 Tivo, mwene Herodi aahimuruma kwarta mmosa wiira omuruuhele muru wa Yohani. Nto kwarta owo aahirowa wiikittha muru wa Yohani mukhatteya, 28 oruuha muthaaluni. Aahinvahererya mwali ole, nto owo aahimuroihela maama awe. 29 Nuumala awiixutti a Yohani wiiwa etthu ele, yaahirwa okuxa murutthu awe, avitha mmahiye.
30 Arummwa yaahithukumana ni Yesu, amuleela itthu sootheene yaapanke aya ni yaixuttihale aya.+ 31 Yaahikhala atthu anceene yaarwa ni yaarowa, nto Yesu ni awiixutti awe khiyaarina okathi woomumula, nnakhala woolya. Tivo Yesu aahaahimeerya awiixutti awe wiira: “Nrowe wiiphiini, nipuro nihinaattela oviriwa, mwamumule vakhaani”.+ 32 Siiso, Yesu ni awiixutti awe yaahikela mukalawani, anarowa nipuro noomaaleleya.+ 33 Masi atthu anceene yaahaaweha avenyaka ni yaahisuwela eyo. Tivo, atthu a ipooma sootheene yaahitthimakela weiwo, khupacerya ophiya. 34 Vano, okathi Yesu aakhuma awe mukalawani, aahiweha muttitthi muulupale wa atthu ni aahiwoonela othunku,+ okhala wiira yaari ntoko ipwittipwitthi sihirina makampusi aya.+ Nto, aahipacerya owiixuttiha itthu sinceene.+
35 Nsuwa nikelaka-ru, aawiixutti awe yaahirowa okumana ni Yesu, anamuleela wiira: “Nipuro nla ti noorakamela omuttettheni, nave vahanle wiila.+ 36 Mwaamwarye atthu ala arowe mittetthe soowaattamela ni mmawaani, wiira yathume etthu yoolya”.+ 37 Nto Yesu aahiwaakhula wiira: “Mwaavaheke nyuwo yoolya”. Awo yaahimukoha, ariki: “Nookhala oorowa othuma iphaawu musurukhu oniphiyerya itenaario* 200, wiira naavahe atthu ala?”+ 38 Owo aahaakoha wiira: “Murina iphaawu ikavi? Murowe mwawehe!” Nuumala awiixutti okohererya, yaahimwaakhula ariki: “Siri iphaawu thanu ni ihopa piili”.+ 39 Vano Yesu aahaaruma atthu ootheene okilaathi vamalaxini makithi, ari ene ikurupu sene.+ 40 Nto yaahikilaathi ari ene ikurupu sa atthu 100 ni 50. 41 Nuumala-vo, Yesu aahikuxa iphaawu iyo thanu ni ihopa piili, aahiweha osulu, onavekela.+ Vano aahikawanya iphaawu iyo, aavaha awiixutti, nto awiixutti yaahaakawela atthu. Nave aahikawanya ihopa iye piili aavaha atthu ootheene. 42 Atthu ootheene yaahilya mpakha ovona. 43 Nuumala-vo, saahittotteliwa ipetaaso sa* iphaawu saahanle, khusarya ittanka* 12, nave saahittotteliwa ihopa saahanle.+ 44 Vano atthu yaakhunre iphaawu, yaari alopwana 5.000.
45 Nto, voohipisa, Yesu aahaaruma awiixutti awe okela mukalawani, wiira ahooleke alapuwelaka ekhopela ekina ya ephareya, oluluwanya oBethisaida. Owo aahanle aamwaryaka atthu.+ 46 Nuumala Yesu waalaxerya atthu ale, aahirowa omwaako ovekela.+ 47 Okathi vaapacenrye aya wiila, ekalawa yiira eri ene eriyari ya ephareya, masi Yesu aari mekhawe eemenle ene vatthayani.+ 48 Vano, vakelaka oxa,* Yesu voonale awe wiira awiixutti awe vaanaaxankiha weettiha ekalawa, okhala wiira yaarowa waakhuma epheyo, aahirowa vaari aya, eettaka vasulu va maasi a mphareya. Masi aahala vakhaani waavikana. 49 Vanwehale aya Yesu eettaka vasulu va maasi a mphareya, awiixutti yaahuupuwela wiira: “Niireke nnooloha!” Nto yahikhuwela, 50 okhala wiira ootheene aya yaahimoona, atuthuwa. Voohipisa, Yesu aahilavula naawo oriki: “Mulipihe murima! Muhoove, ti miyo”.+ 51 Nuumala-vo, aahikela mukalawani, khikhala naawo. Nave epheyo yaahimaala. Awiixutti yaahitikinihiwa vanceene, 52 maana khiyaiwexenxe yootaphulela ya mwiiriirya wa iphaawu. Tthiri awo khiyaawerya wiiwexexa.
53 Nuumala olapuwela ekhopela ekina, yaahiphiya oXenesareti, yeemexa ekalawa aya waattamela weiwo.+ 54 Akhumaka-ru mukalawani, atthu a elapo ele yaahimusuwela Yesu. 55 Nto, atthu awo yaahitthimakela waaleela anammawaani a muttetthe ole. Vano, awo yaanimuroihela Yesu aretta vanrepani,* mapuro ootheene yaiwa aya wiira Yesu aari weiwo. 56 Siiso, ilapo sootheene ni mittetthe sootheene ni mapuro ootheene aaphiya awe, atthu yaanaaruuha aretta aya omerkaatu.* Nave-tho, yaanimuxonttela Yesu oweemererya aretta ovara vathi va nlaya nawe na ota paahi.+ Nto ootheene ale yaavara, yaanikhala saana.