Yesaya
60 “Nyuwo muthiyana,+ nvenye! Mwaaryeke, okhala wiira muthuko anyu woopacerya waarya.
Ovuwa wa Yehova onnoomwaleelani.+
2 Moone! Epiphi enookhuneela elapo,
Nave epiphi yuulupale enookhuneela maloko;
Masi Yehova onrowa woomwaleelakani,
Nave ovuwa wawe, onimooneyaka wa nyuwo.
3 Maloko animoorwa omwaleeliwa ni nyuwo,+
Nave mamwene+ animoorwa omwaleeliwa ni muthuko anyu woowaarya.+
4 Mweemexe muru ni nwehe mipantta sootheene soorukurenryeni!
Ootheene aathukumanyiwa ni annoorwa wiira akumane ni nyuwo.
Aniinyu axilopwana, annoorwa akhumaka ottaiwene,+
Nave aniinyu axithiyana, anniruuhiwa ateexiwe ene.+
5 Okathi owo, nyuwo munimoona ni munimooniherya otteeliwa murima,+
Murima anyu onaamootthimakani ni onootteeliwa vanceene,
Mwaha wa mihakhu sa mphareya sinrowa anyu oruuheliwa.
Mireerelo sa atthu a maloko, sinoophiya wa nyuwo.+
6 Muttitthi wa ikamelo, onoosareya mulaponi mwanyu,
Ikamelo sa oMidiyani ni sa wEefa,+
Atthu ootheene a oXeeba, anoophiya;
Anooruuha eweero ni nsenso nootteela.*
Awo anoolaleya ovuwa wa Yehova.+
7 Inama sootheene sa oKedari,+ sinrowa othukumanyiwa ohoolo wanyu,
Ipwittipwitthi soolopwana sa oNebayothi,+ sinimoovarelani muteko,
Iyo sinimweemereriwa ovahiwa ntoko mukuttho valtaari aka,+
Kinooreeriha empa aka yoovuwa.+
8 Tani ala anirwa avavaka ntoko meeku?
Ntoko ipompa sinvavela mweehilini mwaya?*
9 Atthu anikhala musisironi anookhalana nlipelelo+ mwaha wa miyo;
Apakiti a oTaarisi, annoorwa,*
Yaaruuhaka aniinyu axilopwana anikhuma ottaiwene,+
Awo annoorwa akunxe ene eparatha ni eweero,
Wiira avuwihe nsina na Yehova, Muluku anyu Oowaarya a Isarayeli,
10 Anamurwa, anooteka ixiri sanyu,
Nave mamwene aya, animoorumeelani.+
Mwaha wa onanariwa waka, kihoovahani ehukhumu,
Masi mwaha wa oreera waka murima, kinimoomorelani ikharari.+
11 Okathi wootheene, mikhora sanyu sinrowa okhalaka soohuleya,+
Khasinrowa owaliwaka, othana nnakhala ohiyu,
Wiira muruuheliweke mihakhu sa maloko,
Nave mamwene aya, tanrowa ohoolelaka.+
12 Nloko ni omwene ohinrowa woorumeelani, onoopwetexiwa,
Nave maloko anoomala-malihiwa.+
13 Nyuwo munooruuheliwa miri sooreera sa oLiibano,+
Vamosa ni miri siniihaniwa xuniiperu, ferexo, ni sipereste,+
Wiira siphwaneliheke nipuro naka noowaarya,
Miyo kinoovuwiha opuro sininyakela aya inawu saka.+
14 Anaaya atthu yaale yoohaaxani, animoorwa yuurame ohoolo wanyu;
Ootheene yaale ahinoottittimihani, ahaana wuurama ohoolo wanyu,
Nave anoowiihanakani okhala epooma ya Yehova,
Siyoni a Muluku Oowaarya a Isarayeli.+
15 Nnaamwi miyo koonyanyanleni, ni mwaanyokhiwa, nave ahaakhanle mutthu aavira epooma anyu,+
Kinoowiirihani okhala etthu enittottopeliwa ni atthu, mahiku ootheene,
Nave atthu anootteeliwaka murima mwaha wa nyuwo, okhuma niinaano-va mpakha maloko anrowa okhumelela ohoolo.+
16 Nyuwo munoowurya eleeti ya maloko,+
Munimwaamwa mapele a mamwene;+
Tthiri, munoosuwela wiira miyo Yehova, ka Moopoli anyu,
Nave miyo Muluku Oowerya a Yakobe, ka Moopoli anyu.+
17 Opuro wa ekoopiri, kinooruuha eweero,
Opuro wa eyuuma, kinooruuha eparatha,
Opuro wa matera, kinooruuha ekoopiri,
Opuro wa maluku, kinooruuha eyuuma.
Kinimwiiriha murettele okhala makhulupale anyu,
Nave exariya, enookhala atthu anookawelani miteko.+
18 Mulaponi mwanyu khonrowa okhala otakhala,
Nnakhala opwetexiwa aahiiso ohononiwa itthu.+
Nave ixiri sanyu munimwiihanaka okhala woopola,+ ni mikhora sanyu munimwiihanaka okhala ottottopela.
19 Nsuwa khaninrowa woomwaleelakani othana,
Nnakhala waarya wa mweeri, khonrowa woomwaleelakani ohiyu.
Okhala wiira Yehova onookhala muthuko anyu mahiku ootheene,+
20 Nsuwa nanyu khaninrowa-tho okela,
Nnakhala mweeri anyu khonrowa olakaseya,
Okhala wiira Yehova tonrowa okhala muthuko anyu mahiku ootheene.+
Nave-tho, mahiku a oriipiwa wanyu murima, anoomala.+
21 Atthu anyu ootheene anrowa okhala anaxariya;
Elapo enrowa okhala yawaya mahiku ootheene.
Awo ari ntoko miri siniphuwa, seiyo kaalale aka,
22 Atthu vakhaani, anookhala atthu ekonto emosa,
Nave ekurupu ehinooneliwa vatthu, enookhala nloko noolipa.
Waphiya okathi aya, miyo Yehova, kinimwiiriha wiiraneya itthu iya moowaakuveya”.