Aamulepenle Awe Fileemoni
1 Miyo Paulo, kitthukweliwe+ mwaha wa Kristu Yesu, vamosa ni munnihu Timootheyo,+ kinnoolepelani nyuwo Fileemoni, mpatthani ihu onvarana ahu muteko. 2 Nave kinnimulepela murokorihu Apia ni Arikipo,+ nakhotto mukhwiihu a Kristu ni muloko onithukumana vate vanyu, wiira:+
3 Oreera murima wuulupale ni murettele wa Muluku Tiithi ihu, vamosa ni wa Yesu Kristu Pwiya ahu, okhale ni nyuwo.
4 Okathi wootheene kiwuupuwelakani, kinnimuxukhuru Muluku aka, kivekelaka,+ 5 okhala wiira kinniiwa omwaamini wanyu ni omphenta wanyu Pwiya Yesu ni waaphenta wanyu ale oororomeleya.* 6 Kinninvekela Muluku wiira waamini munooniherya anyu, owiiriheni woona itthu sooreera nrina ahu, ninvarelaka muteko Kristu. 7 Nyuwo munnaka, ophenta wanyu wookihakalaliha ni wookilipiha vanceene, maana muhaakurunuxa murima ale oororomeleya.*
8 Tivonto, hata kiweryaka woorumani mwa nsina na Kristu wiira mpake etthu enireerela, 9 masi kiniphavela woovekelani mwaha wa ophenta. Kinoovekelani ti miyo Paulo, kuuluvanle, nave-tho vano kitthukweliwe mwaha wa Kristu Yesu. 10 Kinnoovarani metto mwaha wa mwanaka Oneesimo,+ yoowo kikhanle aka+ paapa awe kiri ene mukhatteya.* 11 Oneesimo owo, khalai khaawiirenleni itthu sooreera, masi vano onninikhaliherya vanceene. 12 Nto miyo kinnooruuhelani nyuwo, mmwaakhele ntoko ole onimphenta aka vanceene.*
13 Kaaniphavela wiira okhaleke ni miyo, ovaraka muteko mwaarowa anyu okivarelaka mukhatteya-mu, kitthukweliwa aka mwaha wa ihapari sooreera.+ 14 Masi nkiphavenle opaka etthu nyuwo muhikeemerenrye, wiira oreera wanyu murima ohikhale wookhanyereriwa, masi okhale vootthuna wanyu.+ 15 Waanyiheryasa, ti etthu emwiirihale ovalaana ni nyuwo okathi vakhaani,* wiira ootthikeleni ni mukhalaneke mahiku ootheene. 16 Owo khonrowa wootthikelani ntoko epottha,+ masi ovikana epottha, okhala wiira vano munna onimphenta aka vanceene.+ Nave-tho nyuwo muhaana omphenta vanceene, ohiya mwaha wookhala mutthu paahi, masi-tho mwaha wookhala mukristau mukhwiinyu. 17 Tivo, mwaakithokoreryaka okhala mpatthani inyu,* mmwaakhele saana ntoko mwaarowa anyu okaakhela. 18 Nave, akhala wiira ohootthekelani aahiiso ohookophelani etthu, mukilokiheke miyo. 19 Miyo Paulo, kinlepa-va ni ntata naka: Kinimoolivani. Nto muupuweleke wiira nyuwo-tho mookikophela okumi anyu. 20 Munnaka, miyo kinniphavela waakhela etthu yooreerela enrwa wa nyuwo, mwaha wa Apwiya. Muriirihe murima aka mwa Kristu.
21 Kinnikupali wiira munoopaka ele eniveka aka, tivonto, kinlepa kisuwelaka wiira munimwiira ovikana ele enoovekelakani. 22 Nave-tho, mukaaverye opuro woorupa. Tthiri, kinniroromela wiira mwaha wa mavekelo anyu, kinootaphuliwa kitthikele weiwo.*+
23 Epaafara,+ otthukwelaniwe aka mwaha wa Kristu Yesu, onnoovahani isalamu. 24 Siiso-tho Marko, Aristarko,+ Dema+ ni Luka,+ yaawo anvarana aka muteko, annookhomasani.
25 Oreera murima wuulupale wa Pwiya Yesu Kristu, okhale ni nyuwo mwaha wa mukhalelo wooreera munooniherya anyu.